भारत र पाकिस्तानबीच गत मे ७ देखि १० सम्म चलेको तनावपूर्ण हवाई संघर्षपछि भारतले आपतकालीन ड्रोन र आतंकवाद प्रतिरोधी उपकरणहरूको खरिद प्रक्रिया अघि बढाएको छ ।

भारतको रक्षा मन्त्रालयले यसपछिको परिस्थितिलाई गम्भीर रूपमा लिँदै आपतकालीन खरिद प्रक्रिया अन्तर्गत कुल १९ अर्ब ८२ करोड भारतीय रुपैयाँ बराबरका १३ वटा रक्षा उपकरण खरिद सम्झौता गरेको छ ।

मे महिनाको भिडन्तमा पाकिस्तानी ड्रोनहरू खसाल्न आईडीडीआईएस प्रणाली प्रभावकारी सावित भएको भारतीय दाबी छ ।

यी प्रणालीहरू भारतकै ‘भारत इलेक्ट्रोनिक्स लिमिटेड’द्वारा निर्माण गरिएको हो । एलएलएलआर प्रणाली हल्का, पोर्टेबल र ३ डी सक्रिय राडार हो, जसले न्यून राडार प्रतिविम्ब भएका ड्रोनहरूलाई समेत पत्ता लगाउन सक्छ ।

पाकिस्तानी सीमाबाट भारतीय भूभागमा अवैध रूपमा ल्याइएका हतियार बोकेका ड्रोनहरू फेला परेपछि भारतले सीमा सुरक्षा र ड्रोन प्रतिरक्षा थप मजबुत बनाउन आवश्यक ठानेको हो ।

भारतीय रक्षा मन्त्रालयले भनेको छ, ‘फास्ट ट्र्याक प्रक्रियामार्फत सम्पन्न यी आपतकालीन खरिदहरूले आतंकवाद विरोधी क्षेत्रमा तैनाथ सैनिकहरूको सजगता, घातक क्षमताहरू, गतिशीलता र सुरक्षामा उल्लेखनीय वृद्धि गर्नेछन् ।’

यसै सिलसिलामा भारतले निगरानी कार्यका लागि प्रयोग हुने ड्रोन र मानवरहित युएभी पनि खरिद गर्दैछ । यसमा भारतीय कम्पनी आइडिया फोर्जको ‘हाइब्रिड मिनी युएभी’ र सोलार इन्डस्ट्रीजको ‘नगस्त्र–१आर’ हतियार समावेश छन् ।

सन् २०२५ को जनवरीयता भारतीय सेनाले विभिन्न प्रयोजनका लागि पाँच पटक भन्दा बढी ‘रिक्वेस्ट फर इन्फरमेशन’ जारी गरिसकेको छ ।

पहाडी र अप्ठ्यारो भौगोलिक क्षेत्रमा सैनिक क्षति न्यूनीकरण तथा निगरानीमा ड्रोनहरू निकै उपयोगी हुने भारतीय सेनाको धारणा छ ।

साथै, यी १३ सम्झौतामार्फत भारतीय सैनिकहरूका लागि बल–प्रूफ ज्याकेट, बलेस्टिक हेल्मेट, राइफलको लागि रातमा देखिने दृष्टि प्रणाली र टाटा कम्पनीको ४ बाइ ४ तीव्र प्रतिक्रियायुक्त लडाकु सवारी साधन पनि उपलब्ध गराइनेछ । यी गाडीहरू भारतीय सेनाले सन् २०२२ को अप्रिलमै पाइसकेको थियो ।

रक्षा मन्त्रालयका अनुसार सबै उपकरणहरू भारतमै उत्पादित हुन् ।

‘आपतकालीन खरिद प्रक्रिया तुरुन्तै पुरा गर्न र अत्यावश्यक सामरिक उपकरणको समयमा आपूर्ति सुनिश्चित गर्नका लागि एक महत्वपूर्ण उपाय सावित भएको छ,’ मन्त्रालयद्वारा जारी विज्ञप्तिमा भनिएको छ ।

भारतमा जनवरीदेखि हालसम्म करिब ८० वटा आतङ्कवादी वा विद्रोही गतिविधि भएका छन् । जवाफमा भारतीय सेनाले ५३६ वटा आतंकवाद तथा विद्रोह विरोधी अपरेसन सञ्चालन गरिसकेको छ ।

प्रधानमन्त्री नरेन्द्र मोदीले भनेका छन्, ‘अब अप्रेशन सिन्दूर आतंकवादविरुद्ध भारतको स्थापित नीति बनेको छ । यो रणनीतिमा आमूल परिवर्तनको संकेत हो ।’

भारतले अब आतङ्ककारी र तिनलाई संरक्षण दिने राष्ट्रबीच कुनै भिन्नता नगर्ने नीति अख्तियार गरेको मोदीको भनाइ छ । यस्तो नीति कारण भारत–पाकिस्तानबीच आगामी दिनमा थप सैन्य टकरावको सम्भावना समेत बढेको बताइएको छ ।