ईन्द्रपुर जुनियर जेसीजको आयोजनामा सम्पन्न अबको सुन्दरहरैंचा बहसमा नगरको समग्र विकास र भविष्यको सम्भावनाबारे विभिन्न क्षेत्रका विशिष्ट व्यक्तित्वहरूले आ–आफ्ना धारणा प्रस्तुत गरे। बहसमा दीर्घकालीन रणनीतिक योजना, शून्य बेरुजु, शिक्षा, स्वास्थ्य, कृषि, सुशासन, पर्यटन र औद्योगिक विकासलाई प्राथमिकतामा राख्नुपर्ने विषयमा सहभागी विशिष्ट व्यक्तित्वहरूले बहुमूल्य सुझाव दिएका छन् ।

महालेखापरीक्षक माननीय तोयम रायमाझीले सुन्दरहरैंचालाई महानगरसम्म उकास्ने, १० वर्षे नागरिकमैत्री रणनीतिक योजना बनाउन र नगरलाई शून्य बेरुजु बनाउने उपायहरू कार्यान्वयन गर्नुपर्ने सुझाव दिनुभयो । प्रेमप्रसाद लुइटेलले औद्योगिक ग्राम निर्माणदेखि सांस्कृतिक पर्यटन र सुशासनलाई सुदृढ बनाउनुपर्नेमा जोड दिनुभयो ।

पियुका उपकुलपति डा. बिजु थपलियाले मेडिकल कलेज स्थानीय बासिन्दाको सपना विपना बनेको उल्लेख गर्दै यसले सयौँ रोजगारी सिर्जना गर्ने र जनसंख्याको चापबीच व्यवसायिक दिगो विकासमा मद्दत गर्ने धारणा राख्नुभयो । उहाँले स्रोत साधन र दक्ष जनशक्तिको भरपुर उपयोग गर्न स्थानीय तहलाई आग्रह गर्नुभयो ।

ईटहरी आईटी कलेजका दुलारिका कलेज प्रमुखले सुन्दरहरैंचाको शैक्षिक सम्भावना देखेरै कलेज स्थापना गरिएको उल्लेख गर्दै प्रविधिलाई प्रयोग गरेर विकासमा सहयोग गर्नुपर्ने बताउनुभयो । डा. सूर्य पराजुलीले सुन्दरहरैंचाको प्रमुख सम्भावना शिक्षा र स्वास्थ्यमै रहेको भन्दै सुधारका सुझाव दिनुभयो।

भोला दुलालले सुन्दरहरैंचाको रिङरोडलाई दीर्घकालीन महत्व दिने, ठूला योजनाका डिपिआर तयार गर्ने र छिटो, छरितो सेवा प्रवाह गर्नुपर्ने धारणा प्रस्तुत गर्नुभयो । साथै कर तिर्ने वातावरण नागरिकमैत्री बनाउनुपर्ने सुझाव पनि दिनुभयो।

डा. राजेन्द्र उप्रेतीले कृषिको एकीकृत योजना बनाउन, स्थानअनुसारका बाली पहिचान गरी न्यूनतम मूल्य निर्धारण गर्ने र कृषि–उद्योग प्रवर्द्धन गर्नुपर्ने धारणा राख्नुभयो । नाट्यकर्मी युवराज घिमिरेले कला र नाट्य क्षेत्रको विकास अपरिहार्य रहेको उल्लेख गर्दै यस्ता बहस निरन्तर चलाउनुपर्ने बताउनु भयो ।

शिवप्रसाद ढकालले नयाँ नेतृत्वले पुराना ठूला योजनालाई निरन्तरता दिएकोमा धन्यवाद दिँदै नयाँ योजनाहरूको सफल कार्यान्वयन सहज बनाउने वातावरण सिर्जना गर्नुपर्नेमा जोड दिनुभयो। उहाँले हसिना, बाघझोडा, बृन्दाबन, गौशाला लगायतका धार्मिक स्थललाई धार्मिक पर्यटन र शिक्षा–स्वास्थ्य हबका रूपमा विकास गर्न सकिने धारणा राख्नुभयो । राजकुमार ओझा र माननीय गोपी अछामी दुवैले सुन्दरहरैंचालाई स्वास्थ्य, शिक्षा र संस्कृतिको हब बनाउनुपर्नेमा जोड दिनुभयो ।

प्रमुख प्रशासकीय अधिकृत विनोदकुमार न्यौपानेले नगरमा स्रोत साधनले भ्याएसम्म काम भइरहेको, जनताको अपेक्षा उच्च भए पनि ठूला योजना क्रमशः अघि बढिरहेको जानकारी दिनुभयो । नगरप्रमुख केदारप्रसाद गुरागाईंले नगरको वर्तमान अवस्था र भविष्यको सम्भावनाबारे प्रस्तुत गर्नुभयो । यसै क्रममा अर्जुनराज अधिकारीले शैक्षिक क्षेत्रमा सशक्त पहल गर्नुपर्ने धारणा राख्नुभयो।

कार्यक्रमका सहजकर्ता बाबुराम निरौला, डा. दिपक न्यौपाने, निरज न्यौपाने र विनय बाह्रकोटी रहेका थिए। कार्यक्रम भव्य र सभ्य रूपमा सम्पन्न भएको आयोजकले जनाएको छ । यसलाई सुन्दरहरैंचाको इतिहासकै उत्कृष्ट बहस कार्यक्रमको रूपमा दाबी गरिएको छ ।