महाशाखाका अनुसार कोशी प्रदेशका पहाडी भू–भागका थोरै स्थानहरू तथा तराईका एक–दुई स्थानमा बुधबार राति हल्का वर्षा हुन सक्ने सम्भावना छ। पश्चिमी प्रणालीको प्रभाव क्रमशः पूर्वतर्फ सर्दै जाने देखिएकाले केही क्षेत्रमा बदली र हल्का वर्षा हुन सक्ने अनुमान गरिएको हो। मौसमविद्हरूका अनुसार बुधबार दिनभरि देशका अधिकांश स्थानमा वर्षाको सम्भावना रहेको छ। विशेषगरी उच्च पहाडी तथा हिमाली भू–भागमा पूर्ण बदली रहनेछ भने बाँकी पहाडी र तराई क्षेत्रमा आंशिकदेखि सामान्य बदली देखिनेछ। उच्च पहाडी तथा हिमाली भू–भागका केही स्थानमा मध्यम वर्षा र हिमपातको सम्भावना पनि रहेको महाशाखाले जनाएको छ। पश्चिमी न्यूनचापीय प्रणालीको प्रभाव कमजोर हुँदै गएपछि बिहीबारदेखि केही स्थानमा बादल लागे पनि मौसम क्रमशः खुल्दै जाने अनुमान गरिएको छ। यसले दैनिक जनजीवन, यातायात र उच्च भू–भागको हवाई आवागमनमा परेको असर पनि क्रमशः कम हुने अपेक्षा गरिएको छ। मौसमविद्हरूले वर्षा र हिमपातको सम्भावना रहेकाले उच्च पहाडी तथा हिमाली क्षेत्रमा यात्रा गर्नेहरूलाई सतर्कता अपनाउन आग्रह गरेका छन्।

राष्ट्रिय स्वतन्त्र पार्टीका सभापति रवि लामिछाने अस्पताल भर्ना भएका छन् । चुनावी अभियानका क्रममा जनकपुरमा रहेका बेला लामिछानेको खुट्टामा चोट लागेको थियो ।

उक्त चोटको उपचारका लागि लामिछाने चिकित्सकको सल्लाहअनुसार अस्पताल भर्ना भएको उनको सचिवालयले जानकारी दिएको छ

हेर्नुहोस् सूचना :

माघ ५ गते जनकपुरमा सम्पन्न कार्यक्रममा सभापति रवि लामिछानेज्युको देब्रे खुट्टामा लागेको सामान्य चोट समयसँगै बढेर हाल छालाको भित्री तहमा संक्रमण (Cellulitis) भएको छ। त्रिभुवन विश्वविद्यालय शिक्षण अस्पताल, महाराजगञ्जका चिकित्सकहरूको परीक्षण तथा सल्लाहअनुसार यस प्रकारको संक्रमण जोखिमयुक्त हुन सक्ने भएकाले केही दिन अस्पतालमै चिकित्सकको निगरानीमा राखी उपचार गराउनु अनिवार्य भएको छ। त्यसैअनुसार सभापतिज्यू हाल त्रिवि शिक्षण अस्पताल, महाराजगञ्जमा उपचाररत हुनुहुन्छ।

चोट आफैंमा गम्भीर नभए पनि संक्रमण फैलिन सक्ने सम्भावनालाई ध्यानमा राख्दै चिकित्सकहरूको सुझावअनुसार पूर्ण उपचार र स्वास्थ्य सुधारपछि मात्र उहाँ पुनः नियमित राजनीतिक तथा सांगठनिक अभियानमा फर्किने जानकारी गराइन्छ।
सभापतिज्यू सार्वजनिक रूपमा नदेखिनु भएको विषयमा चासो, चिन्ता तथा शुभेच्छा व्यक्त गर्नुहुने सबैमा हार्दिक धन्यवाद ज्ञापन गर्दछौं।

साथै, अन्य बिरामीहरूको उपचार प्रक्रियामा असर नपरोस् तथा अस्पताल प्रशासनलाई हुनसक्ने असहजतालाई मध्यनजर गर्दै भेटघाटका लागि अस्पताल नआईदिनुहुन सम्पूर्णमा विनम्र अनुरोध गर्दछौं।
धन्यवाद।

आउँदो फागुन २१ को चुनावका लागि प्रत्यक्षतर्फ आवश्यक मतपत्र छपाइ शुरु भएको छ । आवश्यक झन्डै २ करोड ३ लाख २३ हजार मतपत्र छपाइ कार्य शुरु भएको निर्वाचन आयोगले जनाएको छ ।

अबको १५ दिनभित्र मतपत्र छपाइको काम सम्पन्न हुने र क्रमशः निर्वाचन केन्द्रमा ढुवानी गरिने कार्यवाहक प्रमुख निर्वाचन आयुक्त रामप्रसाद भण्डारीले जानकारी दिनुभयो । आउँदो फागुन ५ गतेभित्र मतदान क्षेत्र र मतदानस्थलमा मतपत्र पुगिसक्ने उहाँले जानकारी दिनुभयो ।

यसअघि समानुपातिकतर्फको मतपत्र छपाइ कार्य सकिएको छ । जनक शिक्षा सामग्री केन्द्र लिमिटेड सानोठिमीमा समानुपातिकतर्फ आवश्यक २ करोड ८ लाख ५० हजारभन्दा धेरै मतपत्र छपाइ कार्य सम्पन्न भएको केन्द्रका प्रबन्ध निर्देशक यदुनाथ पौडेलले जानकारी दिनुभयो ।