नेपाली राजनीतिज्ञको लोकप्रियता मापन गर्ने अनलाइन प्लेटफर्म ‘रेटमाईनेता’ मा धनगढी उपमहानगरपालिकाका प्रमुख गोपाल हमाल सबैभन्दा लोकप्रिय नेता देखिएका छन्। सार्वजनिक रूपमा उपलब्ध तथ्याङ्कअनुसार सात हजार ५०० भन्दा बढी कुल भोटमध्ये ९७ प्रतिशत ‘अपभोट’ प्राप्त गर्दै हमाल लोकप्रियताको शीर्ष स्थानमा पुगेका हुन्।

हमालले सात हजार ३०० भन्दा बढी सकारात्मक र २५६ नकारात्मक भोट पाएका छन्।

लोकप्रियताको दोस्रो स्थानमा सागर ढकाल रहेका छन्। हालै राष्ट्रिय स्वतन्त्र पार्टी (रास्वपा) प्रवेश गरेका ढकालले ९५ प्रतिशत एप्रुभल रेटिङसहित कुल ६ हजार ९०० भोटमध्ये ६ हजार ५०० सकारात्मक र ३४१ नकारात्मक भोट प्राप्त गरेका छन्।

तेस्रो स्थानमा ९४ प्रतिशत एप्रुभल रेटिङसहित रास्वपाकी पूर्व नेतृ सुमना श्रेष्ठ रहेकी छिन्। उनले आठ हजार ७०० भोटमध्ये आठ हजार २०० भन्दा बढी सकारात्मक र ५०९ नकारात्मक भोट पाएकी छन्।

काठमाडौँ महानगरपालिकाका प्रमुख बालेन्द्र शाह (बालेन) ९४ प्रतिशत एप्रुभल रेटिङका साथ चौथो स्थानमा छन्। उनको कुल नाै हजार १०० भोटमध्ये आठ हजार ६०० सकारात्मक र ५३५ नकारात्मक भोट रहेका छन्।

यसैगरी ९२ प्रतिशत एप्रुभल रेटिङसहित रास्वपाकी नेतृ सोविता गौतम पाँचौँ स्थानमा छिन्। उनले ६ हजार ९०० भोटमध्ये ६ हजार ३०० भन्दा बढी अपभोट र ५६४ डाउनभोट पाएकी छिन्।

ललितपुर महानगरपालिकाका प्रमुख चिरीबाबु महर्जन ९० प्रतिशत रेटिङसहित छैटौँ स्थानमा छन्। उनले ६ हजार ७०० भोटमध्ये ६ हजार १०० सकारात्मक र ६४३ नकारात्मक भोट पाएका छन्।

सातौँ स्थानमा रास्वपाकी निशा डाँगी (८९ प्रतिशत) र आठौँ स्थानमा हरि ढकाल (८८ प्रतिशत) छन्। रास्वपाकै डा. तोषिमा कार्की सात हजार २०० भोटमध्ये ६ हजार ३०० सकारात्मक र ८८३ नकारात्मक भोटसहित नवौँ स्थानमा छिन्। पार्टीकै उपसभापति डा. स्वर्णिम वाग्ले ८७ प्रतिशत एप्रुभल रेटिङसहित दशौँ स्थानमा परेका छन्।

धरान उपमहानगरपालिकाका प्रमुख हर्क साम्पाङ ले ८६ प्रतिशत एप्रुभल रेटिङ प्राप्त गरेका छन्। उनले आठ हजार ५०० भोटमध्ये सात हजार ३०० भन्दा बढी सकारात्मक र एक हजार २०० भन्दा बढी नकारात्मक भोट पाएका छन्।

रास्वपा सभापति रवि लामिछाने को एप्रुभल रेटिङ ७८ प्रतिशत रहेको छ। उनका आठ हजार ३०० भोटमध्ये सात हजार ५०० भन्दा बढी सकारात्मक र एक हजार ९०० भन्दा बढी नकारात्मक भोट छन्।

राष्ट्रिय प्रजातन्त्र पार्टी (राप्रपा)का नेताहरूमा ज्ञानबहादुर (ज्ञानेन्द्र) शाही को ७४ प्रतिशत, पार्टी अध्यक्ष राजेन्द्र लिङ्देन को ७० प्रतिशत र रवीन्द्र मिश्र को ६९ प्रतिशत एप्रुभल रेटिङ रहेको छ। नेकपा (एमाले) की नेतृ विद्या भट्टराई ले ६७ प्रतिशत एप्रुभल रेटिङ प्राप्त गरेकी छन्।

तथ्याङ्कअनुसार ठूला दलका शीर्ष नेताहरूको लोकप्रियता कमजोर देखिएको छ। नेकपा (माओवादी केन्द्र)का संयोजक पुष्पकमल दाहाल ‘प्रचण्ड’ को एप्रुभल रेटिङ मात्र १० प्रतिशत रहेको छ, जहाँ आठ हजार ९०० भोटमध्ये आठ हजारभन्दा बढी नकारात्मक भोट परेका छन्।

नेकपा (एमाले) का अध्यक्ष केपी शर्मा ओली को एप्रुभल रेटिङ २ प्रतिशत मात्रै छ। उनले नाै हजार २०० भोटमध्ये नौ हजारभन्दा बढी नकारात्मक भोट पाएका छन्। त्यस्तै, नेपाली कांग्रेसका सभापति शेरबहादुर देउवा र नेतृ डा. आरजु राणा दुवैको एप्रुभल रेटिङ केवल १ प्रतिशत रहेको देखिन्छ।

‘रेटमाईनेता’ एक खुला अनलाइन प्लेटफर्म हो, जहाँ सर्वसाधारणले अकाउन्ट बनाएर नेताको काम र व्यवहारका आधारमा सकारात्मक (अपभोट) वा नकारात्मक (डाउनभोट) मत दिन सक्छन्। यिनै मतको प्रतिशतका आधारमा नेताहरूको एप्रुभल रेटिङ तय गरिन्छ।