१३ दिन अघि घरदैलोका क्रममा मोरङको सुन्दरहरैंचा–७ गोठगाउँमा रहेकै समयमा बुबाको निधनको खबर सुनेर घर फर्किनुभएका मोरङ क्षेत्र नम्बर ६ का नेकपा एमालेका उम्मेद्वार विनोद ढकाल हिजोदेखि चुनावी प्रचारमा लाग्नुभएको छ । बुबाको १३ दिने काजकिरिया सकेर हिन्दू परम्पराअनुसार सेतै वस्त्रमा मतदातामाझ उपस्थित भएका ढकालले विकासको एजेन्डासहित आफ्नो अभियानलाई तीव्र बनाउनुभएको हो ।

माघ २९ गते १०१ वर्षीय बुवा विष्णुप्रसाद ढकालको निधनपछि संस्कार र धार्मिक विधिअनुसार उहाँ कोरामा रहनुभएको थियो । फागुन ३ गते उहाँले क्षेत्रगत विकास, शिक्षा, स्वास्थ्य, कृषि र पूर्वाधारलाई प्राथमिकतामा राख्दै कोराबाटै ३० बुँदे प्रतिबद्धता सार्वजनिक गर्नुभएको थियो ।

हिजो विराटनगर महानगरपालिका वडा नम्बर ४, ५, ६ र ११ का १६ स्थानमा उहाँले कोणसभा गर्नुभएको हो । पुलचोक, आइतबारे, जामुनगाछी, चाँदनी चोक, अरुण चोक, स्वागत चोक, नहर चोक, ब्रह्मपुरा चोक, कन्चनबारी, राजवंशी चोक, ढाट, खार्जी, बस्ता टोल, इक्राही, गिरी चोक, दावाबन्दी, कोचाखाल लगायतका स्थानमा उहाँले कोणसभा, घरदैलो र मतदाता भेटघाट गर्नुभएको हो ।

सरकारले आउँदो फागुन २१ गते हुने प्रतिनिधिसभा सदस्य चुनावमा तीन दिन सार्वजनिक बिदा दिने निर्णय गरेको छ । सिंहदरबारमा आज बसेको मन्त्रिपरिषद् बैठकले फागुन २०, २१ र २२ गते सार्वजनिक बिदा दिने निर्णय गरेको सरकारका प्रवक्ता एवम् गृहमन्त्री ओमप्रकाश अर्यालले जानकारी दिनुभयो ।

निर्वाचन आयोगको सिफारिसअनुसार सरकारले तीन दिन बिदा दिने निर्णय गरेको हो । यस्तै सरकारले जेन–जी परिषद् गठन गर्ने भएको छ । मन्त्रीपरिषद बैठकले यो निर्णय गरेको हो । नवयुवा आन्दोलनको बलमा गठन भएको वर्तमान सरकारमाथि उनीहरुको माग सम्बोधनका लागि उपयुक्त निर्णय गर्न नसकेको भन्दै आलोचना हुँदै आएको छ ।

यस्तै मन्त्रिपरिषद् बैठकले चीन सरकारले दिने ४० लाख अमेरिकी डलरबराबरको नगद अनुदान स्वीकार गर्ने, बुढीगण्डकी जलाशययुक्त जलविद्युत् आयोजनाको वित्तीय लगानी ढाँचा स्वीकृत गर्ने, बीमा ऐन २०७९ को दफा १४० बमोजिमको कसुर सम्बन्धी मुद्दाको कारबाही र किनारा गर्ने अधिकार जिल्ला अदालतलाई तोक्ने निर्णय गरेको छ ।

आगामी निर्वाचनका लागि चीनले ४० लाख अमेरिकी डलर प्रदान गर्ने भएको छ । अनुदानस्वरुप प्राप्त हुने उक्त रकम स्वीकार गर्ने निर्णय मन्त्रिपरिषद् बैठकले गरेको छ ।सरकारका प्रवक्ता एवं गृहमन्त्री ओमप्रकाश अर्यालका अनुसार, बैठकले चालु आर्थिक वर्षको बजेट तथा कार्यक्रममा उल्लेख भएबमोजिम बूढीगण्डकी जलाशययुक्त आयोजनाको वित्तीय लगानी ढाँचा स्वीकृत गर्ने निर्यण गरेको छ ।साथै बैठकले काठमाडौं जिल्ला अदालतका मुख्य न्यायाधीश दीवाकर भट्टलाई काठमाडौं जिल्ला अदालतको कामसमेत हेर्ने गरी उपभोक्ता अदालत काठमाडौंको अध्यक्ष तोक्ने निर्णय गरेको छ ।

मन्त्रिपरिषद्ले बिमा ऐन, २०७९ को दफा १४० बमोजिमको कसुरसम्बन्धी मुद्दाको कारबाही र किनारा गर्न जिल्ला अदालतलाई तोक्ने र २०८३ वैशाख १ गतेदेखि चैत मसान्तसम्मका सार्वजनिक बिदा पनि निर्धारण गरेको छ ।

बैठकले जेनजी परिषद् गठन गर्ने निर्णय पनि गरेको प्रवक्ता अर्यालले जानकारी दिए । रासस