१० औँ संस्करणको आईसीसी टी–२० विश्वकपमा पाकिस्तानले विजयी सुरुआत गरेको छ। आज भएको उद्घाटन खेलमा पाकिस्तानले नेदरल्यान्ड्सलाई ३ विकेटले पराजित गर्दै प्रतियोगितामा सकारात्मक शुरुआत गरेको हो।

नेदरल्यान्ड्सले दिएको १ सय ४८ रनको लक्ष्य पाकिस्तानले १९ ओभर ३ बलमा ७ विकेट गुमाएर पूरा गर्‍यो। पाकिस्तानका साहिबजादा फरहानले सर्वाधिक ४७ रन बनाए। नेदरल्यान्ड्सका आर्यन दत्त र पॉल भ्यान मिकरेनले समान २/२ विकेट लिए।

यसअघि श्रीलङ्काको कोलम्बोस्थित सिंहाली स्पोर्ट्स क्लब मैदानमा टस हारेर पहिले ब्याटिङ गरेको नेदरल्यान्ड्स १९ ओभर ५ बलमा १ सय ४७ रनमै अलआउट भएको थियो। उसका लागि स्कट एडवड्र्सले सर्वाधिक ३७ रन बनाए। पाकिस्तानका सलमान मिर्जाले ३ विकेट लिए।

आजै हुने दोस्रो खेलमा वेस्ट इन्डिज र स्कटल्यान्डबीच प्रतिस्पर्धा हुँदैछ। कोलकाताको इडेन गार्डेनमा स्कटल्यान्डले टस जितेर बलिङ रोजेको छ। त्यस्तै आजको तेस्रो तथा अन्तिम खेलमा आयोजक भारत र अमेरिका भिड्नेछन्। यो खेल मुम्बईको वानखेडे स्टेडियममा नेपाली समयअनुसार बेलुका सवा ७ बजे सुरु हुनेछ।

विश्वकपमा नेपालले पनि सहभागिता जनाउँदैछ। नेपालले भोलि मुम्बईमा इङ्ग्ल्यान्डसँग खेल्दै आफ्नो अभियान सुरु गर्नेछ। सुरक्षा कारण देखाउँदै बङ्गलादेश भारत आउन नमानेपछि अन्तर्राष्ट्रिय क्रिकेट काउन्सिल (आईसीसी)ले उसको स्थानमा स्कटल्यान्डलाई प्रतियोगितामा समावेश गरेको हो।

प्रतियोगितामा २० टोलीलाई चार समूहमा विभाजन गरिएको छ र प्रतियोगिता मार्च ८ सम्म चल्नेछ। अहिलेसम्म टी–२० विश्वकपमा ६ टोलीले उपाधि जितेका छन्। भारत, इङ्ग्ल्यान्ड र वेस्ट इन्डिजले २/२ पटक तथा पाकिस्तान, श्रीलङ्का र अस्ट्रेलियाले १/१ पटक उपाधि जितेका छन्।

झापा गोल्डकप फुटबल प्रतियोगिताको सातौँ संस्करण आज (शनिबार)देखि सुरु हुँदैछ। ४ फागुनसम्म सञ्चालन हुने प्रतियोगिताको उद्घाटन खेलमा घरेलु टोली झापा–११ र विभागीय टोली नेपाल पुलिस क्लबबीच प्रतिस्पर्धा हुनेछ।

बिर्तामोड–३ स्थित डोमालाल राजवंशी रंगशालामा हुने गोल्डकपमा यस वर्ष पुरस्कार राशि बढाइएको छ। आयोजकका अनुसार विजेता टोलीले नगद १५ लाख रुपैयाँसहित ट्रफी प्राप्त गर्नेछ भने उपविजेताले ७ लाख ५० हजार रुपैयाँ पाउनेछ। प्रतियोगिता यस वर्ष गोल्डकप आयोजक समितिका पूर्वअध्यक्ष विनोद बस्नेतको स्मृतिमा आयोजना गरिएको हो।

प्रतियोगितामा झापा–११ सहित विभागीय टोली नेपाल पुलिस क्लब, सशस्त्र प्रहरीको एपीएफ क्लब र त्रिभुवन आर्मी क्लब सहभागी छन्। त्यस्तै चर्च ब्वाइज युनाइटेड, मछिन्द्र क्लब, लालीगुराँस एसोसिएसन पोखरा, आरटीसी भुटान, सिङग्लिन स्पोर्टिङ क्लब (सिक्किम, भारत) र एन पेनाङ क्लब (मलेसिया)ले पनि प्रतिस्पर्धा गर्ने आयोजक समितिका अध्यक्ष केदार गिरीले जानकारी दिए।

यस वर्ष पनि प्रतियोगिताको सर्वोत्कृष्ट खेलाडीलाई एक थान मोटरसाइकल प्रदान गरिनेछ। सर्वाधिक गोलकर्ता, उत्कृष्ट गोलकिपर र उत्कृष्ट प्रशिक्षकलाई जनही ३५ हजार रुपैयाँ तथा प्रत्येक खेलको ‘प्लेयर अफ द म्याच’लाई २५ हजार रुपैयाँ प्रदान गरिनेछ। प्रतियोगिताका लागि रंगशालामा करिब १० हजार दर्शक अट्ने बाँसको प्याराफिट निर्माण गरिएको छ।

उद्घाटन समारोहका अवसरमा जिल्लाका एक जना पुराना फुटबल खेलाडीलाई नगद २५ हजारसहित सम्मान गरिनेछ। साथै, रंगशालाका जग्गादाता डोमालाल राजवंशीको परिवारलाई पनि नगद २५ हजारसहित सम्मान गर्ने कार्यक्रम छ।

गोल्डकप सञ्चालनका लागि करिब १ करोड ५० लाख रुपैयाँ खर्च हुने अनुमान गरिएको छ। प्रतियोगिताभर ५० हजारभन्दा बढी दर्शकले खेल अवलोकन गर्ने अपेक्षा आयोजक समितिका वरिष्ठ उपाध्यक्ष गजेन्द्र पौडेलले व्यक्त गरे।

झापा गोल्डकप २०७२ सालदेखि निरन्तर आयोजना हुँदै आएको प्रतियोगिता हो।

वरिष्ठ कलाकार सुनिल थापाको निधन भएको छ । उनको हृदयघातका कारण शनिबार बिहान निधन भएको हो ।

शंखमुलस्थित अपार्टमेन्टमा बस्दै आएका थापाको शनिबार बिहान हृदयघात भएको थियो । त्यसपछि थापाथलीस्थित नर्भिक अस्पताल पुर्‍याइएका उनको सोही अस्पतालमा निधन भएको हो ।

यसबारे कलाकार केदार घिमिरे (माग्ने बुढा)ले सामाजिक सञ्जालबाट जानकारी दिएका छन् । उनले सामाजिक सञ्जालमा लेखेका छन्, ‘वरिष्ठ कलाकार सुनिल थापा दाइको अप्रत्याशित निधनको खबरले स्तब्ध बनाएको छ । नेपाली चलचित्र उद्योगले आज अर्को एक महान् व्यक्तित्व र बलियो धरोहर गुमाएको छ । कला क्षेत्रमा उहाँले पुर्‍याउनुभएको योगदान सधैँ स्मरणीय रहनेछ । भावपूर्ण श्रद्धाञ्जली दाइ, वैकुण्ठ वास होस् ।’

कलाकार थापाले सयौँ नेपाली चलचित्रमा अभिनय गरेका छन् ।