साविक विजेता बंगलादेशविरुद्ध भारतले ४–० को एकतर्फी जित निकाल्दै साफ महिला यू–१९ च्याम्पियनसिपको उपाधि जितेको छ। शनिबार पोखरा रंगशालामा सम्पन्न फाइनलमा भारतका जुलन नोङमाइथेम, एलिजाबेथ लाक्रा, पर्ल फर्नान्डेस र अन्विता रघुरामनले १–१ गोल गरे।

खेलको ४२ औँ मिनेटमा नोङमाइथेमको गोलमार्फत भारतले अग्रता लियो। ६३ औँ मिनेटमा लाक्राले टोलीको अग्रता दोब्बर बनाइन् भने पाँच मिनेटपछि फर्नान्डेसले तेस्रो गोल थपिन्। निर्धारित समय सकिन ७ मिनेट बाँकी रहँदा रघुरामनले गोल गर्दै भारतले ४–० को एकतर्फी जित सुनिश्चित गर्यो।

यू–१९ स्तरमा भारतको यो तेस्रो उपाधि हो। यसअघि सन् २०२२ मा घरेलु भूमिमा सम्पन्न तेस्रो संस्करणमा भारत पहिलो पटक च्याम्पियन बनेको थियो। त्यसपछि २०२४ मा ढाकामा सम्पन्न पाँचौं संस्करणमा भारत र बंगलादेशलाई संयुक्त च्याम्पियन घोषणा गरिएको थियो।

लायन्स क्लब अफ विराटचोक सिटीले एकैदिन तीन महत्वपूर्ण सामाजिक कार्य गर्दै समाजप्रति आफ्नो उत्तरदायित्वलाई अझ मजबुत बनाएको छ। क्लबले सुन्दरहरैचा–६ का हात्तीपीडित उमेश परियारको घर निर्माणको शिलान्यास गरेको छ। साथै, भोजपुर साल्पासिलिचो–५ का मृगौला पीडित समरबहादुर बिकलाई २५ हजार रुपैयाँ र क्यान्सर पीडित तारा केशीलाई २० हजार रुपैयाँ नगद सहयोग प्रदान गरिएको छ।

उक्त कार्यक्रममा सुन्दरहरैचाका संस्थापक तथा नगरप्रमुख शिवप्रसाद ढकाल, डिस्ट्रिक्ट ३२५ सीका गभर्नर बबरजंग थापा, एरिया चिफ रोहितकुमार शाह, जोन चेयरपर्सन सुमन गजमेर लगायत लायन्स क्लबका पदाधिकारी तथा सदस्यहरूको उपस्थिति रहेको थियो। कार्यक्रममा सहभागीहरूले यस्ता सहयोगात्मक गतिविधिहरूले समाजमा सकारात्मक सन्देश फैलाउने र आवश्यकता पर्ने व्यक्तिहरूलाई सघाउने विश्वास व्यक्त गरे।

हात्तीपीडित उमेश परियारको घर निर्माण कार्यक्रम मार्फत उनलाई सुरक्षित र सुविधा सम्पन्न आवास उपलब्ध गराउने उद्देश्य राखिएको क्लबले जनाएको छ। मृगौला रोगबाट पीडित समरबहादुर बिक र क्यान्सर पीडित तारा केशीलाई प्रदान गरिएको आर्थिक सहयोगले उपचार प्रक्रियामा केही राहत मिल्ने अपेक्षा गरिएको छ।

कार्यक्रममा बोल्दै लायन्स क्लब अफ विराटचोक सिटीका अध्यक्ष राजन भट्टराईले भने, “हाम्रो क्लबले आगामी दिनमा पनि समाजमा यस्ता सहयोगात्मक कार्यक्रमहरू निरन्तर सञ्चालन गर्दै सामाजिक उत्तरदायित्व पूरा गर्नेछ। हामी स्वास्थ्य, शिक्षा र विपद्‌पीडितको क्षेत्रमा सक्रिय रहन प्रतिबद्ध छौं।” लायन्स क्लब अफ विराटचोक सिटीको यो पहलले समाजमा सहयोग र मानवता प्रवर्द्धन गर्ने उदाहरण प्रस्तुत गरेको आयोजकहरूले बताएका छन्।

१० औँ संस्करणको आईसीसी टी–२० विश्वकपमा पाकिस्तानले विजयी सुरुआत गरेको छ। आज भएको उद्घाटन खेलमा पाकिस्तानले नेदरल्यान्ड्सलाई ३ विकेटले पराजित गर्दै प्रतियोगितामा सकारात्मक शुरुआत गरेको हो।

नेदरल्यान्ड्सले दिएको १ सय ४८ रनको लक्ष्य पाकिस्तानले १९ ओभर ३ बलमा ७ विकेट गुमाएर पूरा गर्‍यो। पाकिस्तानका साहिबजादा फरहानले सर्वाधिक ४७ रन बनाए। नेदरल्यान्ड्सका आर्यन दत्त र पॉल भ्यान मिकरेनले समान २/२ विकेट लिए।

यसअघि श्रीलङ्काको कोलम्बोस्थित सिंहाली स्पोर्ट्स क्लब मैदानमा टस हारेर पहिले ब्याटिङ गरेको नेदरल्यान्ड्स १९ ओभर ५ बलमा १ सय ४७ रनमै अलआउट भएको थियो। उसका लागि स्कट एडवड्र्सले सर्वाधिक ३७ रन बनाए। पाकिस्तानका सलमान मिर्जाले ३ विकेट लिए।

आजै हुने दोस्रो खेलमा वेस्ट इन्डिज र स्कटल्यान्डबीच प्रतिस्पर्धा हुँदैछ। कोलकाताको इडेन गार्डेनमा स्कटल्यान्डले टस जितेर बलिङ रोजेको छ। त्यस्तै आजको तेस्रो तथा अन्तिम खेलमा आयोजक भारत र अमेरिका भिड्नेछन्। यो खेल मुम्बईको वानखेडे स्टेडियममा नेपाली समयअनुसार बेलुका सवा ७ बजे सुरु हुनेछ।

विश्वकपमा नेपालले पनि सहभागिता जनाउँदैछ। नेपालले भोलि मुम्बईमा इङ्ग्ल्यान्डसँग खेल्दै आफ्नो अभियान सुरु गर्नेछ। सुरक्षा कारण देखाउँदै बङ्गलादेश भारत आउन नमानेपछि अन्तर्राष्ट्रिय क्रिकेट काउन्सिल (आईसीसी)ले उसको स्थानमा स्कटल्यान्डलाई प्रतियोगितामा समावेश गरेको हो।

प्रतियोगितामा २० टोलीलाई चार समूहमा विभाजन गरिएको छ र प्रतियोगिता मार्च ८ सम्म चल्नेछ। अहिलेसम्म टी–२० विश्वकपमा ६ टोलीले उपाधि जितेका छन्। भारत, इङ्ग्ल्यान्ड र वेस्ट इन्डिजले २/२ पटक तथा पाकिस्तान, श्रीलङ्का र अस्ट्रेलियाले १/१ पटक उपाधि जितेका छन्।