बुधबार नेपाल स्टक एक्स्चेन्ज (नेप्से) परिसूचक लगभग स्थिर रहेको छ। कारोबारको सुरुवातमा केही बढेको बजार अन्त्यमा ०.०४ अंकले घट्दै २६६२.१४ बाट २६६२.१० बिन्दुमा पुगेको हो।

यसअघि आइतबार १०.२४ अंक, सोमबार २६.०५ अंक र मंगलबार १०.२५ अंकले घटेको नेप्से बुधबार भने झिनो गिरावटमै सीमित भयो। सूचक स्थिरजस्तै रहे पनि कारोबार रकममा भने सामान्य वृद्धि देखिएको छ।

बुधबार १३३ कम्पनीको सेयर मूल्य घटेको छ भने ११३ कम्पनीको बढेको छ। १३ कम्पनीको सेयर मूल्यमा कुनै परिवर्तन देखिएन। धेरै कम्पनीको मूल्य घटेकै कारण समग्र सूचकमा सुधार आउन सकेन।

समूहगत सूचकमध्ये वित्त ६.३५, होटल ४७.०७, जीवन बीमा २९.३१, उत्पादनमूलक ४२.५५, लघुवित्त ३.३३, सामूहिक लगानी कोष ०.०७, अन्य ५.७६ र व्यापार समूह ८.७७ अंकले घटेका छन्। यद्यपि बैंकिङ १.४९, विकास बैंक १०.१२, जलविद्युत् १६.७५, लगानी ०.०७ र निर्जीवन बीमा ९.६५ अंकले बढेका छन्।

बुधबार ३२९ कम्पनीका ८२ हजार ४५० कारोबारमार्फत २ करोड २२ लाख ८२ हजार ५० कित्ता सेयर ८ अर्ब ६९ करोड रुपैयाँमा खरिद–बिक्री भएको छ। यो रकम मंगलबारको तुलनामा बढी हो। मंगलबार ३२४ कम्पनीका ८९ हजार ८३६ कारोबारबाट २ करोड १७ लाख १५ हजार ८६८ कित्ता सेयर ८ अर्ब ६१ करोड रुपैयाँमा कारोबार भएको थियो।

आगामी फागुन २१ गते हुने प्रतिनिधिसभा सदस्य निर्वाचनका लागि ५३ जिल्लाका ११७ निर्वाचन क्षेत्रको मतपत्र छपाइ सम्पन्न भएको निर्वाचन आयोगले जनाएको छ। आयोगका सहायक प्रवक्ता कुलबहादुर जिसीका अनुसार हालसम्म १ करोड ५० लाखभन्दा बढी मतपत्र छापिइसकेको छ।

डोल्पा, मुगु, जुम्ला, कालीकोट, हुम्ला, जाजरकोट, दैलेख, रुकुम (पश्चिम), सल्यान, सुर्खेत, बाजुरा, अछाम, बझाङ, डोटी, डडेल्धुरा, दार्चुला, बैतडी, कैलाली, कञ्चनपुर, पाँचथर, इलाम, तेह्रथुम, भोजपुर, ओखलढुङ्गा, सुनसरी, ताप्लेजुङ, सङ्खुवासभा, सोलुखुम्बु र खोटाङसहित विभिन्न जिल्लाका मतपत्र छपाइ सकिएको हो। त्यस्तै धनकुटा, बागलुङ, गुल्मी, झापा, गोरखा, म्याग्दी, पर्वत, बर्दघाट सुस्ता पश्चिम (नवलपरासी), मोरङ, उदयपुर, मुस्ताङ, लमजुङ, तनहुँ, स्याङ्जा, बर्दिया, रुकुम पूर्व, दाङ, बाँके, नवलपरासी (बर्दघाट सुस्ता पूर्व), पाल्पा, अर्घाखाँची, प्यूठान, रुपन्देही र रोल्पाका मतपत्र पनि तयार भइसकेका छन्।

मङ्गलबारसम्म ४७ जिल्लाको मतपत्र छपाइ सकिएकोमा बुधबार थप ६ जिल्लाको मतपत्र छपाइ सम्पन्न भएको आयोगले जनाएको छ। छापिएका मतपत्र प्याकिङसमेत भइसकेको छ र हालसम्म १३ हजार ३ सय २१ बाकस प्याकिङ गरिएको छ। अहिले दैनिक करिब १ हजार बाकस प्याकिङ र १३ देखि १५ लाखसम्म मतपत्र छपाइ भइरहेको छ।

समानुपातिक निर्वाचन प्रणालीतर्फ २ करोड ८ लाख ३० हजार मतपत्र छापिइसकेका छन् भने पहिलो हुने निर्वाचित हुने प्रणालीअन्तर्गत २ करोड ३ लाख २३ हजार मतपत्र छाप्ने तयारी रहेको आयोगले जनाएको छ।

आईसीसी टी–२० विश्वकप क्रिकेटमा पाकिस्तान र न्युजिल्याण्डले लगातार दोश्रो जीत निकालेका छन् । हिजो बेलुका कोलम्बोमा भएको खेलमा पाकिस्तानले अमेरिकालाई ३२ रनले हराएको हो ।

पाकिस्तानले दिएको १ सय ९१ रनको लक्ष्य पछ्याएको अमेरिकाले ८ विकेट गुमाएर १ सय ५८ रन मात्रै बनाउन सक्यो । त्यसअघि टस हारेर ब्याटिङ गरेको पाकिस्तानले ९ विकेट गुमाएर १ सय ९० रन बनायो । पाकिस्तानले आफ्नो पहिलो खेलमा नेदरल्यान्ड्सलाई ३ विकेटले हराएको थियो ।

हिजो भएको अर्को खेलमा यूएईलाई १० विकेटले हराउँदै न्युजिल्यान्डले पनि लगातार दोश्रो जीत हासिल गरेको छ । न्युजिल्यान्डले आफ्नो पहिलो खेलमा अफगानिस्तानलाई ५ विकेटले हराएको थियो । त्यस्तै हिजोको पहिलो खेलमा नेदरल्यान्ड्सले नामिबियालाई ७ विकेटले हराएको छ ।

टी–२० विश्वकपमा आज पनि तीन वटा खेल हुँदैछन् । आजको पहिलो खेलमा अफगानिस्तान र दक्षिण अफ्रिका नेपाली समयअनुसार बिहान सवा ११ बजे अहमदावादमा खेल्दैछन् । दोश्रो खेलमा अस्ट्रेलिया र आयरल्यान्ड दिउँसो सवा ३ बजे कोलम्बोमा तथा आजको अन्तिम खेलमा इंग्ल्यान्ड र वेस्ट इन्डिजबीच बेलुका सवा ७ बजे वानखेडेमा खेल्दैछन् ।

नेपालले आफ्नो दोश्रो खेल भोलि इटालीसँग खेल्दैछ । खेल मुम्बईमा रहेको वानखेडे स्टेडियममा दिउँसो सवा ३ बजेपछि शुरू हुनेछ । नेपाल आफ्नो पहिलो खेलमा इंग्ल्यान्डसँग ४ रनले पराजित भएको थियो । यो प्रतियोगितामा सहभागी २० वटा टोलीलाई चार वटा समूहमा विभाजन गरिएको छ ।

हरेक समूहका शीर्ष दुई टोली ‘सुपर–एट’ मा पुग्नेछन् । ‘सुपर–एट’ मा चार–चार वटा टोली दुई समूहमा बाँडिनेछन् । समूहका शीर्ष दुई टोली सेमिफाइनलमा पुग्नेछन् । १०औँ संस्करणको टी–२० विश्वकपको फाइनल खेल आउँदो मार्च ८ तारिख अर्थात् फागनु २४ गते हुनेछ ।