आईसीसी टी–२० विश्वकपअन्तर्गत नेपालले आज आफ्नो दोस्रो खेलमा इटलीसँग प्रतिस्पर्धा गर्दैछ। मुम्बईस्थित वानखेड़े रंगशालामा हुने खेल दिउँसो सवा ३ बजे सुरु हुनेछ।

पहिलो खेलमा इंग्ल्यान्डसँग ४ रनले पराजित भएको नेपाल आज जित निकाल्ने लक्ष्यका साथ मैदान उत्रिँदैछ। अघिल्लो विश्वकपमा दक्षिण अफ्रिकासँग १ रनले हारेको नेपाल यसपटक समूह चरण पार गर्ने लक्ष्यमा छ। समूह ‘सी’ मा नेपालसँगै वेस्ट इन्डिज, इंग्ल्यान्ड, स्कटल्यान्ड र इटली रहेका छन्।

विश्वकपमा पहिलोपटक सहभागी इटली पनि आफ्नो पहिलो खेलमा स्कटल्यान्डसँग ७३ रनले पराजित भएको थियो। त्यसैले दुवै टोलीका लागि आजको खेल महत्वपूर्ण बनेको छ।

रोहितकुमार पौडेलको कप्तानीमा रहेको नेपाली टोलीमा दीपेन्द्रसिंह ऐरी, सोमपाल कामी, करण केसी, सन्दीप लामिछाने, कुशल भुर्तेललगायत खेलाडी छन्। नेपालले समूह चरणका बाँकी खेलमा फागुन ३ गते वेस्ट इन्डिज र फागुन ५ गते स्कटल्यान्डसँग खेल्ने तालिका छ।

आजै बिहान सवा ११ बजे श्रीलंका र ओमान तथा बेलुकी सवा ७ बजे भारत र नामिबियाबीच प्रतिस्पर्धा हुनेछ।

इंग्ल्यान्डसँगको पहिलो खेलपछि आत्मविश्वास बढाएको नेपालले आईसीसी टी–२० विश्वकप २०२६ अन्तर्गत समूह चरणको दोस्रो खेलमा बिहीबार इटलीसँग प्रतिस्पर्धा गर्दैछ। दुवै टोली पहिलो खेलमा पराजित भएकाले पहिलो जितको खोजीमा छन्, जसले सुपर–८ पुग्ने सम्भावनालाई जीवित राख्नेछ।

नेपाल र इटलीबीच १३ वर्षपछि भेट हुन लागेको हो। सन् २०१३ मा ५० ओभरको प्रतियोगितामा नेपालले इटलीलाई हराएको थियो भने यो दुई टोलीबीचको पहिलो टी–२० अन्तर्राष्ट्रिय खेल हुनेछ। साथै नेपाल १२ वर्षपछि विश्वकपमा जित निकाल्ने लक्ष्यसहित मैदान उत्रिँदैछ।

कप्तान रोहित पौडेलले इटलीलाई हल्का रूपमा नलिने बताउँदै टोलीको मनोबल उच्च रहेको बताएका छन्। अनुभवी खेलाडीहरू रहेको इटली पनि नेपालविरुद्ध कडा चुनौती दिने तयारीमा छ।

बुधबार नेपाल स्टक एक्स्चेन्ज (नेप्से) परिसूचक लगभग स्थिर रहेको छ। कारोबारको सुरुवातमा केही बढेको बजार अन्त्यमा ०.०४ अंकले घट्दै २६६२.१४ बाट २६६२.१० बिन्दुमा पुगेको हो।

यसअघि आइतबार १०.२४ अंक, सोमबार २६.०५ अंक र मंगलबार १०.२५ अंकले घटेको नेप्से बुधबार भने झिनो गिरावटमै सीमित भयो। सूचक स्थिरजस्तै रहे पनि कारोबार रकममा भने सामान्य वृद्धि देखिएको छ।

बुधबार १३३ कम्पनीको सेयर मूल्य घटेको छ भने ११३ कम्पनीको बढेको छ। १३ कम्पनीको सेयर मूल्यमा कुनै परिवर्तन देखिएन। धेरै कम्पनीको मूल्य घटेकै कारण समग्र सूचकमा सुधार आउन सकेन।

समूहगत सूचकमध्ये वित्त ६.३५, होटल ४७.०७, जीवन बीमा २९.३१, उत्पादनमूलक ४२.५५, लघुवित्त ३.३३, सामूहिक लगानी कोष ०.०७, अन्य ५.७६ र व्यापार समूह ८.७७ अंकले घटेका छन्। यद्यपि बैंकिङ १.४९, विकास बैंक १०.१२, जलविद्युत् १६.७५, लगानी ०.०७ र निर्जीवन बीमा ९.६५ अंकले बढेका छन्।

बुधबार ३२९ कम्पनीका ८२ हजार ४५० कारोबारमार्फत २ करोड २२ लाख ८२ हजार ५० कित्ता सेयर ८ अर्ब ६९ करोड रुपैयाँमा खरिद–बिक्री भएको छ। यो रकम मंगलबारको तुलनामा बढी हो। मंगलबार ३२४ कम्पनीका ८९ हजार ८३६ कारोबारबाट २ करोड १७ लाख १५ हजार ८६८ कित्ता सेयर ८ अर्ब ६१ करोड रुपैयाँमा कारोबार भएको थियो।