आईसीसी टी–२० विश्वकप क्रिकेटमा अफगानिस्तानले संयुक्त अरब इमिरेट्स (यूएई) लाई ५ विकेटले हराएको छ ।

भारतको दिल्लीमा रहेको अरुण जेटली स्टेडियममा यूएईले दिएको १ सय ६१ रनको लक्ष्य अफगानिस्तानले १९ ओभर २ बलमा ५ विकेट गुमाएर भेटायो । अफगानिस्तानका इब्राहिम जद्रानले ५३, अज्मतुल्लाह ओमरजाईले नटआउट ४० रन बनाए । यूएईका जुनैद सिद्दिकी र मुहम्मद अरफानले २/२ विकेट लिए ।

यसअघि टस हारेर ब्याटिङ गरेको यूएईले २० ओभरमा ९ विकेट गुमाएर १ सय ६० रन बनायो । यूएईका सोहेब खानले ६८ रन बनाए । अफगानिस्तानका अज्मतुल्लाह ओमरजाईले ४ विकेट लिए ।

योसँगै अफगानिस्तानले प्रतियोगितामा पहिलो जीत हात पारेको छ । अफगानिस्तान ३ खेलमा २ अङ्कसहित समूह ‘डी’ को तेस्रो स्थानमा छ । यूएई ३ खेलमा २ अङ्कसहित नेट रन रेटका आधारमा चौथो स्थानमा छ ।

टी–२० विश्वकपमा अहिले इङ्ग्ल्यान्ड र इटालीबीचको खेल चलिरहेको छ । यस्तै आज बेलुकी सवा ७ बजे अस्ट्रेलिया र श्रीलङ्का खेल्दैछन् ।

पहिलो खेलमा समूह ‘डी’ का अफगानिस्तान र संयुक्त अरब इमिरेट्स (यूएई) आमनेसामने हुनेछन्। दिल्लीमा हुने खेल बिहान ११:१५ बजे सुरु हुनेछ।यस प्रतियोगितामा अफगानिस्तान जितविहीन रहँदा संयुक्त अरब इमिरेट्सले दुई अंक जोडेको छ। समूह ‘डी’मा अफगानिस्तान अंकबिहीन अवस्थामा चौथो स्थानमा छ भने यूएई दुई अंकसहित तेस्रो स्थानमा रहेको छ।दोस्रो खेलमा समूह ‘सी’का इंग्ल्यान्ड र इटालीबीच प्रतिस्पर्धा हुनेछ। कोलकाताको इडन गार्डेनमा दिउँसो ३:१५ बजे सुरु हुने यो खेल इंग्ल्यान्डका लागि समूह चरणको अन्तिम खेल हुनेछ। इंग्ल्यान्डले दुई खेलबाट चार अंक जोडिसकेको छ भने इटालीको खातामा दुई अंक छ। सुपर आठमा स्थान सुरक्षित गर्न इंग्ल्यान्ड जितको लक्ष्यमा हुनेछ। पहिलो पटक विश्वकप खेलेको इटाली भने दोस्रो जितको खोजीमा मैदान उत्रनेछ।

तेस्रो खेलमा साँझ ७:१५ बजे अस्ट्रेलिया र श्रीलंकाबीच प्रतिस्पर्धा हुनेछ। खेल श्रीलंकामा आयोजना हुनेछ।

दुई खेलमा लगातार जित निकाल्दै चार अंकसहित शीर्ष स्थानमा रहेको श्रीलंका तेस्रो जितको खोजीमा छ। अस्ट्रेलियाले भने एक जित र एक हार व्यहोरेको छ। पहिलो खेलमा आयरल्यान्डलाई ६७ रनले हराएको अस्ट्रेलिया दोस्रो खेलमा जिम्बाबेसँग २३ रनले पराजित भएको थियो।

फागुन २१ गते हुने प्रतिनिधिसभा सदस्य निर्वाचनका लागि आजदेखि औपचारिक रूपमा प्रचार–प्रसार गर्न पाइने भएको छ ।

मतदान हुनुभन्दा १५ दिन अघिदेखि मात्रै जुलुस, आमसभा, कोणसभा आयोजना गर्न तथा सञ्चारमाध्यममा निर्वाचनसम्बन्धी सामग्री प्रकाशन वा प्रसारण गर्न पाउने कानुनी व्यवस्था छ । सोही प्रावधानअनुसार आज फागुन ४ गतेदेखि फागुन १८ गते राति १२ बजेसम्म राजनीतिक दल र उम्मेदवारहरूले प्रचार–प्रसार गर्न सक्नेछन् ।

निर्वाचन आयोगका अनुसार आचारसंहिताको पूर्ण पालना गर्दै दल, उम्मेदवार तथा सरोकारवाला सबैले मतदातासमक्ष औपचारिक रूपमा मत माग्न पाउनेछन् ।

दल र उम्मेदवारले तोकिएको मापदण्डअनुसार पत्रपत्रिका र अनलाइन सञ्चारमाध्यममार्फत विज्ञापन गर्न सक्नेछन् । आमसभा वा कोणसभा गर्दा मञ्च व्यवस्थापन लगायत भएको खर्चको विवरण भने सम्बन्धित उम्मेदवारले आफैं वा प्रतिनिधिमार्फत निर्वाचन कार्यालयमा बुझाउनुपर्नेछ ।

आयोगले आचारसंहिता कार्यान्वयन तथा अनुगमनका लागि विभिन्न संयन्त्र परिचालन गरिसकेको जनाएको छ । उल्लङ्घनका घटनामा स्पष्टीकरण सोध्ने र आवश्यक परे कानुनी कारबाही अघि बढाइने आयोगले स्पष्ट पारेको छ ।

आचारसंहिता राजनीतिक दल तथा सरोकारवालासँग व्यापक छलफलपछि तयार गरिएको भन्दै आयोगले यसको पूर्ण परिपालनामा जोड दिएको छ ।

कार्यवाहक प्रमुख निर्वाचन आयुक्त रामप्रसाद भण्डारीले आचारसंहिता उल्लङ्घनमा शून्य सहनशीलता नीति अपनाइने बताएका छन् । उल्लङ्घनको प्रकृति र प्रमाणका आधारमा सचेत गराउनेदेखि जरिवाना वा उम्मेदवारी खारेजसम्मको कानुनी व्यवस्था रहेको उनले उल्लेख गरेका छन् ।

निर्वाचनको समयमा कुनै दल वा उम्मेदवारविरुद्ध निर्वाचनलाई प्रभावित पार्ने उद्देश्यले सामाजिक सञ्जाल वा अनलाइन माध्यमबाट मिथ्या सूचना, दुष्प्रचार तथा द्वेषपूर्ण अभिव्यक्ति फैलाउन नपाइने आयोगले चेतावनी दिएको छ ।