नेपाली कांग्रेसले आउँदो चुनावका लागि प्रतिज्ञापत्र सार्वजनिक गरेको छ । आज जनकपुरमा आयोजित प्रतिज्ञासभामा सभापति गगनकुमार थापाले पार्टीको घोषणापत्रका रूपमा रहेको प्रतिज्ञापत्रको संक्षिप्त अंश सार्वजनिक गर्नुभएको हो ।

कांग्रेसले चुनावको घोषणापत्रलाई प्रतिज्ञापत्र नाम दिएको हो । प्रतिज्ञापत्रको विस्तृत अंश भने भोलि राष्ट्रिय सभागृहमा हुने कार्यक्रममा सार्वजनिक गर्ने नेपाली कांग्रेसले जनाएको छ । भोलि हुने कार्यक्रममा सभापति थापाले घोषणापत्रमाथि उठेका प्रश्नहरूको जवाफ दिने कार्यक्रम पनि रहेको छ ।

प्रतिज्ञापत्रमा कांग्रेसले युवाहरूका लागि स्वदेशमै मर्यादित र आकर्षक अवसर सिर्जना गर्ने, विदेशमा रहेका नेपालीहरूको ज्ञान, सीप र पूँजीलाई मातृभूमिको पुनर्जागरणमा जोड्ने तथा लगानी र रोजगारी सिर्जनामा राज्यले साथ दिने वाचा गरेको छ ।

यस्तै किसान र कृषि क्षेत्रमा सिँचाइ र मलको अभाव अन्त्य गर्ने, बीमा र भन्सार नीतिमा सुधार गर्ने तथा नेपाली कृषि उत्पादनलाई विश्व बजारमा ब्रान्ड बनाउने प्रतिबद्धता व्यक्त गरेकोे छ ।

स्वास्थ्य क्षेत्रमा उपचारलाई नागरिकको मौलिक अधिकारका रूपमा मान्यता दिँदै विकसित देशको स्तरको स्वास्थ्य बीमा प्रणाली लागू गर्ने कांग्रेसको प्रतिज्ञापत्रमा उल्लेख छ ।

यस्तै प्राथमिकदेखि विश्वविद्यालयसम्मको शिक्षालाई प्रविधिसँग जोड्ने वाचा पनि कांग्रेसको छ । सुशासनका सन्दर्भमा दलीयकरणको अन्त्य गर्ने, ’डिजिटल नेपाल’ को अवधारणा साकार पार्दै भ्रष्टाचार र ढिलासुस्तीको जरैबाट अन्त्य गर्ने र नागरिकले घरमै बसेर सरकारी सेवा पाउने वातावरण बनाउने कांग्रेसको प्रतिबद्धता छ ।

परराष्ट्र नीतिका सम्बन्धमा नेपाललाई विश्व समुदायमा एक सार्वभौम, शान्त र स्वाभिमानी राष्ट्रका रूपमा स्थापित गर्ने तथा छिमेकी र मित्रराष्ट्रहरूसँगको सम्बन्ध समानता र आपसी सम्मानमा आधारित राख्ने प्रतिज्ञा गरिएको छ ।

संयुक्त अरब इमिरेट्स (यूएई) लाई हराउँदै दक्षिण अफ्रिका राष्ट्रिय क्रिकेट टोलीले आईसीसी टी–२० विश्वकपमा लगातार चौथो जित हासिल गरेको छ।

दिल्लीस्थित अरुण जेटली रंगशालामा आज भएको समूह ‘डी’ को खेलमा दक्षिण अफ्रिकाले संयुक्त अरब इमिरेट्स राष्ट्रिय क्रिकेट टोलीलाई ६ विकेटले पराजित गरेको हो।

यूएईले दिएको १२३ रनको लक्ष्य दक्षिण अफ्रिकाले १३ ओभर २ बलमा ४ विकेट गुमाएर भेटायो। दक्षिण अफ्रिकाका डेवाल्ड ब्रेभिसले ३६ रन बनाए। यूएईका हेदर अली, मुहम्मद जावदुल्लाह, मोहम्मद अरफान र मोहम्मद फारुकले समान १/१ विकेट लिए।

यसअघि टस हारेर ब्याटिङ गरेको यूएईले २० ओभरमा ६ विकेट गुमाउँदै १२२ रन बनाएको थियो। यूएईका आलिशान शरफुले ४५ रन बनाए भने दक्षिण अफ्रिकाका कोर्बिन बोशले ३ विकेट लिए।

यस समूहबाट दक्षिण अफ्रिका र न्युजिल्यान्ड राष्ट्रिय क्रिकेट टोली ‘सुपर–एट’ मा पुगिसकेका छन्।

प्रतियोगिताअन्तर्गत आज दिउँसो समूह ‘ए’ का पाकिस्तान राष्ट्रिय क्रिकेट टोली र नामिबिया राष्ट्रिय क्रिकेट टोलीबीच हुने खेलले ‘सुपर–एट’ मा पुग्ने अन्तिम टोलीको टुंगो लगाउनेछ। यस समूहबाट भारत राष्ट्रिय क्रिकेट टोली यसअघि नै अघिल्लो चरणमा पुगेको छ।

यस्तै समूह ‘बी’ बाट श्रीलङ्का राष्ट्रिय क्रिकेट टोली र जिम्बाब्वे राष्ट्रिय क्रिकेट टोली तथा समूह ‘सी’ बाट वेस्ट इन्डिज राष्ट्रिय क्रिकेट टोली र इङ्ग्ल्यान्ड राष्ट्रिय क्रिकेट टोली ‘सुपर–एट’ मा पुगिसकेका छन्।

आजै बेलुका भारत राष्ट्रिय क्रिकेट टोली र नेदरल्यान्ड्स राष्ट्रिय क्रिकेट टोलीबीच प्रतिस्पर्धा हुनेछ।

‘सुपर–एट’ का खेलहरू आउँदो शनिबारदेखि सुरु हुनेछन्। यस चरणमा दुई समूहमा चार–चार टोली रहनेछन् र प्रत्येक समूहका शीर्ष दुई टोली सेमिफाइनलमा पुग्नेछन्। १०औँ संस्करणको टी–२० विश्वकपको फाइनल खेल आउँदो मार्च ८ मा हुनेछ।

आईसीसी टी–२० अलराउन्डर वरीयतामा नेपाली राष्ट्रिय क्रिकेट टोलीका सदस्य दीपेन्द्रसिंह ऐरीले दुई स्थान सुधार गरेका छन् । अन्तर्राष्ट्रिय क्रिकेट काउन्सिल (आईसीसी) ले सार्वजनिक गरेको पछिल्लो वरीयतामा दीपेन्द्र दुई स्थान सुधार गर्दै चौथो स्थानमा उक्लिएका हुन् ।

भारत र श्रीलङ्का चलिरहेको टी–२० विश्वकपमा गरेको प्रदर्शनपछि दीपेन्द्रले वरीयतामा सुधार गरेका हुन् । उनले टी–२० विश्कपमा १६९ रन बनाउँदै २ विकेट लिएक ।

टी–२० अलराउन्डर वरीयतामा कुशल भुर्तेलले एक स्थान र रोहित पौडेलले दुई स्थान सुधार गरेका छन् । यो वरीयतामा पाकिस्तानका सइम अयुब शीर्ष, जिम्बावेका सिकन्दर राजा दोस्रो र भारतका हार्दिक पान्ड्या तेस्रो स्थानमा छन् ।

यस्तै दीपेन्द्र टी–२० ब्याटिङ वरीयतामा ११ स्थान सुधार गर्दै ६०औँ स्थानमा उक्लिएका छन् । यो वरीयतामा भारतका अभिषेक शर्मा शीर्ष, इङ्ग्ल्यान्डका फिल साल्ट दोस्रो र श्रीलङ्काका पथुम निसान्का तेस्रो स्थानमा छन् ।

यस्तै दीपेन्द्र टी–२० बलिङ वरीयतामा तीन स्थान सुधार गर्दै ६९औँ स्थानमा र सोमपाल कामी १७ स्थान सुधार गर्दै १००औँ स्थानमा उक्लिएका छन् । यो वरीयतामा भारतका वरुण चक्रवर्ती शीर्ष, अफगानिस्तानका राशिद खान दोस्रो र पाकिस्तानका अब्रार अहमद तेस्रो स्थानमा छन् ।