स्पेनिस ला लिगा फुटबलमा बार्सिलोनाले लगातार दोस्रो तथा समग्रमा २९औँ उपाधि जितेको छ ।

क्याम्प नोउमा आइतबार राति सम्पन्न खेलमा बार्सिलोनाले रियल मड्रिडमाथि २–० को सहज जित हात हात पार्दै उपाधि रक्षा गरेको हो ।

उपाधि सुनिश्चित गर्न बार्सिलोनालाई मात्र एक अंक आवश्यक रहे पनि टोलीले सुरुदेखि नै आक्रामक खेल प्रस्तुत गर्दै रियलमाथि पूर्ण नियन्त्रण जमाएको थियो।

पहिलो २० मिनेटमै दुई गोल गर्दै बार्सिलोनाले खेल पूर्ण रूपमा आफ्नो पक्षमा पारेको थियो।

पहिलो गोल मार्कस राशफोर्डले शानदार फ्रिकिकमार्फत गरे। उनले प्रहार गरेको बल रियलका गोलरक्षक थिबाउ कोर्टुवालाई कुनै मौका नै नदिई जाली चुमाएको थियो ।त्यसको केही समयपछि फेरान टोरेसले डानी ओल्मोको आकर्षक फ्लिक पासलाई सदुपयोग गर्दै दोस्रो गोल थपे ।

पहिलो हाफमै राशफोर्डले अर्को गोल गर्ने राम्रो अवसर बनाएका थिए तर कोर्टुवाले उत्कृष्ट बचाउ गरे।

रियल मड्रिड भने पूरै खेलभर दबाबमा देखियो। टोलीले प्रभावकारी पुनरागमन गर्न सकेन। दोस्रो हाफमा ज्युड बेलिङ्घ्यामले गोल गरे पनि अफसाइडका कारण त्यसलाई मान्यता दिइएन। त्यसबाहेक रियलले खासै अवसर सिर्जना गर्न सकेन।

यो जितसँगै बार्सिलोनाले रियलमाथि १४ अंकको अग्रता बनाउँदै ला लिगा उपाधि फेरि आफ्नो नाममा सुरक्षित गरेको छ ।

रियलमाथिको यो जितले बार्सिलोनालाई यो सिजन ला लिगाको च्याम्पियन पनि बनाएको छ।

२३औँ संस्करणको फिफा पुरुष विश्वकप आउँदो जुन ११ देखि जुलाई १९ सम्म आयोजना हुँदैछ।

तीन राष्ट्रले आयोजना गर्न लागेको उक्त विश्वकपमा अहिलेसम्मकै सबैभन्दा ठूलो फिफा विश्वकप हुनेछ। क्यानडा, मेक्सिको र संयुक्त राज्य अमेरिकामा खेलहरू हुन्छ। ३९ दिने प्रतियोगितामा ४८ राष्ट्रहरूले सहभागिता जनाउँदै छन्।

३२ वर्षपछि उत्तर अमेरिकाले विश्वकप आयोजना गर्न लागेको हो। तीन देशको १६ रगंशालमा १०४ खेलहरू आयोजना हुने छन्।

फिफा विश्वकपको उद्घाटन खेल मेक्सिककाे सिटीमा रहेको एस्टाडियो एज्टेका रगंशालमा हुनेछ भने विश्वकपको फाइनल खेल अमेरिकाको न्यूयोर्कमा रहेको मेटलाइफ स्टेडियममा हुनेछ।

यस्तो छ समूह

यस पटक कुल ४८ राष्ट्रले विश्वकपमा सहभागिता जनाइरहँदा टोलीहरूलाई १२ समूहमा विभाजन गरिएको छ, जहाँ हरेक समूहमा कुल ४ टोली रहेका छन्। समूह ‘ए’मा आयोजक मेक्सिकोसहित दक्षिण अफ्रिका, दक्षिण कोरिया र चेक रिपब्लिका रहेका छन्।

त्यस्तै, समूह ‘बी’मा आयोजक क्यानडा, बोस्निया हर्जगोभिना, कतार र स्विट्जरल्याण्ड रहेका छन्। समूह ‘सी’मा ब्राजिल, मोरक्को, हैटी र स्कटल्याण्ड रहँदा समूह ‘डी’मा आयोजक अमेरिका, पाराग्वे, अष्ट्रेलिया र टर्की रहेका छन्।

त्यस्तै, विश्वकप खेल्ने समूह ‘इ’मा जर्मनी, कुराकाओ, आइभरी कोस्ट र इक्वेडर रहेका छन्। समूह ‘एफ’मा नेदरल्याण्ड्स, जापान, स्वीडेन, र ट्युनिसिया रहेका छन् भने समूह ‘जी’मा बेल्जियम, इजिप्ट, इरान, र न्यूजील्याण्ड छन्।

त्यस्तै, समूह ‘आइ’मा साविक उपविजेता फ्रान्स, सेनेगल, इराक र नर्वे छन्। समूह ‘जे’मा साविक विजेता अर्जेन्टिना, अल्जेरिया, अस्ट्रिया र जोर्डन छन्। समूह ‘के’मा पोर्चुगल, कंगो, उज्वेकिस्तान र कोलम्बिया रहेका छन् भने समूह ‘एल’मा इङ्गल्याण्ड, क्रोएसिया, घाना र पानामा रहेका छन्।

फिफा विश्वकप २०२६ को फर्म्याट कस्तो छ?

फिफा विश्वकपमा एक समूह चरण र फाइनल अघि चार नकआउट राउन्डहरू हुने छन्। अघिल्ला संस्करणहरू भन्दा फरक नकआउटहरू राउन्ड अफ ३२ बाट सुरु हुने छ, त्यसपछि राउन्ड अफ १६, चार क्वार्टरफाइनल र दुई सेमिफाइनलहरू हुने छन्। जहाँ समूह चरणका खेलहरू जुन ११ जुन २७ सम्म हुनेछ। राउन्ड अफ ३२ का खेल जुन २८ देखि जुलाई ३ सम्म खेलिनेछ।

त्यस्तै, राउन्ड अफ १६ का खेलहरू जुलाई ४-७ जुलाईसम्म हुनेछ भने क्वार्टरफाइनलका खेलहरू जुलाई ९-११ जुलाईसम्म हुनेछ। त्यस्तै, फिफा विश्वकपको सेमिफाइनल जुलाई १४-१५ मा हुन्छ। त्यस्तै, तेस्रो टोलीका लागि खेल  जुलाई १८ मा हुनेछ भने यस वर्षको फिफा विश्वकपको फाइनल जुलाई १९ मा हुनेछ।

फिफा विश्वकपको साविक विजेता अर्जेन्टिना हाे।