क्युबाका पूर्वराष्ट्रपति राउल क्यास्ट्रोविरुद्ध अमेरिकामा पक्राउ पुर्जी जारी गरिएको छ। सन् १९९६ मा भएको विमान दुर्घटनासम्बन्धी घटनालाई आधार बनाएर अमेरिकी पक्षले उनीमाथि विभिन्न आपराधिक अभियोग दर्ता गरेको अन्तर्राष्ट्रिय सञ्चारमाध्यमहरूले जनाएका छन्।

अमेरिकी अभियोजन पक्षका अनुसार क्युबाली सैन्य कारबाहीका क्रममा उक्त वर्ष एउटा सानो विमान खसालिएको थियो, जसमा सवार चार जनाको मृत्यु भएको थियो। घटनामा मृत्यु हुनेमा कार्लोस कोस्टा, अर्मान्डो अलेजान्द्रे जुनियर, मारियो दे ला पेना तथा पाब्लो मोरल्स रहेका थिए।

उनीहरू क्युबाबाट अमेरिका पुगेका व्यक्तिहरू रहेको र मायामी केन्द्रित “ब्रदर्स टु रेस्क्यू” समूहसँग आबद्ध भएर क्युबाबाट पलायन हुने नागरिकलाई सहयोग गर्दै आएको बताइएको छ।

क्युबाली पक्षले भने विमानले पटक-पटक चेतावनी अवज्ञा गर्दै आफ्नो हवाई क्षेत्रमा प्रवेश गरेपछि सैन्य विमानमार्फत कारबाही गरिएको दाबी गर्दै आएको थियो।

घटनाका समयमा राउल क्यास्ट्रो रक्षा मन्त्रीको जिम्मेवारीमा रहेका थिए। बुधबार सार्वजनिक अभियोग पत्र अनुसार उनीमाथि अमेरिकी नागरिकको हत्या गर्ने षड्यन्त्र, चार वटा हत्या तथा विमान विनाशसँग सम्बन्धित दुई अभियोग लगाइएको जनाइएको छ।

अन्तर्राष्ट्रिय समाचार संस्था रोयटर्सका अनुसार अभियोग दर्तासँगै क्यास्ट्रोविरुद्ध पक्राउ आदेश पनि जारी गरिएको हो।

९४ वर्षीय क्यास्ट्रो फिडेल क्यास्ट्रोका भाइ हुन्। हालसम्म उनी क्युबा बाहिर गएको वा अमेरिकालाई सुपुर्दगी गरिने संकेत सार्वजनिक भएको छैन।

अमेरिकाले आफूमाथि आक्रमण गरे त्यसको जवाफ नयाँ तरिकाले दिने इरानले चेतावनी दिएको छ । अन्तर्राष्ट्रिय सञ्चारमाध्यमहरूका अनुसार कुनै पनि अन्य देशको लहडमा आएर आफूमाथि आक्रमण गरे नयाँ हतियार र रणनीति प्रयोग गर्ने इरानको चेतावनी छ ।

इरानी सेनाका प्रवक्ता मोहम्मद अकरमिनियाले इजरायली जालमा फसेर नयाँ कारबाही हुन्छ भने त्यसको जवाफ नयाँ उपकरण र नयाँ तरिकाहरूका साथ चेतावनी दिनुभएको छ ।

केही दिनअघि अमेरिकी राष्ट्रपति डोनाल्ड ट्रम्पले आफू शान्ति सम्झौताको सम्भावनालाई जीवित राख्न चाहेको भन्दै इरानमाथि तत्काल आक्रमण नगर्ने बताउनु भएको थियो । ट्रम्पको यो अभिव्यक्तिपछि तनाव कम हुने अपेक्षा गरिएको थियो । तर, इरानको यो नयाँ चेतावनीले परिस्थितिलाई पुनः गम्भीर बनाएको छ ।

इरानी सेनाले आफ्नो वक्तव्यमा कुनै पनि सम्भावित सैन्य कारबाहीको जवाफ पहिलेभन्दा अझ व्यापक रूपमा दिन सकिने स्पष्ट सङ्केत दिएको छ । यद्यपि, इरानले ती ‘नयाँ मोर्चा’ वा ‘नयाँ सैन्य रणनीति’ कस्तो स्वरूपका हुनेछन् भन्ने विषयमा थप विवरण सार्वजनिक गरेको छैन ।

यो वक्तव्य सार्वजनिक भएसँगै क्षेत्रीय सुरक्षा अवस्था तथा सम्भावित सैन्य सङ्घर्षलाई लिएर चिन्ता फेरि बढेको समाचारमा उल्लेख छ ।