विराटचोकः कोरोना भाइरस (कोभिड १९) रोकथामका लागि सरकार चैत्र ११ गतेबाट बन्दाबन्दी अर्थात् (लकडाउन) गरेको छ । लकडाउनका कारण सबै नागरिक घर भित्र बस्दा शहरमा दैनिक ज्यालादारी गरेर जीविका धान्नेहरु यतिबेला कसरी आफ्नो भोक मेटिरहेका होलान् ? कसरी बालबच्चाको भोक शान्त गरिरहेका होलान् ? कसरी दाल–चामल, ग्याँस आदिको जोहो गरिरहेका होलान् ? औषधि–उपचार कसरी गरिरहेका होलान् ? एकपटक सोचौँ त !
यहि कुरालाई मध्यनजर गर्दै केही हद सम्म राहत पुर्याउने उद्देश्यले सुन्दरहरैँचा नगरपालिकाले दैनिक ज्यालादारीमा काम गर्ने अति विपन्न, अपाङ्ग, एकल परिवालाई राहत सङ्कलन तथा वितरणलाई तिव्रता दिएको छ । नगरपालिकाका नगरप्रमुख शिवप्रसाद ढकालको संयोजकत्वमा नगर स्तरिय समिति निमार्ण गरेको छ । एकद्वार प्रणालीबाट वितरण तथा संकलन कार्य अहिले भइरहेको छ ।

यसै सन्दर्भमा बुधबार वडा नम्बर १ मा राहत वितरण गरीएको छ । वडा अध्यक्ष विनोदबहादुर बस्नेत लगायत वडा स्तरीय राहत वितरण समितिले घरघरमा गई यस अघि नै डाटा सङ्कलन गरेको थियो । वितरण प्रणालीलाई व्यवस्थित गर्न हिजो नै टोल अनुसारको समय सीमा निर्धारण गरी घर-घरमा कुपन वितरण गरिएको थियो । । सो कुपनका आधारमा बुधबार बिहान ८ बजे बाट वडा कार्यालयमा आएका परिवारलाई बितरण गरिएको हो । वडामा जम्मा ४ सय परिवारलाई राहत वितरण गरिएको छ ।

वडा नम्बर १ का अति विपन्न प्रति परिवार चामल २० किलो, दाल १ किलो र नुन १ किलो वितरण गरिएको वडा अध्यक्ष बस्नेतले बताए खाद्यान्न वितरण गर्दा भाइरस सक्रमण हुन सक्ने भएकाले गेटमा साबुनपानीले हात धुने र सेनिटाइजर लगाई दुरीकाय गरी वितरण गरिएको थियो । वितरण सहज बनाउन नेपाल प्रहरी तथा सशस्त्र प्रहरीले सुरक्षाको प्रवन्ध मिलाएको थियो । अध्यक्ष बस्नेतले यहाँ कोही पनि गलामा सिक्री र हातमा ‍औँठी लगाउनेलाई राहत नदिइ अत्यन्त नाजुक र दयनीय अबस्था भएका नागरिकहरु छनौट गरी राहत वितरण गरेको बताउँदै यसमा सहयोग पुर्याउने सम्पूर्णलाई धन्यवाद समेत ज्ञापन गरे ।