विराटचोकः सरकारले लकडाउन गरेपछि धेरै थरीका मानिसलाई दैनिकी चलाउन गाह्रो परेको छ । देशमा तीन तहको सरकार छ । जनप्रतिनिधिलाई अहिले विपन्न वर्गलाई राहत दिनु र शंकास्पद व्यक्तिको खोजी गरेर परीक्षण गर्नु बाध्यता बनेको छ ।

तर राहत नपाएर एक छाक खानाको भरमा दिन काट्दै आएका साधु सुन्दरहरैंचामा भेटिएका छन् । सुन्दरहरैंचा–९ मा रहेको कालीमन्दिरमा बस्दै आएका ती साधुलाई पानी पर्याे भने काटुन भिजाउला र आफूले दाउराको रुपमा प्रयोग गर्न नपाउँला भन्ने पीर छ । उनी बस्दै आएको मन्दिरको एक छेउमा एउटा चुलो छ । चुलोको छेउमा टुक्रा पारेर राखिएका काटुन छन् । त्यही काटुन बालेर उनी दैनिक एक छाक खाना कराइमा पकाएर खान्छन् ।

‘भोलेबाबाको कृपाले आजसम्म पकाएर खाएको छु’, उनी भन्छन्, ‘के गर्ने, पानी परेको दिन आगो बल्दैन । खुला आकाशमा छु । जे भए नि सबै सहनु परो । रुन मन लाग्छ । मर्न मन लाग्छ तर काल नआई आफैँ चाहिँ मर्दिनँ ।’

कसैको ध्यान आफूमाथि नपरेको उनले गुनासो गरे । ‘कसैले दियो भने ल्याउँला र खाउँला नदिएपछि बाटैबाट हिनौँला, उनले भने, ‘मैना दिन बित्यो माग्न जान सबै ढोका बन्द छ । पूजा गर्न पनि मान्छे आउँदैन । २ छाक पकाएर खाउँ भने भएको चामल पनि सकिन्छ ।’

उनी बसेको स्थानका नजिकैका केही व्यक्तिले ५ सय रुपैयाँ दिएको र तरकारी खाएको तर अब पैसा पनि सकिएको र तरकारी पनि महँगो भएको उनले सुनाए । ‘कहाँबाट, कसरी खाने’, उनी भन्छन् ‘मरिन्छ होला ।’

लकडाउन शुरु हुँदा जम्मा उनीसँग ७\८ किलो चामल थियो । त्यो चामललाई एकै छाकमात्र खाएर आजको दिनसम्म जोगाएको उनले सुनाए ।

‘गाउँमा चामल दियो, मलाई दिएन,’ उनी भन्छन्, ‘सरकारले पनि यसो मन्दिरमा बस्ने साधुसन्तलाई पनि सोच्नु पर्दैन ?’

यो रोग चीन र इण्डियाबाट आएको भन्ने आफूले सुनेको उनले बताए । उनले राखेको काटुनमा एक दिन आगो लागेको र निभाएको पनि उनले बताए । साधु भएर हिँडेको २५÷२६ वर्षसम्म यस्तो दुःख नपाएको उनले सुनाए ।