धरानः धरानस्थित बीपी कोइराला स्वास्थ्य विज्ञान प्रतिष्ठान परिसरमा रहेको दिल्ली पब्लिक स्कुलमा बम बिष्फोट गराउने फरार अभियुक्तहरूलाई इलाका प्रहरी कार्यालय धरानले पक्राउ गरेको छ ।

गत भदौ २० गते विप्लव समूहले स्कुलको गेटमा बम विष्फोट गराएको थियो । बम विष्फोटको आरोपमा सुनसरी जिल्ला अदालतबाट पक्राउ अनुमतिपत्र लिई ३ जनालाई प्रहरीले पक्राउ गरेको हो । पक्राउ परेकाहरूलाई प्रहरीले शङ्का गरी जिल्ला अदालतबाट पक्राउ पूर्जीका लागि अनुरोध गरेको थियो ।

फरार अभियुक्तहरूलाई कात्तिक २६ गते १ नम्बर प्रदेश प्रहरी कार्यालय, क्षेत्रीय अनुसन्धान समूह विराटनगर र इलाका प्रहरी कार्यालय धरानको टोलीले पक्राउ गरेको इलाका प्रहरी कार्यालय धरानका प्रमुख ढुण्डीराज न्यौपानेले बताए । खोजतलासका क्रममा सुनसरीका विभिन्न स्थानबाट विष्फोटक पदार्थसहित उनीहरूलाई पक्राउ गरिएको बताइएको छ ।

प्रहरीका अनुसार दुहबी नगरपालिका वडा नम्बर ८ बस्ने विप्लव समूह सुनसरीका जिल्ला सेक्रेटरी मोहन बस्नेतलाई इटहरी उपमहानगरपालिका वडा नम्बर ८ बाट पक्राउ गरिएको छ । त्यसैगरी भोजपुरको ट्याम्के मैयुम गाउँपालिका २ घर भई हाल सुनसरीको धरान उपमहानगरपालिका ११ बस्ने विप्लवको युवा समूहका सुनसरी जिल्ला संयोजक सागर राई र धरान उपमहानगरपालिका ११ बस्ने नेकपा माओवादी विप्लव समूहका जिल्ला सदस्य क्षितिज भन्ने सुरेश राईलाई सुनसरीको रामधुनी ६ बाट पक्राउ गरिएको छ । उनीहरूको साथबाट मोबाइल, सहयोग रसिद र को ४ प ६५९ नम्बरको मोटरसाइकलसमेत बरामद गरेको प्रहरीले जनाएको छ ।

इलाका प्रहरी कार्यालय धरानले तिनै जनालाई बम विष्फोटन मुद्दामा अदालतबाट म्याद थप गरी आवश्यक अनुसन्धान गरिरहेको न्यौपानेले बताए ।