विराटचोकः नेपाल अङ्ग्रेजी भाषा शिक्षकहरुको सङ्गठन नेपाल इङ्लिस ल्याङ्ग्वेज टिचर्स एसोसिएसन (नेल्टा) प्रदेश न.ं १ ले भर्चुअल सम्मेलन सम्पन्न गरेको छ ।

लकडाउनको समयको उच्चतम उपयोग गर्दै २ सय ५० भन्दा बढी अङ्ग्रेजी भाषा शिक्षकहरुको समूहमा भर्चुअल माध्यमबाट २ दिने सम्मेलन भएको हो । देश र विदेशका प्रबुद्ध समूहको जमघट गराउन भएको सम्मेलनलाई लकडाउनको समयमा नेपालमा गरिएका बहसहरुमा सबैभन्दा ठूलो ठानिएको छ ।

सम्मेलनमा विश्व महामारीको समयमा र यसपछिको अङ्ग्रेजी भाषा शिक्षण कसरी विकसित हँुदैछ ? महामारीको असर भाषा र भाषिक विकासमा कत्तिको परेको छ ? बालबालिका तथा शिक्षकहरुमा महामारीका के कस्ता मानसिक असरहरु हुँदैछन् ? भन्ने विषयमा बौद्धिक बहस चलाउने काम भएको छ ।

पहिलो दिन मोरङ बेलबारी घर भई अष्ट्रेलियाको तास्मानिया विश्वविद्यालयमा प्राध्यापन गर्ने डा. सुवास कोइरालाले अनुसन्धानात्मक अध्ययनहरुले बालबालिकामा भविष्यसम्म पर्न सक्ने मानसिक प्रभाव र त्यसलाई कम गर्न सकिने उपायहरुका बारेमा प्रस्तुति दिएका थिए । नेपाल अङ्ग्रेजी भाषा शिक्षकहरुको सङ्गठनका पूर्व केन्द्रीय अध्यक्ष हेमन्तराज दाहालले पाठ्यक्रम विकासका लागि आवश्यक रणनीतिक सवाललाई प्रस्तुत गरेका थिए । महामारीबाट भाषा विकासमा परेको प्रभाव तथा महामारीबाट भाषिक पदावलीमा आएका परिवर्तनका सन्दर्भमा नेल्टा प्रदेश नं. १ का सभापति एन.पी. भण्डारीले प्रतिविम्बन गरेका थिए ।

त्यसैगरी नेल्टा केन्द्रीय कमिटीका सदस्य केशव भट्टराईले महामारी र बन्दाबन्दीमा अनलाइन शिक्षण तत्कालीन विकल्प मान्न र प्रयोग गर्न सकिने प्रतिविम्बन गरेका थिए।

दोस्रो दिन अमेरिकी दूतावास अङ्ग्रेजी भाषा क्षेत्रीय कार्यालय काठमाडौंका विशेषज्ञ विश्वराज गौतमले अनलाइनका स्रोतहरु प्रस्तुत गरेका थिए । नेल्टा प्रदेश कमिटीका सदस्य गुणराज नेपालले हालै सम्पन्न अन्तर्राष्ट्रिय नेल्टा टेसल २०१९ मा प्रस्तुत अङ्ग्रेजी भाषा शिक्षणमा इकोलोजीको सन्देशलाई प्रस्तुत गरेका थिए ।

त्यसपछि  जिल्ला शाखाका प्रमुखहरु राजेन्द्र बराल (इलाम), धर्मेन्द्र भट्टराई (झापा), रविन बराल (सुनसरी) र पदम बिक (उदयपुर) ले प्रतिविम्बन गरेका थिए । कार्यक्रममा काठमाडौं विश्वविद्यालयका प्राध्यापक डा. लक्ष्मण ज्ञवालीले महामारीमा शिक्षकको स्वास्थ्य कसरी कायम राख्न सकिन्छ भन्ने सन्दर्भमा उदाहरण प्रस्तुत गरेका थिए । सो प्रस्तुतिमा डा. इन्दिरा मिश्र (सुनसरी) र डा. मोहनकुमार तुम्बाहाङले प्रतिविम्बन गरेका थिए ।

स्थानीय विज्ञतालाई प्राथमिकता दिँदै मिश्रित मोडलमा गरिएको यो बहस नौलो कार्यक्रम भएको साथै यो विधिबाट प्रदेश नं. १ मा र पूर्वमा बौद्धिक बहसहरु चलाउन सकिने सन्देश दिन सकिने बताइएको थियो । यस विधिबाट नयाँ बौद्धिक स्थान र समूहको खोजी गर्न सकिने, स्थानीय विशेषज्ञतालाई प्राथमिकता दिँदै लैजान सकिने सन्देश दिन खोजिएको नेल्टाका प्रदेश अध्यक्ष एनपी भण्डारीको ठहर छ ।

कार्यक्रमको उद्घाटन नेल्टाकी प्रमुख मोतिकला सुब्बा देवानबाट भएको थियो । अमेरिकी दूतावास अङ्ग्रेजी भाषा क्षेत्रीय कार्यालय काठमाडांैका प्रमुख कर्टिस चानले समेत मन्तव्य राखेका थिए । ३ सय जनाको क्षमताको जुम मिटिङ टुलबाट नेल्टा प्रदेश १ का महासचिव चेतनाथ निरौलाले कार्यक्रम सञ्चालन गरेका थिए ।