विराटचोकः मोरङको पथरीशनिश्चरे नगरपालिकाको कार्यालय भवन निर्माणका लागि जग्गाप्राप्ति पहल समितिले सङ्घीय मन्त्रालयहरुमा जग्गा व्यवस्थापनको माग अघि बढाएको छ ।

सङ्घीय मामला तथा सामान्य प्रशासन मन्त्रालय र वन तथा वातावरण मन्त्रालयसमक्ष जग्गा व्यवस्थापनको माग अघि सारेको हो ।

समितिकी संयोजक एवम् नगरपालिकाकी उपप्रमुख यमुना बिष्ट बास्तोलाले सङ्घीय मामला तथा सामान्य प्रशासन मन्त्री लालबाबु पण्डितसमक्ष आवश्यक कागजातसहितको जानकारी दिँदै जग्गा व्यवस्थापन गरिदिन अनुरोध गरिन् । समितिका सदस्यहरुको उपस्थितिमा समितिले वन तथा वातावरण मन्त्रालयमा पनि जग्गा प्राप्तिको पहल अघि बढाएको संयोजक बास्तोलाले जनाइन् ।

२०६८ साउन ३२ को सर्वदलीय सहमतिले वडा नम्बर १० को भुटानी शरणार्थी शिविरमा केन्द्र राख्ने सहमति गरेको र सरकारले पनि त्यहाँ केन्द्र तोकिदिएको थियो । तर सरकारी तबरले सो स्थलमा जग्गा व्यवस्थापन नहुँदा कार्यालय भवन निर्माण हुन समस्या परिरहेको टोलीले जानकारी गराएको छ ।

साथै सो टोलीले भूमि व्यवस्था, सहकारी तथा गरिबी निवारण मन्त्रालयमा नगरमा लामो समयदेखि ठूलो समस्याका रूपमा रहेको बसोबासको समस्या समाधान गर्न ध्यानाकर्षण गराएको छ । मन्त्री पद्मा अर्यालसँग सो विषयमा कुराकानी गर्दा सभामुखको विवादका कारण ऐन प्रमाणित गर्न बाँकी रहेकाले ऐन प्रमाणित भएपछि काम अघि बढ्ने बताइएको टोली संयोजक बास्तोलाको भनाइ छ ।

टोलीका सदस्यमा, १० नम्बर वडाध्यक्ष सागर राई, कार्यपालिका सदस्य निर्मला गदाल, सामाजिक अगुवा मोहनकुमार न्यौपाने, पर्शुराम कार्की, जीवन खतिवडा, रमेश राईलगायत सहभागी थिए ।