धरानः गोधुली क्लब धरानको आयोजनामा हुँदै आएको वडास्तरीय गोधुली फुटबल रनिङ कपको २० आँै संस्करण पुस १९ गतेदेखि माघ ४ गतेसम्म हुने भएको छ ।

धरान–१६ स्थित प्रादेशिक रङ्गशालामा हुने प्रतियोगिताको बारेमा आज पत्रकार सम्मेलन गरी आयोजकले जनाएको छ । खेलाडीहरूलाई सामाजिक उत्तरदायित्वतर्फ अग्रसर गराउनका लागि प्रतियोगितामा सहभागी हुने क्लबले आफ्नो वडामा केही सामाजिक कार्य गरेको हुनुपर्ने क्लबका उपाध्यक्ष सतिस केसीले बताए ।

प्रतियोगितामा सहभागी हुने क्लबको आयोजनामा सरसफाइ, रक्तदान, श्रमदान, सहयोग, वृक्षरोपणलगायतको कुनै पनि सामाजिक काम गरेको हुनुपर्ने उनको भनाइ छ ।

प्रतियोगिताको विजेतालाई नगद १ लाख र उपविजेताले ५० हजारसहित ट्रफी, मेडल र प्रमाणपत्र प्राप्त गर्ने क्लबका सचिव युवराज अधिकारीले बताए । प्रतियोगितामा ८ ओटा विधागत पुरस्कारसमेत रहेको अधिकारीले बताए । यस वर्षदेखि एक क्लबबाट २० खेलाडी र २ अफिसियल गरी २२ जना सहभागी हुन पाउने उनले बताए ।