विराटचोकः मोरङको सुन्दरहरैंचा नगरपालिकामा नागरिक उत्तरदायित्व तथा गुणस्तर सेवा प्रवाहका लागि सार्वजनिक सुनुवाई कार्यक्रम सम्पन्न भएको छ । जिल्ला प्रहरी कार्यालय मोरङ र इलाका प्रहरी कार्यालय बेलबारीको आयोजनामा इन्द्रपुर जेसीज मंगल स्मृति प्रतिष्ठान  सामुदायिक भवनमा शनिबार कार्यक्रम सम्पन्न भएको हो ।

स्थानीय तहमा नागरिकप्रति प्रहरीको भूमिका, सामाजिक न्याय, राष्ट्रिय सुरक्षा, आपसी मेलमिलाप, सामुदायिक शिक्षा र जनचेतना जगाउने दायित्वमा जनसहभागिता ल्याउने भएकाले यस्तो कार्यक्रम आयोजना गरेको मोरङका प्रहरी प्रमुख विश्व अधिकारीले बताएका छन् । प्रदेश १ का आन्तरिक मामिला तथा कानुन मन्त्री हिक्मतकुमार कार्कीको प्रमुख आतिथ्यतामा कार्यक्रम भएको थियो ।

सार्वजनिक सुनुवाइ कार्यक्रमका सहभागीहरूले प्रहरीको भूमिका कार्यशैली, आचरणका साथै स्थानीय तहका जनप्रतिनिधि र प्रदेशका मन्त्रीलाई प्रश्न गरेका थिए ।

सहभागीमध्येका प्रश्नकर्ता होमनाथ पोखरेलले कानुन मन्त्री कार्कीलाई प्रदेश १ को इलाममा भारतबाट भूमि अतिक्रमण भएको भनी समाचार आएको र यसमा प्रदेश सरकारको धारणा के छ भनी प्रश्न गरेका थिए । उक्त प्रश्नको जवाफमा मन्त्री कार्कीले भारतबाट मिचिएको भूमि फिर्ताका लागि केन्द्र सरकार लागिपरेको र कतैबाट भूमि मिच्न नदिने बताएका थिए ।

मन्त्री कार्कीले अपराध नियन्त्रण र रोकथाम गर्ने प्रहरीको कार्यक्रम प्रभावकारी बन्ने भएकाले नै सरकारले ल्याएको समेत बताए ।

सहभागी सूर्य अधिकारीले प्रहरीबाट हुने सेवा प्रवाहका विषयमा प्रश्न राखेका थिए । उक्त प्रश्नको जवाफमा जिल्ला प्रहरी प्रमुख अधिकारीले नागरिकबाट आएका गुनासा र प्रहरीबाट भएगरेका त्रुटिलाई मध्यनजर गरी सेवा प्रवाहलाई सुधार गर्दै नागरिकमैत्री प्रहरी निर्माण गर्ने बताएका थिए ।

सहभागी प्रकाश श्रेष्ठ र मणि दाहालले केही दिन अघि सुन्दरहरैंचामा भएको सवारी दुर्घटनाको विषयमा प्रश्न गरेका थिए । सो विषयमा दुर्घटनामा परी उपचार गराइरहेका महेन्द्र धिमालले आफैँ बोल्ने कुरा भएको र आफू दुर्घटनामा परेको भनी बोलिसकेको प्रहरी प्रमुख अधिकारीले बताएका थिए ।

अधिकांश सहभागीले सुन्दरहरैंचा नगरपालिकाका नगरप्रमुख शिवप्रसाद ढकाललाई प्रश्न गरेका थिए । जसमा मिलन बस्नेतले नगरपालिकाको फोहोर फल्ने ल्यान्डफिल साइट भए पनि जङ्गलमा फाल्ने गरेको गुनासो गरेका थिए ।

यस्तै, शव वाहनको विषयमा पनि सहभागीले सबैलाई बराबरी अधिकार भएको र कसैलाई पाखा कसैलाई काखा गर्न नमिल्ने भन्दै प्रश्न गरेका थिए ।

सहभागी अजम्बर राईले नगरपालिकाको केन्द्र सलकपुरमा सार्ने प्रक्रिया कहाँ पुग्यो भनी प्रश्न गरेका थिए । खोला दोहन ठेक्कापट्टा लगायतका विषयमा पनि सहभागीले प्रश्न गरेका थिए ।

ती प्रश्नको जवाफ दिँदै नगरप्रमुख ढकालले फोहोर व्यवस्थापनका लागि २ वटा ल्याण्ड फिल साइट रहेको र चाँडै व्यवस्थापन गर्ने तथा जङ्गलमा ठूलाठूला खाल्डा भएकाले हाल त्यस ठाउँमा फाल्ने गरेको बताएका थिए । यस्तै कार्यालयको केन्द्र सलकपुर सार्ने विषयमा प्रदेश हुँदै केन्द्र सरकारसम्म फाइल पुगेको र जग्गा प्राप्तिपछि भवन निर्माण लगायतका काम हुने भन्दै कार्यालय सर्ने बताएका थिए ।

‘घरदेखि घाटसम्म’ कार्यक्रम भएकाले सबै नागरिकको बराबरी अधिकार भएकाले कसैलाई काखा कसैलाई पाखा हुन नदिने र नदिएको बताउँदै यदि कतै बाट गल्ती भए कार्वाही गर्ने भनी शववाहनको विषयमा उठेका प्रश्नको जवाफ दिने क्रममा उनले बताए ।

कार्यक्रममा सहभागी विद्यार्थीले बालबालिका र शैक्षिक क्षेत्रलाई राजनीतिबाट टाढा राख्नुपर्ने बताउँदै कलिलै उमेरमा राजनीतिक मानसिकता बढेकाले पढ्ने वातावरण नभएको प्रति सहभागीलाई सचेत गराएका थिए । साथै जेब्राक्रसिङ लगायतका विषयमा प्रश्न गरेका थिए ।

प्रहरीले अन्तरक्रिया र जनचेतनामूलक कार्यक्रम सञ्चालन गरिरहेको घरदैलो कार्यक्रम, सार्वजनिक सुनुवाइ, खेलकुद, स्वास्थ्यलगायत विभिन्न शिविर सञ्चालन गरेको जनाएको छ । पर्चा, पम्प्लेट वितरण, ¥याली, सचेतनामूलक सामग्री वितरण गर्ने, मिडियामार्फत् श्रव्यदृश्य सामग्री प्रकाशन प्रशारणलाई तीव्रता दिइएको, सडक नाटक, सवारी सुरक्षका लागि संयुक्त ट्रफिक चेकिङ गरिरहेको पनि प्रदेश प्रहरी प्रमुख ठाकुरकुमार ज्ञवालीले बताए ।

लागूऔषध तथा अवैध घरेलु मदिरा बरामद गर्नुका साथै विभिन्न क्षेत्रमा प्रहरी पुग्ने गरेको र नागरिकको जनधनको सुरक्षामा दिनरात लागिरहेको ज्ञवालीले बताए । विकृति विसङ्गति हटाउन, अपराध न्यूनीकरण गर्न र समाजलाई सकारात्मक पथमा डोहो¥याउन मद्दत गर्ने कार्य प्रहरीले गरिरहेको उनको भनाइ थियो ।

विद्यालयमा नैतिक शिक्षा दिने, सडक सुरक्षालाई भरपर्दो बनाउन पहल गर्ने, सडक दुर्घटनालाई न्यूनीकरण गर्न पहल गर्ने, प्रकोप वा अन्य कुनै समस्यामा परेका सर्वसाधारणलाई तत्काल उद्दार गर्ने सवालमा प्रहरी र स्थानीय सरकारको भूमिका रहने हुनाले सहकार्य गरेर अगाडि बढ्ने उनले बताएका थिए ।

यसका लागि स्थानीय सरकारबाट विभिन्न स्थानमा सीसीटीभी जडान भएको र प्रविधिका नयाँ साधनस्रोत उपलब्धसँगै जिल्ला बाट नै निगरानी गरिरहेको बताएका थिए । स्थानीय सरकारको न्याय सम्पादनको अधिकार कार्यान्वयनमा कार्यक्रमले सहयोगी भूमिका निर्वाह गर्ने सहभागी नगरपालिका तथा गाउँपालिकाका प्रमुखले बताए ।

कार्यक्रममा कमला श्रेष्ठ, टुनाकुमारी बिश्वकर्मा, विवेक भुजेल, चेतराज बस्नेत, गणेशप्रसाद ढकाल, गीता शिवा, मित्रप्रसाद घिमिरे, शिवप्रसाद लामिछाने, अर्जुन गजुरेल, उज्ज्वल घिमिरेलगायतले प्रश्न गरेका थिए । कार्यक्रम सुन्दरहरैंचा र बेलबारी नगरपालिका तथा केराबारी र ग्रामथान गाउँपालिकाको सहकार्यमा भएको थियो ।