विराटनगरः प्रदेश नं. १ मा सबैभन्दा धेरै कोरोना संक्रमित भएको जिल्ला झापामा २ सय बेडको अस्पताल बन्ने भएको छ । भद्रपुरस्थित मेची अञ्चल अस्पतालको निर्माणाधीन भवनमा अस्पताल सञ्चालन हुने भएको हो ।

प्रदेश १ का मुख्यमन्त्री शेरधन राईले प्रदेशसभालाई सोमबार सम्बोधन गर्दै झापामा आइसोलेसन बेड थपेर कोरोना उपचार केन्द्र संचालन गर्ने जानकारी गराएका हुन् । झापामा २ सय बेडको अस्पताल सञ्चालन गर्ने सरकारको तयारी छ ।

तर, कोरोना अस्पताल नागरिक सरोकार समाजले मेचीले अस्पताल सञ्चालनमा आपत्ति जनाउँदै विरोध गरेको थियो । डब्लुएचओको मापदण्डअनुरुप अस्पतालको निर्माण गर्न आग्रह गरिएको बताउँदै समाजका संयोजक भक्त खवासले झापामा अधिक संक्रमित देखिएकाले अब विरोध गर्नुभन्दा पनि सुरक्षित तरिकाले अस्पताल सञ्चालन होस् भन्ने हाम्रो चाहना राखेको बताए । मेची अस्पतालको साटो अलग्गै भवनमा कोरोना अस्पताल बनाए आपत्ति नहुने उनको भनाइ छ ।

संक्रमण फैलिन नहुने र अस्पतालमा आउने विपन्न परिवार सेवाबाट वञ्चित गर्न नहुने आफूहरुको ठहर भएको खवासले बताए । जिल्लामा कोरोना भाइरस संक्रमण रोकथाम, उपचार तथा नियन्त्रण समितिले सर्वपक्षीय छलफलबाटै मेची अस्पतालको निर्माणाधीन भवनमा कोरोना उपचार केन्द्र र जनस्वास्थ्य कार्यालयको तालीम भवनमा पीसीआर परीक्षणको प्रयोगशाला बनाउन निर्णय गरिसकेको छ ।

प्रदेश सांसद श्रीप्रसाद मैनालीले पनि संक्रमितको संख्या बढेसँगै विशेष सेवासहितको उपचार सेवा र परीक्षणको लागि झापामै पीसीआर ल्याब सञ्चालन गर्न प्रदेश सरकारको ध्यानाकर्षण गरेका थिए ।

स्थानीयसँग छलफल नै नगरी एकलौटी ढंगले निर्णय भएको भन्दै स्थानीयले पनि विरोध गरेका थिए । भद्रपुर नगरपालिकाका पूर्वप्रमुख भारततेन्दुकुमार मल्लिक कोरोना अस्पताल झापावासीका लागि आवश्यक रहेको बताउँछन् । झापाको वस्तुस्थिति बुझ्न प्रदेश १ का मुख्यमन्त्री शेरधन राई आइतबार झापा गएका थिए ।