विराटचोकः मोरङको सुन्दरहरैंचा नगरपालिका वडा नम्बर १२ मा कृषि आधुनिकीकरण कार्यक्रम शुरु भएको छ । १२ नम्बर वडा कार्यालयको आयोजनामा सोमबारबाट शुरु भएको तालीम ३ दिनसम्म सञ्चालन हुने छ । तालीमको उद्घाटन कार्यक्रममा बोल्दै वडा सचिव अनिल पोख्रेलले कृषियोग्य जमिन पछिल्ला दिनमा प्लटिङका कारण सीमित बन्दै गएको अवस्थामा समयानुसार कौसी खेतीतर्फ नागरिकहरु अकर्षित भएकाले यो तालीमले थप ऊर्जा मिल्ने बताए ।

कार्यक्रमका प्रमुख अतिथि वडा नम्बर १२ का अध्यक्ष रोशनप्रसाद ढकालले यस्ता धेरै तालीम वडामा सञ्चालन भइरहेको बताए । तालीममा सिकेको ज्ञानको उपयोग गरी समाजमा भएका अन्य व्यक्तिलाई समेत तालीम दिने गरी ज्ञान हासिल गर्नुपर्ने उनको भनाइ थियो । आगामी आर्थिक वर्षको नीति तथा कार्यक्रमको तयारी भइरहेकाले वडाभित्र रहेका सबै क्षेत्रका नागरिकले आगामी वर्ष कस्ता कार्यक्रम गर्न सकिन्छ भन्ने सल्लाह सुझाव दिन पनि उनले आग्रह गरे ।

वडाध्यक्ष ढकालले परम्परागत कृषिभन्दा आधुनिक खेतीमा जोड दिनुपर्ने बताए । मल, बीउ कसरी प्रयोग गर्ने भन्ने ज्ञानमा कमी भएकाले उत्पादन अपेक्षाअनुसार नहुने भन्दै यस्ता तालीमबाट सक्षम कृषक बन्ने गरी ज्ञान सिक्नुपर्ने उनले बताए ।

तालीमको सहजीकरण सुन्दरहरैंचा नगरपालिकाको कृषि शाखाका प्रविधिक सुदीप भण्डारीले गर्ने भएका छन् । कार्यक्रमको अध्यक्षता सहयोगी संस्था गुडलक एजुकेशन ट्रेनिङ सेन्टर इटहरीका प्रबन्धक वसन्त रेग्मीले गरेका थिए । कार्यक्रममा स्वागत मन्तव्य वडा सदस्य गणेश फुयालले गरेका थिए भने कार्यक्रम सञ्चालन सो सेन्टरका सञ्चालक रेवती निरौलाले गरेका थिए । तालीममा २० जना किसान सहभागी छन् ।

तालीममा फौजी कीरा र सलह कीराको बारेमा आवश्यक ज्ञान दिनुका साथै ती कीराको प्रकोप कम गर्नेसम्बन्धी ज्ञान दिइने भएको छ । मौसमी र बेमौसमी खेती, कौसी खेती, नर्सरी व्यवस्थापनलगायतका विषयमा प्रशिक्षण हुने बताइएको छ ।