इटहरीः सुनसरीका निजी विद्यालयका शिक्षकहरुको समस्या समाधानका विषयमा भर्चुअल मिटिङ सम्पन्न भएको छ । सो मिटिङमा सुनसरीमा कार्यरत निजी विद्यालयका शिक्षकहरु, निजी विद्यालय सञ्चालकहरुको संस्था प्याब्सन र एन प्याब्सनका पदाधिकारीहरु, प्रदेश सांसद सर्वध्वज साँवा, इटहरी उपमहानगरपालिका शिक्षा शाखा प्रमुख कुमारी अम्बिका शाह र सञ्चारकर्मीहरु सहभागी थिए ।

बैठकमा लकडाउनका कारण विद्यालयहरु बन्द भएको अवस्थामा अधिकांश विद्यालयहरुले शिक्षकहरुलाई तलब नदिँदा शिक्षकहरुले भोग्नुपरिरहेको समस्या समाधानका विषयमा छलफल भएको थियो । विद्यालयका सञ्चालकहरुले कतिपय शिक्षकहरुलाई चैत महिनाको समेत तलब नदिएको गुनासो गरेका थिए । सरकारले चैत महिनाको शुल्क मिनाहा गर्न अनुरोध गरे पनि विद्यालयले चैत महिनाको शुल्क लिएका तर शिक्षकलाई चैत महिनादेखि नै तलब नदिएको उनीहरुको भनाइ थियो ।

विद्यालयका सञ्चालकहरुले भने लकडाउनको अवस्थामा शिक्षकहरुलाई तलब दिन नसकिने बताएका छन् । आफूहरुले अभिभावकहरुबाट शुल्क नलिएको अवस्थामा शिक्षकहरुलाई तलब दिन नसकिने उनीहरुको भनाइ छ । यता निजी विद्यालयका शिक्षकहरुले भने वर्षौंदेखि विद्यालयसँग जोडिएर काम गर्दै आएका शिक्षकहरुलाई तलब नदिंदा गुजारा गर्न नै समस्या भएको भन्दै नीजि विद्यालयका सञ्चालकहरुले दिएको अभिव्यक्ति गैरजिम्मेवार देखिएको बताएका छन् । वर्षौंदेखि लाखौं, करोडौं, नाफा कमाउँदै आएका सञ्चालकहरुले २–३ महिना विद्यालय बन्द हुँदैमा वर्षौंदेखि काम गर्दै आएका शिक्षकको तलब रोकिनु गैरजिम्मेवार व्यवहार भएको बताएका छन् । तलब नदिए आन्दोलनमा उत्रन बाध्य हुने शिक्षकहरुले चेतावनी दिएका छन् ।

बैठकमा आफ्नो धारणा राख्दै सुनसरीका प्रदेश सांसद् सर्वध्वज साँवाले शिक्षकहरु निकै समस्यामा रहेको पाइएको भन्दै आफुले प्रदेश संसद्मार्फत शिक्षकहरुका समस्या समाधानका विषयमा आवाज उठाउने बताए ।

इटहरी उपमहानगरपालिकाको शिक्षा शाखा प्रमुख कुमारी अम्बिका शाहले शिक्षकहरुले आफ्ना समस्या शुरुदेखि नै उठाएको भए बजेटमा सम्बोधन हुने सम्भावना रहेको भन्दै उहाँले समस्या समाधानका लागि सहजीकरण गर्न आफू तयार रहेको बताए । विद्यालय सञ्चालक र शिक्षकहरुलाई राखेर छलफल गराई निष्कर्ष निकाल्न सहयोग गर्ने उनको भनाइ थियो ।

इटहरीका शिक्षक विद्याभुषण गुप्ताको अध्यक्षतामा शिक्षक राम गौतमले सञ्चालन गरेको बैठकमा सुनसरीका ६० जना भन्दा बढी शिक्षक सहभागी थिए । एन प्याब्सन सुनसरी अध्यक्ष नारायण सञ्जेल, इटहरी नगर अध्यक्ष गणेश कोइराला, प्याब्सन सुनसरी अध्यक्ष नेलसन (थानेश्वर) ढकाल, पूर्व जिल्ला अध्यक्ष सुमित थापालगायत बैठकमा सहभागी थिए ।

०७६ सालको बक्यौता शुल्क र ०७७ बैशाखदेखिको शुल्क बुझाउन निजी विद्यालयको अपील