विराटचोकः प्रदेश र संघीय सरकार संसद कोषबाट सञ्चालन भएका योजनाको शनिबार अनुगमन गरिएको छ । मोरङ क्षेत्र नम्बर ३ अन्तर्गत सुन्दरहरैचा नगरपालिकाका विभिन्न वडाहरूमा सञ्चालन भइरहेका केही योजनाको नेकपाले अनुगमन गरेको हो । नेकपा जिल्ला कमिटी सचिवालय सदस्य नवराज चापागाईको संयोजकत्वमा अनुगमन गरिएको हो ।

प्रदेश सांसद राजकुमार ओझामार्फत् सांसद विकास कोषमार्फत् सञ्चालित योजनाहरुमध्ये वडा नम्बर १० मा नवोदय मार्गमा टायल बिछ्याउने कार्य, गैरीटोल हुँदै बासुकी ताल जाने बाटो एजिङ, हेभेन लिपात भवन निर्माण, मुनालचोक हुँदै संगम मार्ग जाने बाटोमा एजिङ, रिन्छेन छ्योलिङ बौद्ध गुम्बा निर्माणको अनुगमन गरिएको थियो ।

यसैगरी, संघीय संसद भानुभक्त ढकालमार्फत् संसद विकास कोषबाट सञ्चालित योजनाहरु हरैंचामोड उत्तर हुँदै वरपिपल चौक जाने बाटो कालोपत्रे, ६७ लाख, उपमन्यु धर्मशाला निर्माण, २० लाख, प्रदेश सरकार भौतिक पूर्वाधार विकास तर्फको भानुमार्ग देखि उत्तर सयपत्री मार्ग एजिङ ग्राभेल, ४९ लाख, गौरीशंकर मन्दिर सामुदायिक भवन, बाघझोडा–विश्वबिधालय जाने बाटो कालोपत्रेको अनुगमन गरिएको थियो । यस्तै, प्रदेश सरकार पर्यटन, मार्फत् ५० लाखमा निर्माण भइरहेको बासुकी रिचार्ज पोण्ड निर्माण, तराई मधेस समृद्धि कार्यक्रम अन्तर्गत सुकुना खोला तटबन्धन, प्रदेश सरकार सामाजिक मन्त्रालय तर्फको चण्डेश्वरी स्कुल, बाल निर्माण, आदिवासी जनजाति भवन, १० लाख, आरती सामुदायिक भवनलगायतका विकास योजनाहरुको अनुगमन गरिएको हो ।

वडा नम्बर ९ मा प्रदेश सांसद विकास कोषबाट सञ्चालित काली मन्दिर निर्माण तथा मर्मत, बुुधबारे–आइतबारे खण्ड कालोपत्रे, संघीय सांसद विकास कोषबाट जनता मा.वि. भवन निर्माण, तराई मधेस समृद्धि कार्यक्रम अन्तर्गत बुधबारे बजार टहरा निर्माण, र प्रदेश सरकार सिचाइँ डिभिजनद्वारा निर्माणाधीन खदम जुडी सिँचाइ योजनाको अनुगमन गरिएको हो ।

यसैगरी वडा नम्बर ११ मा प्रदेश सांसद विकास कोषमार्फत् सञ्चालित त्रिपुरेश्वर मन्दिर शौचालय निर्माण, प्रदेश सरकार मार्फत निर्माण भइरहेको जयनगर– कर्जुना ढल निर्माणको पनि १ अनुगमन गरिएको छ ।

अनगुमनपछि प्रदेशसभा सदस्य राजकुमार ओझाले सञ्चालन हँुदै गरेका कुनै योजनाको २० प्रतिशत भने कुनैको ८० प्रतिशतसम्म काम सम्पन्न भएको बताए । कतिपय योजनाहरु सञ्चालनको अन्त्यतर्फ आउँदा लकडाउन भएको र केही योजना शुरु हुनासाथ नै लकडाउन भएकाले काममा केही बाधा परे पनि समयमै काम सम्पन्न हुने सांसद ओझाले बताए । आगामी वर्षका लागि बजेट विनियोजन गरिएकाले थप योजनाहरु ल्याउने उनको भनाइ थियो ।

कोभिड १९ का कारण र बर्खा लागेकाले सम्पन्न हुन बाँकी योजना असोजपछि सञ्चालन गर्न प्रदेश सरकारसँग समन्वय गरिरहेको समेत ओझाले बताए ।

अनुगमन समितिका संयोजक चापागाईले सुन्दरहरैंचामा प्रदेश र संघले जनताका आवश्यकता र अपेक्षालाई पूरा गर्न सञ्चालन गरेका योजना महत्वपूर्ण भएको बताए । योजनाका सकारात्मक कुरालाई उजागर गर्दै बजारमा चलेका नकारात्मक हल्लालाई चिर्नका लागि अनुगमन गरिएको उनले बताए ।

अनुगमनमा सुन्दरहरैंचा नगरपालिका उपमेयर धनमाया तामाङ, नेकपा प्रदेश कमिटी सदस्य लक्ष्मी फुँयाल, राजकुमार कार्की,  वडाअध्यक्ष राजेन्द्रबहादुर थापा, रोशनप्रसाद ढकाल, बिसनलाल चौधरी , नेकपा सुन्दरहरै‌चा सम्याेजक केदार गुरागाई, कार्यपालिका सदस्य तारा घिमिरे लगायत उपस्थित थिए ।