आज गाईजात्रा पर्व देशभर मनाइँदैछ । विशेषगरी काठमाडौं उपत्यका र नेवार जातिको बढी बसोबास भएको क्षेत्रमा गाईजात्रा मनाउने गरिन्छ । पछिल्लो समय गाईजात्रालाई विकृति र विसंगतिमाथि व्यङ्ग्य प्रस्तुत गर्ने पर्वका रुपमा पनि लिन थालिएको छ । यसपटक कोरोना भाइरसको संक्रमणको त्रासका कारण गाईजात्राको अवसरमा हास्यव्यङ्ग्यात्मक कार्यक्रम औपचारिक रुपमा खुला स्थानमा हुन पाएनन् ।

यसै क्रममा यस अनलाइनले पनि सुन्दरहरैंचामा देखिएका विकृति र विसंगतिमाथि प्रहार गर्ने प्रयास गरेको छ ।

मेयर शिवप्रसाद ढकाल

नेकपाको बहुमतका बीचमा सबलाई रिझाई काम गर्नु परेको छ ।

मैले जस्तो समन्वय गरी कुन स्थानीय तहको प्रमुखले काम गरेको छ ?

कार्यपालिका बैठकमा त एक पटक आच्छुआच्छु नै पार्छन् ।

बैठक नसकिँदै हस्ताक्षर गर्न उनीहरु नै कलम अघि सार्छन् ।

ढुक्क छु जबसम्म आफू अनुकूल समाचार लेख्छन् महानगरका पत्रकार ।

यहाँको प्रेसलाई फकाइफुस्ल्याई विराटनगरकासँग गर्छु सधैँ व्यवहार ।

उपमेयर, धनमाया तामाङ

उपमेयर भनेर नाक फुलाउन बाहेक छैन कुनै दम

नेकपाको बहुमत भए नि आफूलाई साथ दिने कम

भ्रष्टाचारलाई पर फ्याँक्ने सोच राख्ने परेँ मान्छे

भन्न थाले मलाई नै पो यही हो भ्रष्टाचारीको भान्छे

लेखा अधिकृत, शेखर ढकाल

बन्धु परे मेयर मेरा उल्टै सिकाउँछन् नीति

यस्तै पारा रहिरहे अझै बिग्रँदै जाला थिति

राम्रै काम गर्दा पनि मन पराउँदैनन् सितिमिति

गन्न थाल्छु म पनि पो अब सरुवा हुने मिति

रोशन ढकाल, वडाध्यक्ष

सुनको भाउ नि बढ्दैछ, बढ्दैछ मेरो दाउ पनि

प्रशासन चलाउन सिक्दैछु, चिन्दैछु कर्मचारी पनि

अब आउने चुनावमा मेयर बन्ने सपना पाल्या छु

त्यही भएर तटस्थ भई आफ्ना पाइला चाल्या छु

तारा ढकाल घिमिरे, 

काम छैन आफ्नो केही उपमेयरसँगै डुल्ने हो

कुरा काट्ने काटिरहून्, उद्घाटनतिरै भुल्ने हो

उद्घाटनतिरै जान पाए उतै पाइन्छ बरु सानोतिनो मान

फरक विशेषता पनि छ झोला भिरीभिरी रोप्न सक्छु धान

 नवराज चापागाईं, अध्यक्ष उद्योग वाणिज्य संघ

उद्योग वाणिज्य संघ पेवा नै भयो अब अधिवेशन किन गर्नु

सुन्दरदुलारी उवा संघलाई मर्ज गरी आफू किन पछि पर्नु

उद्योगीको नेतामा भन्दा राजनीतितिर बढ्न थाल्यो चाख

एक पटक मेयर भएर फिर्ता गर्नु छ गुमेको आफ्नो साख

लक्ष्मी श्रेष्ठ, प्रधानाध्यापक, सुकुना मावि
शिक्षकको काम होइन अनुशासनमा बस्ने, अरुलाई अनुशासनमा बसाउने हो

विद्यालय वरपर जंकफुड र सूर्तिजन्य पदार्थ नबेच भन्ने हो, आफूले कार्यकक्षमै चपाउने हो

यसै पनि ठूलो स्कुल हो तह लगाउन सबैलाई सक्दिनँ म

१८ घण्टा रजनीगन्धा चपाउँछु छोड्न चाहिँ सक्दिनँ म

भोलेश्वर दुलाल, व्यवसायी
सोझो नठान मलाई मेरो नाम छ भोला भनेर

सातो जाँदा कसले फर्काउला कोला कोला भनेर

मेयरलाई पनि नचाइदिन सक्ने मेरो ह्याउ छ

अर्काे पटकको चुनावमा मेयर हुने दाउ छ