काठमाडौंः प्रधानमन्त्री केपी शर्मा ओलीले महामारी र राष्ट्रिय संकटलाई विरोधको अवसरका रुपमा लिन नहुने बताएका छन् । कोभिड–१९ र यसको रोकथामबारे स्वास्थ्य क्षेत्रका विज्ञहरुसँगको परामर्श बैठकमा प्रधानमन्त्री ओलीले महामारी सबैको साझा चुनौती भएकाले त्यसको मिलेर सामना गर्नुपर्ने उल्लेख गरे ।

कोरोना महामारी नियन्त्रण सरकारको कामले मात्र सफल नहुने जनाउँदै प्रधानमन्त्री ओलीले जति धेरै जनचेतना जगाउन सक्यो यस विरुद्धको लडाईं त्यति छिटो सफल हुने बताए । ‘कोभिड–१९ को विश्वब्यापी महामारी नियन्त्रण सरकारले गर्ने काम र प्रयासले मात्र सम्भव छैन,’ प्रधानमन्त्री ओलीले भने, ‘जनतामा चेतना जति बढाउन सकिन्छ, कोरोनाविरुद्धको लडाइँ जित्न त्यति सजिलो हुन्छ ।’

यस्ता राष्ट्रिय संकट र महामारीलाई विरोधको अवसरका रुपमा लिने प्रबृत्ति बढेकाले यस्तो प्रवृत्ति त्य(ाग्नुपर्ने उनको भनाइ थियो ।

‘यता पल्टाएर पनि विरोध, उता पल्टाएर पनि विरोध, कहिले लकडाउन किन नगरेको भनेर विरोध, कहिले किन लकडाउन नखोलेको भनेर विरोध,’ प्रधानमन्त्री ओलीले भने, ‘सामाजिक अनुशासनले कोरोना पराजित गर्न मद्दत पुग्छ । यसलाई विरोधको अवसर ठान्नु हुन्न ।’

प्रधानमन्त्री ओलीले स्वास्थ्यकर्मी, उपकरण, संरचना आदि सबै हिसाबले कमजोर रहेको अवस्थामा पनि सबै प्रबन्ध गरेर कोरोना नियन्त्रणका लागि प्रभावकारी कदम चालेको बताए । कार्यान्वयन एकदमै कमजोर नभई स्वास्थ्यकर्मी, उपकरण र संरचनाका हिसाबले हामी कमजोर देखिए पनि अन्य देशको तुलनामा सबल रहेको उनको भनाइ थियो ।

जनतामा हुने असन्तुष्टि र आक्रोशलाई आफूले स्वाभाविक रुपमा लिने बताउँदै फरक आस्था र विश्वासकै कारण राम्रो कामको पनि विरोध गर्ने प्रवृत्ति त्याग्नुपर्ने बताए । असल कामको समर्थन र गलत कामको विरोध गरे विरोधको पनि नैतिक हैसियत हुने उनको भनाइ थियो ।

कार्यक्रममा प्रधानमन्त्री कार्यालयका सचिव महेन्द्र गुरागाईंले प्रतिदिन १८ हजार जनासम्मको पीसीआर परीक्षण गर्न सक्ने गरी ल्याब स्थापना गरिएको र हालसम्म ४ लाख जनाको परीक्षण गरिएको बताए । कार्यक्रममा प्रमुख प्रतिपक्षी दलका नेता शेरबहादुर देउवा र जसपाका अध्यक्ष महन्थ ठाकुर पनि सहभागी थिए ।