विराटचोकः आज नेप्सेको प्रविधिमा गडबडी हुँदा कतिपय लगानीकर्ताको आफैं ३ पटकसम्म अर्डर गएको हुनाले शेयर बिक्रीमा समस्या आउने भन्दै लगानीकर्ताले आजको शेयर कारोबार रद्द गर्न माग गरेका छन् ।

आफूसँग नभएको वा खातामा भएको भन्दा बढी शेयर बेच्दा वा शेयर बेचे पनि राफसाफ गरिएन भने त्यसलाई क्लोज आउट भनिन्छ । क्लोज आउट भएको शेयरको लगानीकर्ताले कारोबार रकमको २० प्रतिशत जरिवाना तिर्नुपर्ने हुन्छ । आजको कारोबारमा कतिपय लगानीकर्ताको स्वचालित रुपमा तेहेरो पोस्टिङ भएकाले क्लोज आउटमा पर्ने निश्चित भएको भन्दै लगानीकर्ताले सबै कारोबार रद्द गर्न माग गरेका हुन् । तर नेप्सेले टीएमएस गडबडीका कारण भएको कारोबारमा क्लोज आउट नहुने तर त्यसको जानकारी ब्रोकरलाई दिनुपर्ने जनाएको छ ।

आज नेप्सेको टीएमएस प्रणालीमा समस्या आएर शेयर कारोबार हुन नसकेपछि बेलुका सवा ५ बजेसम्म शेयर कारोबार भएको थियो । आज नेप्से सूचक ४ दशमलव ६४ अंकले बढेर १ हजार ४ सय ६२ दशमलव ६७ अंकमा आइपुगेको छ । १ सय ८६ कम्पनीको ३३ हजार ९ सय ७३ पटक भएको किनबेचमा १ अर्ब ६१ करोड ४५ लाख ५४ हजार ३ सय रुपैयाँको शेयर कारोबार भएको छ । ३६ लाख ८५ हजार ९ सय ६३ कित्ता शेयर किनबेच भएका हुन् ।

३ ओटा उपसमूहका सूचकमा मात्रै रातो पोतिएको छ । एनआरएन इन्स्ट्राफ्याक्चर कम्पनीको सबैभन्दा धेरै १० प्रतिशतले शेयरमूल्य बढेको छ । नेपाल पुनर्बिमा कम्पनीको सबैभन्दा धेरै ३४ करोड ३२ लाख रुपैयाँको शेयर किनबेच भएको छ ।

टीएमएस नचल्दा आज सवा १ घण्टामात्रै शेयर कारोबार