विराटचोकः आज नेपालमा ३ सय ३६ जना कोरोना संक्रमित थपिएका छन् । योसँगै नेपालमा कोरोना संक्रमितको संख्या २ लाख ६८ हजार ६ सय ४६ जना पुगेको छ ।

स्वास्थ्य तथा जनसंख्या मन्त्रालयका अनुसार थप २ सय २६ जना निको भएसँगै संक्रमणमुक्त हुनेको संख्या २ लाख ६२ हजार ८ सय ६८ जना पुगेको छ । थप ४ जनाको मृत्युसँगै संक्रमणका कारण ज्यान गुमाउनेको संख्या १ हजार ९ सय ७९ जना पुगेको छ ।

आइसोलेसनमा रहनेको संख्या ३ हजार ७ सय ९९ जना र क्वारेन्टिनमा रहनेको संख्या १ सय ७२ जना छ । हालसम्म २० लाख ३१ हजार ७ सय ५६ स्वाबको पीसीआर परीक्षण भएको मन्त्रालयले जनाएको छ ।

विराटचोकः आज प्रदेश नम्बर १ मा ८ जना कोरोना संक्रमित थपिएका छन् । योसँगै संक्रमितको संख्या ३० हजार १ सय १० जना पुगेको छ । तीमध्ये २९ हजार ५ सय ३३ जना निको भएका छन् । १ सय १२ जनाको ज्यान गएको छ ।

सामाजिक विकास मन्त्रालयका अनुसार सुनसरीको धरान र इनरुवा, झापाको बिर्तामोड, संखुवासभाको खाँदबारी, मोरङको रंगेली र प्रदेश १ बाहिरका एक एक जनामा संक्रमण पुष्टि भएको हो । झापाको अर्जुनधारामा १ जना महिलासहित २ जनामा संक्रमण पुष्टि भएको छ ।

बिर्तामोडः झापाको कमल गाँउपालिका–६ का २० वर्षीय नवराज भट्टराई लागूऔषध ब्राउन सुगरसहित पक्राउ परेका छन् ।

हिजो दिउँसो साढे ३ बजे मेचीनगर नगरपालिका–६ मेची पुलबाट भट्टराईलाई नियन्त्रणमा लिइएको प्रहरीले जनाएको छ । नियन्त्रणमा लिएपछि शरीर जाँच गर्दा गुप्ताङ्गमा लुकाएर राखेको अवस्थामा २० ग्राम ब्राउन सुगर फेला पारी बरामद गरिएको इलाका प्रहरी कार्यालय काँकरभिट्टाले जनाएको छ । उनीमाथि थप अनुसन्धान तथा कानुनी कारवाही अघि बढाइएको सो कार्यालयले जनाएको छ ।