विराटचोकः लकडाउनको समयमा राम्रो व्यापार हुने वस्तुमध्येमा मोटरसाइकल पनि पर्न सफल भयो । लकडाउनको शुरु अवस्थामा १ महिनाभन्दा बढी समय पसल बन्द भए पनि लकडाउन खुकुलो भएसँगै मोटरसाइकल र स्कुटरको बिक्री ह्वात्तै बढेको विक्रेता बताउँछन् । लकडाउन खुकुलो भए पनि सार्वजनिक सवारी साधन नचलेकाले मोटरसाइकलको बिक्री बढेको विक्रेताको भनाइ छ ।

सुन्दरहरैंचाको विराटचोकमा रहेको मनोकामना अटोका सञ्चालक खेमराज दाहालका अनुसार सबै मोडेलका मोटरसाइकलको बिक्री बढेको हो । ६० वर्षभन्दा माथिक व्यक्तिका लागि समेत आरामदायी सवारी पाइने हुनाले र इन्जिनमा ५ वर्षको वारेन्टी हुने हुनाले टीभीएस ब्राण्डका मोटरसाइकलमा ग्राहक आकर्षित भएको उनको भनाइ छ ।

शून्य प्रतिशत ब्याजदरमा फाइनान्सको सुविधा तथा नगद छुटको स्किम यो चाडपर्वमा ल्याएकाले त्यसले पनि बिक्री बढाउन सहयोग गरेको उनले बताए । मोटरसाइकल वा स्कुटर किन्नेले मात्रै नभएर जानकारी लिन आउनेले पनि लक्की ड्रमार्फत् हरेक हप्ता १ जनाले मोटरसाइकल उपहार पाउने गरी स्किम ल्याएको दाहालले बताए । शिक्षक, विद्यार्थी, कर्मचारी तथा युवा पुस्तामा टीभीएस ब्राण्डका मोटरसाइकल लोकप्रिय रहेको दाहाल बताउँछन् ।

पाथीभरा अटो ट्रेडिङका सञ्चालक केबी श्रेष्ठ पनि दाहालको भनाइमा सहमत छन् । सार्वजनिक सवारी साधन नचल्दा मोटरसाइकल नै सुरक्षित र भरपर्दाे यातायातको साधन भएको श्रेष्ठले बताए । हिरो ब्राण्डका सवारी साधन बिक्री गर्ने गरेका उनले कर्मचारीको रोजाइमा हिरो ब्राण्डका सवारी साधन पर्ने गरेको बताए । १ सयदेखि २ सय सीसीसम्मका मोटरसाइकल र स्कुटर पाइने पाथीभरा अटो ट्रेडिङमा चाँडै नयाँ ब्राण्डको मोटरसाइकल लन्च हुने उनको भनाइ थियो ।