काठमाडौंः नेपालमा भएको १३ औं दक्षिण एसियाली खेलकुद (साग) की स्वर्ण विजेता पार्वती गुरुङले प्रथम कागेश्वरी मनोहरा भर्चुअल तेक्वान्दो राष्ट्रिय खुला पुम्से प्रतियोगितामा स्वर्ण जितेकी छिन् । कागेश्वरी नगर खेलकुद विकास समिति र मूलपानी तेक्वान्दो डोजाङको संयुक्त आयोजनामा भएको प्रतियोगिताको महिला १८–३१ वर्षमा नेपाल प्रहरीकी पार्वती सर्वाधिक ७.४० अंक जोड्दै पहिलो भएकी हुन् ।

७.२६ अंकसाथ स्युचाटारकी सन्जिला तिम्सिना दोस्रो भइन् । भोटेपुलकी स्वस्तिका तामाङ र चन्द्रमाकी सुशीला राईले तेस्रो स्थान हात पारे । यो स्पर्धामा पार्वतीसहित शीर्ष तीन स्थान हात पार्ने सबै खेलाडी १३ औं सागका स्वर्ण विजेता हुन् ।

सोही स्पर्धाको पुरुषमा मूलपानीका पुष्पप्रसाद गौतम पहिलो भए । उनले ६.१० अंक जोडे । ६.०३ अंकमा बागलुङका युकेश थापा मगर दोस्रो भए । सगरमाथा न्यु बानेश्वर तेक्वान्दो डोजाङका विवेक राई र चितवनका मोहम्मद उमर खान तेस्रो बने ।

कागेश्वरी मनोहरा नगरपालिकाको मुख्य प्रायोजन तथा युनिटी तेक्वान्दो डोजाङ, हङकङका अध्यक्ष दिल गुरुङको सह–प्रायोजनमा भएको प्रतियोगिताको १८ वर्ष पुरुषमा १३ औं सागका कास्यधारी स्युचाटारका अस्मिन राउत पहिलो भए । उनले ६.६३ अंक प्राप्त गरे । ५.७० अंक जोडेका  मकवानपुरका कृष्णबहादुर बमजन दोस्रो र चितवनका अब्बास खान र मूलपानीका विवेक श्रेष्ठ तेस्रो भए ।

सोही स्पर्धाको महिलामा ६.१३ अंक जोड्दै स्युचाटारकी मोनिका रम्तेलले स्वर्ण जितिन् । ६.०६ अंकसाथ चितवनकी जैनथ खातुन दोस्रो भइन् । सैनिक आवसीय महाविद्यालयकी रोशनी श्रेष्ठ र रीता श्रेष्ठ तेस्रो भए ।

पुरुष ३१–४० वर्षमा ६.३० अंकसाथ बुटवलका सुरज श्रेष्ठले स्वर्ण हात पारे । ६.०३ अंकका साथ बुटवलकै मदन थापा मगर दोश्रो भए । हीराहरि तेक्वान्दो डोजाङ, सिन्धुपाल्चोकका रमेश गुरुङ र यान्सुक तेक्वान्दो डोजाङका दुर्गामान तामाङ तेस्रो भए ।

मूलपानी टिम च्याम्पियन:
प्रतियोगितामा आयोजक मूलपानी तेक्वान्दो डोजाङ समग्रमा टिम च्याम्पियन बन्यो । ११ स्पर्धा समावेश दुईदिने प्रतियोगितामा मूलपानीले ४ स्वर्ण, ४ रजत र ३ कांस्य जित्यो ।

स्युचाटार ४ स्वर्ण र १ रजतसाथ दोस्रो भयो । तेस्रो स्थानको बुटवलले १ स्वर्ण, १ रजत र २ कास्य हात पा¥यो । बाँकी १–१ स्वर्ण नेपाल प्रहरी र कोटेश्वरले आफ्नो पोल्टामा पारे ।

प्रतियोगिताको प्रत्येक स्पर्धामा शीर्ष तीन स्थान हात पार्ने खेलाडीलाई क्रमशः ३ हजार, २ हजार र १ हजार नगद पुरस्कार प्रदान गरिने भएको छ । पुरस्कार बुधबारदेखि खेलाडीको बैंक खातामा पठाउन शुरु गरिने बताइएको छ ।

सहभागीमध्ये एक खेलाडीलाई ‘मस्ट पपुलर प्लेयर’ अवार्डसहित नगद ५ हजार रुपैयाँबाट पुरस्कृत गरिने भएको छ । खेलाडीको चयन गर्न प्रत्येक सहभागी खेलाडीको भिडियो यु ट्युबमा राखिने र सर्वाधिक हेरिएको खेलाडीको भिडियोलाई ‘मस्ट पपुलर प्लेयर’ को पुरस्कार प्रदान गरिने बताइएको छ । अक्टोबर २० मा मस्ट पपुलर प्लेयर घोषणा गरिने भएको छ ।

दुई दिने प्रतियोगितामा नेपाल प्रहरी, नेपाली सेनासहित विभिन्न ४४ टिमका २ सय ८ खेलाडीले प्रतिस्पर्धा गरेका थिए । प्रतियोगितामा अशोक खड्का, हीराबहादुर थापा, नोर्बु लामा, विक्रम खड्गी र मीन न्यौपाने निर्णायक थिए ।