विश्व

अमेरिकाको पहिलो महिला उपराष्ट्रपति भएकी कमला ह्यारिस को हुन् ?

Published

4 years ago

2020-11-08

अमेरिकामा ४६ औं राष्ट्रपतिका रूपमा जो बाइडेन चुनिएका छन्। यो जितसँगै डेमोक्र्याटिक पार्टीकी कमला ह्यारिस अमेरिकाकै पहिलो महिला उपराष्ट्रपति निर्वाचित भएकी छन्।

अमेरिकी निर्वाचनमा इतिहास बनाउन सफल कमला को हुन् त ?

भारतीय मूलकी कमला ह्यारिसलाई चिन्न उनकी आमा चिन्नुपर्छ।

कमलाले अधिकार र कर्तव्यको चेत हुर्कने क्रममै आमाबाटै पाएकी थिइन्।

उनकी भारतीय आमाले उतिखेरै अधिकारका लडाइँहरूमा छोरीलाई च्याप्दै अघि बढेकी थिइन् भने जीवनमा गुनासो होइन काम गरेर देखाउनु पर्छ भन्ने पाठ पनि घोकाएकी थिइन्।

सर्वोच्च अदालतको न्यायाधीश छनौटका बेला संसदीय सुनुवाइमा धूम मच्चाएकी सिनेटर कमलाको शरीरमा कसको रगत बगिरहेको छ? पक्कै पनि श्यामला गोपालनको जसले उनकी छोरीलाई आफूजस्तै योद्धा बनाएर हुर्काएकी थिइन्।

‘मेरी आमा हामीलाई जहिल्यै पनि कामै नगरेर यसो भएन र उसो भएन भन्नुभन्दा केही गरेर देखाओ भनिरहनुहुन्थ्यो,’ बुधबार डेमोक्रेट पार्टीकै राष्ट्रपतिका उम्मेदवार जो वाइडेनसँग पहिलोपटक देखापरेकी कमला भनिरहेकी थिइन्, ‘त्यसैले मैले केही गरेर देखाउने आँट गरेकी छु।’

सन् १९६० दशक उदय हुँदै गर्दा बर्क्लेस्थित युनिभर्सिटी अफ क्यालिफोर्नियामा ह्यारिसका आमाबुवा विद्यावारिधि गरिरहेका थिए। त्यतिबेलै उनीहरू एकअर्कासँग नजिकिए। जमाइकाबाट आएका पिता डोनाल्ड ह्यारिस अर्थशास्त्रका विद्यार्थी थिए। आमा गोपालन पोषण र ग्रन्थी र हर्मोनसँग सम्बन्धित ‘इन्डोक्रिनोलोजी’ विषयकी छात्रा।

खुला सोचविचार भएका उनीहरू दुवै अभियन्ता भएर निस्के। पृथ्वीकै दुई फरक ध्रुवबाट आएका ती दुवै विद्यार्थीले विश्वविद्यालयमा पढिरहेकै बेला विश्वभर रन्किएको नागरिक अधिकारका आन्दोलनहरू, भियतनाम युद्ध र मतदान अधिकारजस्ता मुद्दाहरूमा आफूलाई समाहित गरेका थिए। अधिकारका लडाइँमा आफूहरूको ऐक्यवद्धता अघि बढिरहेकै बेला उनीहरू एकअर्कासँग प्रेममा पनि गाँसिए।

उनीहरूको अभियानकै एउटा मुख्य कडीका रूपमा विद्यार्थीहरूको सानो समूह हरेक आइतबार एक ठाउँ भेला हुन्थे र काला जातिका लेखकहरूका कृति र संसारभरका गतिविधि लिएर छलफल गर्थे। त्यस्ता छलफलमा दक्षिण अफ्रिकी रंगभेद विरोधी आन्दोलनदेखि लिएर ल्याटिन अमेरिकामा चलिरहेको स्वतन्त्रताका लडाइँ हुँदै अमेरिकामै पनि माल्कोम एक्सका पछि लागेर विखण्डनका कुरा गर्नेहरु मूल विषयवस्तु बन्थे।

त्यसरी छलफल गर्ने समूहकै एक सदस्य अब्रे लेब्रीका अनुसार त्यो साप्ताहिक जमघटमा माओ त्से तुंग र फिडेल क्यास्ट्रोका प्रशंसा चल्थे। त्यसैगरी अमेरिकामै अध्ययनरत मार्क्सवादी विद्यार्थीहरूले खोलेको ‘ब्ल्याक प्यान्थर पार्टी’का संस्थापकहरूको गुणगान हुन्थ्यो।

‘त्यो समूहमै कमलाकी आमा एकमात्र गैरअश्वेत (भारतीय) हुँदाहुँदै पनि उनले आफूलाई यी मुद्दाहरूमा चुर्लुम्म डुबाएकी थिइन्,’ लेब्री स्मरण गर्छन्, ‘गोपालन र ह्यारिसको बौद्धिकताले मलाई असाध्यै प्रभावित पारेको थियो।’

सिनेटर कमलाले अहिले पनि लेब्रीलाई ‘अंकल अब्रे’ भनेर सम्बोधन गर्नुबाटै पनि उनीहरू एकआपसमा कति घनिष्ठ थिए भन्ने संकेत गर्छ।

लेब्रीले देख्दादेख्दै गोपालन र ह्यारिसले बिहे गरे। अनि यो जोडीबाट कमला र दुई वर्षपछि मायाको जन्म भएको थियो। त्यो बेला कलिला सन्तान हुँदा पनि गोपालन र ह्यारिसले अधिकारको लडाइँ त्यागेका थिएनन्।

कमलाले आफैं भनेकी छन्, उनी नाबालकै हुँदा आफ्ना आमाबुवाको जोडतोड साथ चल्ने अभियान र नाराबाजी उनलाई अझै सम्झना आउँछ। धमाधम बढेका कदम र चर्का नाराहरू गुञ्जिएका ती दृष्य सम्झँदा अहिले पनि महासागरजस्तै उर्लिएका ऊर्जाको अनुभूत हुन्छ।

कमला ह्यारिस र उनकी आमा श्यामला गोपालन।

कमलाले आफ्ना लेखहरूमा प्रहरीले पानीको फोहोरा प्रयोग गर्दा आफ्ना आमाबुवाको भागाभाग, आन्दोलनकारी विद्यार्थीको प्रतिकार र एकपटक त हिंसा भड्किँदा भावी सिनेटर (आफू)लाई कसरी दौडेर ज्यान जोगाउन लगाइएको थियो भन्ने वृत्तान्त उल्लेख गरेकी छिन्।

शेरोन मेक्गाफी लामो समयदेखि यो परिवारको साथीका रूपमा छिन्। शेरोनकी आमा रेजिना सेल्टनले कमला र उनकी बहिनीलाई हुर्काउन सघाएकी थिइन्।

‘गोपालन र ह्यारिसले त्यति सानो उमेरका छोरीसँग पनि वयस्कहरूसँग जस्तै वार्तालाप गर्थे,’ शेरोन सम्झिन्छिन्, ‘संसारभरका मानिसले केटाकेटीलाई परै राख्ने विषयवस्तुबारे पनि उनीहरू छोरीहरूसँग खुला रूपमा गफिन्थे।’

त्यस्ता विषयहरूमा नागरिक अधिकारको जुलुसदेखि लिएर आमाले भाषण गर्ने बैठक वा गोष्ठीमा सहभागी हुनेसम्मका कुरा चल्थे।

‘त्यति साना छोरीहरू पनि पछाडि झोला बोकेर आमाको पछिपछि लुखुरलुखुर लाग्थे,’ शेरोन भन्छिन्, ‘अनि वयस्कहरूको त्यो अभियान वा आन्दोलनका हिस्सा बन्थे।’

बिहे गरेको केही वर्षमै कमलाका बावु र आमाले सम्बन्ध विच्छेद गरे। कमलाले आफ्नो जीवनीमा यसरी आमाबावु छुट्टिएपछिको पीडाबारे थोरै मात्र उल्लेख गरेकी छन्। कमलानिकट व्यक्तिहरूका अनुसार उनको बाल्यकाल सुखी नै थियो जसमा आमाले भान्छामा पकाएका परिकारको सुगन्ध र निरन्तर संवाद अनि हाँसो भरिएको थियो।

पितासँग अलग भएपछि दुवै छोरीमा आमाको प्रभाव झनै बढेर गयो। कमलामा आमाप्रतिको लगाव जीवनका हरेक मोडमा गाढा देखिँदै आएको उनीनिकट व्यक्तिहरू बताउँछन्।

‘हाम्री आमा को थिइन् भन्ने कुरा थाहा नपाउन्जेल तपाईंलाई कमला ह्यारिसबारे थाहा पाउन गाह्रो हुन्छ,’ जो वाइडेनले दिदीलाई उपराष्ट्रपतिका उम्मेदवारका रूपमा चुनेलगत्तै कमलाकी बहिनी मायाले मंगलबार ट्वीट गर्दै लेखेकी छन्, ‘आज मलाई दिदीको असाध्यै याद आइरहेको छ। तर पनि यतिबेला उनी र हाम्रा पुर्खाहरू मुस्काइरहेका छन् भन्नेमा म पक्का छु।’

कमलासँगको सम्झना उनको शिशु कक्षाकी सञ्चालिका स्टेसी जोन्सन बाटिस्टसँग पनि छ।

कक्षाकोठामा ‘बुली’ गर्ने कुनै केटोले कमलाले तयार पारेको प्रोजेक्ट उठाएर फ्याँकिदिएको थियो। त्यतिबेला सहयोग माग्दै कमला आफूनजिक आएकी स्टेसी अहिले पनि सम्झिन्छिन्। स्टेसीका अनुसार त्यसपछि ती केटोसँग झगडा चर्किएको थियो। केटोले कुनै चिजले कमलाको टाउकामै यस्तरी हिर्काइदिएको थियो, रगत बग्न थालेपछि अस्पतालै लैजानुपरेको थियो।

त्यो घटनापछि कमलासँग आजपर्यन्त राम्रो सम्बन्ध कायम भएको स्टेसी सुनाउँछिन्। उनका अनुसार कमलामा उनकी आमा गोपालनको जस्तै सोच भरिएको छ।

‘त्यतिबेलादेखि नै म देख्दै आइरहेकी छु,’ स्टेसी भन्छिन्, ‘कमला आफूले सही देखेको कुरामा टसमस नभई अडिन्छिन्।’

किशोर अवस्थामा हुँदा कमलाकी आमाले अन्यत्र जागिर पाएपछि यो परिवार मोन्ट्रियल सरेको थियो। त्यतिबेलै कमलाले आफूमा कसरी परिवर्तन ल्याउने भनेर खोजी थालिन्। घरबाहिरको चौरमा फुटबल खेल्न गरिएको निषेधलाई दिदीबहिनी मिलेर प्रतिवाद गरे। त्यो प्रतिवादपछि नियमै फेरिएको कमलाले बताएकी छन्।

हाइस्कुलको पढाइ सकिनेबित्तिकै कमलाले वकिल बन्न अगाडिको पढाइ तयारी गरिन्।

बायाँबाट क्रमशः कमला ह्यारिस, बहिनी माया र उनकी आमा श्यामला गोपालन।

सानफ्रान्सिस्को बोर्ड अफ सुपरभाइजरकी पूर्व सदस्य सोफी म्याक्सवेलका अनुसार कमलाले सडक अभियानलाई निरन्तरता दिन त्यसमा कानुनको ज्ञान पनि जोड्न चाहिन् जसले एकअर्कालाई परिपूरकको काम गर्थ्यो।

वासिङटन डिसीस्थित होवार्ड विश्वविद्यालय पढ्दाकी सहपाठी सेली योंग थम्पकींग्स अहिले पनि कमलालाई सम्झिन्छिन्। उनका अनुसार कमला त्यतिबेलै जीवनमा आफूले गर्न चाहेका कुराप्रति दृढ थिइन्। उनी पढाइमा गम्भीर थिइन्। विरोध र प्रदर्शनका निम्ति जसोतसो समय निकाल्ने गरे पनि अन्तिम वर्षको परीक्षा नसिद्धिएसम्म उनले कलेज जीवनका रमाइला पनि बिर्सेर एकाग्र भई पढेकी थिइन्। त्योबेला सेली र कमला दुवैले ‘स्टुडेन्ट काउन्सिल’को पदाधिकारीमा जितेका थिए।

‘आफूलाई योग्य बनाउन आमाले गरेको अथक परिश्रम कदापि खेर जान नदिने दृढता कमलामा थियो,’ सेली सम्झिन्छिन्, ‘त्योबेला भर्खर कलेज आएका हामी दुवैमा यो संसार बदलिदिनेछौं भनेजस्तो जोश र जाँगर थियो।’

त्यसपछि कमलाको कथा झनै धेरैलाई थाहा छ। उनी ‘ल स्कुल’ पढ्न क्यालिफोर्निया फर्किएदेखि ओकल्यान्ड र सानफ्रान्सिस्कोस्थित वकिलको कार्यालयमा कानुनी पेसा अपनाउने पहिलो प्रयासमा असफलता हात लागेकोसम्म।

जिल्लाको सरकारी वकिलका रूपमा आफ्ना हाकिमलाई पनि परास्त गरेर सफलतापूर्वक कार्यसम्पादन गरेको, राज्यकै महान्याधिवक्ताका रूपमा चयन हुँदै अमेरिकी सिनेटरदेखि एकपटक त राष्ट्रपतिकै निम्ति गरेको प्रयाससम्म जुन प्रारम्भिक चरणमै भंग भएको थियो।

यी प्रत्येक कदममा कमलाका साथीहरूले उनलाई एकोहोरो भएर आमाबावुकै पथमा लम्किरहेका पाए।

पहिलोपटक चुनावमा होमिएकी कमलाको प्रचारप्रसारमा एकसाथ घुँडा धसेर लाग्दादेखिको सम्झना एन्ड्रिया ड्युसँग छ।

‘उनी सदैव आमाको चर्चा गरिरहन्थिन्,’ एन्ड्रिया भन्छिन्, ‘आमा ज्युँदो हुँदा त शक्तिको श्रोत नै थिइन् भने दिवंगत भएपछि पनि उत्तिकै बलियो श्रोत बनिरहेकी छिन्।’

कमलाकी आमा बितेको एक दशक नाघिसकेको छ।

एन्ड्रियाले कमलाकी आमालाई एउटा प्रचार कार्यक्रमकै बेला बल्लतल्ल भेट्ने आकांक्षा पूरा गरेकी थिइन्। त्यो पहिलो भेटमै उनको मनमा बत्ती बलेको थियो, ‘ए कमलाको निर्माण त यहाँबाट पो भएको रहेछ!’

कमलाकी आमा संसारले आफूलाई बेग्लै ढंगले चिनोस् भन्ने चाहन्थिन् जुन प्रभाव छोरीमा पनि आएको थियो। आमालाई चिन्नेहरूका अनुसार उनी अमेरिकामा व्याप्त जातीय असमानताप्रति दिक्दार प्रकट गर्थिन्।

आफ्ना छोरीहरू अश्वेतकै रुपमा चिनिनेछन् भन्ने उनलाई थाहा थियो। त्यसैले उनले छोरीहरूलाई अश्वेत संस्कृति र काला जातिका महान व्यक्तित्वको घेरामा नजिक्याइन्।

दुवै छोरीले अश्वेतहरूको चर्चमै गाए र ‘रेन्बो साइन’मा घुमेरै बिताए। रेन्बो साइन बर्क्लेको पूर्व चिहानघारी थियो जसलाई कालान्तरमा अश्वेत संस्कृतिको केन्द्रका रुपमा परिणत गरियो।

सिनेटर कमलाले आफू कलेजमा रहँदा रंगभेद विरोधी अभियानमा सरिक भएको र आमासँगै मिल्दोजुल्दो जीवनशैलीमा ढालिएको बताउँदा बताउँदै पनि एउटा कुरामा आफूलाई बेग्लै बनाइन्। त्यो हो, परिवर्तनका लागि उनले लड्ने मात्र होइन आफ्नो भागको खोजी पनि गरिन्।

‘दी ट्रुथ्स वी होल्ड’ मा उनले लेखेकी छन्, ‘म परिवर्तनका लागि जीवनभर बाहिरबाट न्यायको खोजीमा एकीकृत भएका वयस्कहरूबाट नारा र जुलुस हेर्दै हुर्किएँ। त्यहीँ मैले यो सब प्रक्रियामा हामी आफूभित्रको पनि महत्वपूर्ण भूमिका हुन्छ भन्ने जानेँ।’

राजनीतिक जीवनलाई अघि बढाउन कमलाले उनकी आमाको पुस्ताकै एक लोग्ने मानिसलाई पराजित गर्नुपर्थ्यो। बामपन्थी धारतिर ढल्केका परिवारका सदस्य ती व्यक्ति उदारवादी सोचका वकिल थिए। नागरिक अधिकारको लडाइँमा पनि होमिएका ती वकिलले अदालतमा कतिपय अधिकारकर्मीको पक्षमा लडिदिएका थिए जसका माझ उनको नायक छवि नै बनेको थियो। त्यस्ता व्यक्तिलाई हराउन कमलाले असाध्यै मुश्किल सामना गर्नु परेको थियो।

एकपटक ओहोदामा पुगिसकेपछि अब कमलाका अघिल्तिर कानुनी प्रबन्धनहरू र राजनीतिक क्षेत्रका वास्तविकताहरू थिए। यस्तोमा उक्साहटमा आएर केहीले उनले प्रगतिशील दावीहरू छाडेको आरोप लगाउँदै विरोधमा पनि ओर्लिए। अन्य धेरैले पछिसम्मै कमलाको पक्षमै आफूलाई उभ्याइरहे।

उनले आफ्नो दर्शनलाई आमाले देखाएको उदाहरणमै उभ्याएकी छन्– हरेक दिन स-साना पाइला चाल्दै ठूलो लक्ष्यका लागि आफूलाई केन्द्रित गरिरहने।

‘आमाले त्यो परको सपनाभन्दा पनि आफ्नो अघिल्तिरका काम कसरी सही ढंगले फत्ते गर्ने भन्नेमा आफूलाई केन्द्रित गर्नुभएको थियो,’ कमलाले लेखेकी छन्।

विद्यावारिधि गरिसकेपछि दक्षिण भारत फर्केर आमाबुवाले हेरिदिएको केटोसँग बिहे गर्ने आशा पूरा नगरेकी कमलाकी आमाले पुस्तौं पुस्तादेखि चलिआएको परम्परा पनि अस्वीकार गरेकी थिइन्। आमाको त्यही क्रान्तिकारी गुण आफ्नो रगतमा परेको छोरीले देखाइरहेकी छन्।

कमलाकी मावली हजुरआमाले पनि घरेलू हिंसाका पीडितलाई साथ-सहयोग दिनुका साथै उतिबेलाको भारतीय समाजमा महिलाहरूलाई गर्भनिरोधकका बारेमा जानकारी दिएकी थिइन्। त्यसैगरी मावली हजुरबुवा भारतको स्वतन्त्रता संग्राममा लड्नुका साथै कुटनीतिज्ञसमेत बनेका थिए। भारतमा अंग्रेज शासन अन्त्यपछि हजुरआमा-हजुरबुवा जाम्बियामा बसेर शरणार्थी व्यवस्थापनमा संलग्न भएका थिए।

कमला ह्यारिस र उनकी बहिनी मायाआमा श्यामला गोपालन (माथिल्लो लहर बीच)र मावली हजुरआमा-बुवाका साथमा। तस्बिरः न्युयोर्क टाइम्स

कमलाकी आमा क्यानाडाबाट फर्केपछि लरेन्स बर्क्ले नेशनल ल्याबोरेटरीमा काम गरेकी थिइन् जसका हाकिम थिए जो ग्रे। ती पाँच फिट एक इन्चकी महिला आफ्नो कार्यालयमा आएपछि प्रभावशाली व्यक्तित्वको प्रभावले कसरी कार्यकक्षलाई फेरिदिएकी थिइन् भनेर जो अहिले पनि सम्झना गर्ने कोशिस गर्छन्।

जो अहिले ओरेगन हेल्थ एन्ड साइन्स युनिभर्सिटीका प्राध्यापक छन्।

‘धुन्धानै काम गर्ने महिला त होइन,’ जो भन्छन्, ‘तर, जातीय र लैंगिक समानताको पक्षमा उनी बलियो खम्बा थिइन् जसलाई कसैले असंवेदनशील टिप्पणी गरेको छ भने कदापि स्वीकार्य हुँदैन थियो।’

जो आमाजस्तै कमलासँग नजिकिएका त छैनन्। तर, टाढै बसेर पनि छोरीमा आमाबाट आएको गुण देख्दा उनलाई फेरि पुराना दिन सम्झना हुन थालेको छ।

‘म टिभीमा हेरिरहेको छु, कमलाम पनि श्यामला गोपालनको प्रत्यक्ष गुण र सामाजिक न्यायका पक्षपोषण प्रतिबिम्वित भइरहेको देख्दैछु,’ उनी भन्छन्, ‘म त उस्तै पो महशुस गरिरहेको छु।’

ठ्याक्कै यस्तै महसुश लतिफा सिमोनले पनि गरेकी छन्। हाइस्कुलमै पढाइ छाडेकी लतिफालाई कमलाले नोकरीमा लगाएकी थिइन्। त्यतिबेलै उनले कमलाको आमालाई पनि देख्ने मौका पाइन्।

चुनाव तयारीका क्रममा लतिफाले कमलाकी आमालाई सधैं अघिल्लो घेरामै बसेको देख्थिन् जसको अनुहारमा छोरीप्रति गौरव देखिन्थ्यो। स-साना कुरामा पनि आमाछोरीमा कति धेरै एकरूपता थियो भन्ने उनले महशुस गरेकी थिइन्। दुवै अत्यन्तै परिश्रमी हुनुका साथै आफ्ना निम्ति काम गर्नेलाई रमाइलो पारिराख्थे। अनि कोठै थर्किनेगरी खुब खुलेर हाँस्थे।

एकपटक चन्दा संकलन चलिरहँदा लतिफा टेनिस जुत्ता लगाएर उभिएकी थिइन्। त्यस्तो क्षणका निम्ति त्यो पहिरन उचित मानिँदैन थियो। तसर्थ उनलाई त्यहाँबाट कतै अन्त पठाउन पर्ने भयो। यस्तो स्थितिमा कमलाकी आमाले ‘हामीले सधैं आफूलाई सर्वोत्कृष्ट प्रदर्शित गर्नुपर्छ’ भनेर भद्र पाराले सम्झाएको लतिफा अहिले पनि सम्झिन्छिन्।

त्यसको धेरै वर्षपछि एउटा अर्को घटनामा ठ्याक्कै त्यही गुण छोरी कमलामा पनि देखियो। चुनाव प्रचारको बसबाट ओर्लिँदै गर्दा कमलाले साथीहरूलाई सुझाव दिने बेलामा उस्तैगरी भनेकी थिइन्, ‘साथी हो, आ-आफ्ना चश्मा पुछ है। मलाई तिमीहरूमाथि विश्वास छ र मैले जे देखिरहेकी छु अरूले पनि तिमीहरूमा त्यही देखून् भन्ने चाहन्छु।’

आफूले एक झलकमा आमामा देखेको गुणले त आफूलाई प्रभाव पारिरहेका बेलामा कमलाले त सिंगो हुर्काइमा आमाबाट त्यस्ता गुण पाएको लतिफा बताउँछिन्।

यी यस्ता प्रभाव हुन् जसमा कमलाको बुवाको अंश कमै छ। कमलाका बुवा र आमाले उनी पाँच वर्ष पनि नपुग्दै सम्बन्ध विच्छेद गरेका थिए। कमलाले बुवा स्ट्यानफोर्ड विश्वविद्यालयको प्राध्यापक भएपछि उनलाई सप्ताहान्ततिर वा गर्मी बिदामा मात्र भेटेको लेखेकी छन्।

जमाइका ग्लोब नामको वेबसाइटमा एउटा लेख लेख्दै कमलाका बुवाले छोरीहरूप्रतिको आफ्नो प्रेममा कहिल्यै कमी नआएको उल्लेख गरेका छन्। त्यसैगरी कमलाले पनि बुवालाई ‘सुपर हिरो’ भनेर लेखेकी छन्।

यति हुँदाहुँदै पनि बाबुछोरी बीचको सम्बन्धमा गत वर्ष चिसोपन देखिएको थियो। कमलाले जिस्कँदै आफूले गाँजा सेवन गर्नुका पछाडि जमाइकन बुवाबाट आएको प्रभाव भनेकी थिइन्। त्यस प्रतिक्रियाले खिल्ली उडाएको भनेर बुवाले दुःख प्रकट गरेका थिए।

‘पहिचानको राजनीतिक दुनो सोझ्याउने नाममा’ पारिवारिक प्रतिष्ठालाई आघात पार्ने लज्जास्पद काम भएको बुवाको भनाइ थियो।

अब्रे लेब्रीका अनुसार कमलाले सिनेटको पदभार ग्रहण गर्ने समारोहमा बुवाले उपस्थिति जनाए पनि छोरीको चुनावी प्रचारमा उनको उपस्थिति देखिएको थिएन। यसका पछाडि त्यो गाँजाकै विवाद कारक रहेको उनी अनुमान लगाउँछन्।

‘बाबुछोरीको सम्बन्धमा अन्तिम धक्का त्यही घटनाले लगाएजस्तो लाग्छ,’ उनले भने।

आफ्नो जीवनमा आमाको एक्लो प्रभावकै कारण आमाको मृत्यु कमलाको निम्ति निकै कष्टकर बनेको थियो। छोरीको प्रारम्भिक चुनावी प्रचारमा सक्रिय गोपालनले पछिल्लो चरण देख्नै पाइनन्। कमला अहिले पनि आमालाई बारम्बार याद गरिरहने बताउँछिन्।

‘मेरो अहिले पनि गला अवरुद्ध हुन्छ,’ उनले गत वर्ष एउटा अन्तर्वार्तामा भनेकी थिइन्, ‘आमाको मृत्युको जतिसुकै समय बिते पनि त्यसले केही फरक नपार्ने रहेछ।’

आमाले छाडेर गएका भाँडावर्तन र काठका चम्चा अहिले पनि आफूले प्रयोग गरिरहेको कमला बताउँछिन्। कहिलेकाहीँ बेलैमा घर फर्किएर भान्छामा पकाइरहेको बेला आमालाई सम्झिन्छिन्। आमाको निलमजडित औंठी अहिले पनि कमलाको औंलामा चम्किरहेकै छ। उनलाई अहिले पनि आमा भइदिएको भए कति कुरा सोध्थेँ होला भन्ने लाग्छ।

‘यो साता आमा यहाँ हामीसँग भइदिए हुन्थ्यो भन्ने कुराले असाध्यै छटपटी भइरहेको छ,’ कमलाले भनेकी थिइन्।

जिल्ला न्यायाधिवक्ता भएर सपथ लिँदै गर्दा आफ्नो छेवैमा गर्वसाथ आमा खडा भएको तस्बिर उनले सँगालेर राखेकी छन्।

‘म श्यामला गोपालन ह्यारिसकी छोरी हुँ भन्ने भन्दा संसारमै मेरो निम्ति ठूलो अर्को कुनै पद वा उपाधि छैन,’ उनले लेखेकी छन्, ‘मैले सबभन्दा साँचेर राखेको जीवनकै प्यारो सत्य पनि यही हो।’

एपीका लागि म्याट सेडेन्सकीले लेखेको स्टोरीको यो भावानुवाद हामीले सेतो पाटी डट कमबाट साभार गरेका हौँ ।

पूर्व उपराष्ट्रपति जो बाइडेन बने अमेरिकाको ४६ औँ राष्ट्रपति

Up Next

५ सय रुपैयाँ बढ्यो सुनको भाउ, चाँदीको २० रुपैयाँ

Don't Miss

इटलीमा ९ लाख, पोल्याण्डमा ५ लाख र नेदरल्याण्डमा ४ लाख पुगे कोरोना संक्रमित

Facebook Comment

Click to comment

You must be logged in to post a comment Login

You must be logged in to post a comment.

Banner

कुकुरले सुँघेर पत्ता लगाएपछि धरानमा लागूऔषधसहित समातिए युवा

Published

4 weeks ago

2024-10-28

निष्पक्षखबर

धरान-१७ मा एक युवा लागूऔषधसहित पक्राउ परेका छन् ।
बसका सवार रहेका यात्रुकलाई कुकुरले सुघने क्रममा नियन्त्रित लागूऔषधसहित एकजना पक्राउ परेको इलाका प्रहरी कार्यालय धरानले जनाएको छ । पक्राउ पर्नेमा उदयपुर त्रियुगा नगरपालिका–१० का २५ वर्षीय सञ्जय राना मगर रहेको कोशी प्रदेश प्रहरी कार्यालय विराटनगरका प्रहरी प्रवक्ता प्रहरी वरिष्ठ उपरीक्षक भीमबहादुर दाहालले जानकारी दिए ।
कोशी प्रदेश प्रहरी कार्यालय विराटनगरको ‘सुरक्षा सुनिश्चितता अभियान’ अन्तरगत चाड पर्वलक्षित सुरक्षा योजनाअनुसार परिचालन भएको प्रहरी कुकुरसहितको चेकिङ टोलीले यात्रुहरुको सुरक्षालाई समेत मध्यनजर गरी चेकजाँचको क्रममा उनी पक्राउ परेका हुन् ।
धरानबाट उदयपुर जाँदै गरेको को१ख ५४४० नम्बरको बसमा सवार रहेका राना मगरलाई नियन्त्रित औषधी ट्रामानिल ६०० क्याप्सुल र स्पारेष्ट ६०० चक्कीसहित पक्राउ गरेको प्रहरीले जनाएको छ ।
प्रहरीले चाडपर्वमा लागूऔषध ओसारपसार, बिष्फोटक पदार्थ तथा अन्य अपराधिक गतिविधि नियन्त्रणको लागि तालिम प्राप्त कुकुर सहितको प्रहरीले टोलीद्वारा संकित ब्यक्तिहरु तथा सवारी साधनहरुलाई कडाइका साथ चेकजाँच गर्दै आएको छ ।
यस्तै, इलाका प्रहरी कार्यालय लौकही र लागू औषध नियन्त्रण व्युरो विराटनगरको टोलीले चेकजाँचको क्रममा इटहरी–६ का ३६ वर्षीय कृष्णप्रसाद प्रसाई र ३३ वर्षीय सन्तोष चौधरीलाई ९८ मिलिग्राम ब्राउनसुगरसहित, भोक्राहा नरसिंह–४ का २२ वर्षीय रोस्तम अन्सारी र २२ वर्षीय इम्रान अन्सारीलाई १५० मिलिग्राम ब्राउन सुगर सहित, इटहरी–१६ का २० वर्षीय अमन चौधरी र इटहरी–१७ का २० वर्षीय रञ्जित चमारलाई २ ग्राम ३७० मिलिग्राम ब्राउन सुगरसहित र इनरुवा नगरपालिका–५ का २५ प्रेम कुमार खंग र इनरुवा–३ का २८ बर्षीय शंकरकुमार देवलाई २ ग्राम ५०० मिलिग्राम ब्राउन सुगरसहित पक्राउ गरेको प्रहरीले जनाएको छ ।

(koshikhabar.com)

Banner

आज – १२ कार्तिक २०८१ सोमवार को राशिफल

Published

4 weeks ago

2024-10-28

निष्पक्षखबर

मेष

मेष (चु, चे, चो, ला, लि, लु, ले, लो, अ) आज बोलीको प्रभाव बढ्ने र नयाँ कमको थालनी पनि हुनेछ । सरकारी जागिरेले बढुवा, प्रशंसा र पुरस्कार समेत पाउनेछन् ।

मिथुन

मिथुन (का, कि, कु, घ, ङ, छ, के, को, हा) आज सफल यात्राको योग छ । श्रमको उचित मूल्याङ्कन हुनेछ । पार्टनरसिपमा गरिएको कारोबारले पनि राम्रै फाइदा दिनेछ ।

सिंह

सिंह (मा, मि, मु, मे, मो, टा, टि, टु, टे) आफ्नो प्रयास र कामधन्दाबाट दीर्घकालिक फाइदा पुग्न सक्छ, त्यसैले आफ्नो विचार र योजनालाई अघि बढाउँदा राम्रो हुन्छ ।

तुला

तुला (रा, रि, रु, रे, रो, ता, ति, तु, ते) आज नाम, दाम, प्रतिष्ठा र पुरस्कार प्राप्त हुनसक्छ । परोपकारका क्षेत्रमा लगानीको समय छ । मान्यजनको सहयोग प्राप्त हुनेछ ।

धनु

धनु (ये, यो, भा, भि, भु, धा, फा, ढा, भे) आज आफूसँग भएको क्षमता प्रदर्शन गर्ने अवसर जुट्ला । बन्दव्यापार र पेसाव्यवसायका क्षेत्रमा उन्नति प्रगतिको वातावरण बन्नेछ ।

कुम्भ

कुम्भ (गु, गे, गो, सा, सि, सु, से, सो, दा) राजनैतिक र सामाजिक कार्यमा सफलता मिल्नेछ । नयाँ कमको अवसर फेला पर्ने छन् । सहयोगीहरूको राम्रो साथ प्राप्त हुनेछ ।

बृष

वृष (इ, उ, ए, ओ, वा, वि, वु, वे, वो) आज मनमा देखिने अस्थिरता अधैर्यताका कारण निर्णायक क्षमतामा कमी आउनेछ । तर्क, विवाद र प्रतिस्पर्धाबाट लाभ हुने छैन ।

कर्कट

कर्कट (हि, हु, हे, हो, डा, डि, डु, डे, डो) आज राज्यबाट मान सम्मान पाइनेछ । दाम्पत्य जीवनमा मधुरता छाउनेछ । ढिलै भए पनि अधुरा काम पनि सम्पन्न हुनेछ ।

कन्या

कन्या (टो, पा, पि, पु, ष, ण, ठ, पे, पो) परिवारभित्रका झिनामसिना काममा धेरै समय खर्चनु पर्नेछ । सहयोगी र नातागोताको साथ पाइँदैन । स्वास्थ्यमा खर्च बढ्नसक्छ ।

बृश्चिक

वृश्चिक (तो, ना, नि, नु, ने, नो, या, यि, यु) धार्मिक कार्य सफल रहनेछन् । आर्थिक क्षेत्रमा राम्रो सफलता मिल्ला । विशिष्ट व्यक्तिलाई प्रभावित बनाएर काम बनाउन सकिनेछ ।

मकर

मकर (भो,जा,जि,जु,जे,जो,ख,खि,खु,खे,खो,गा,गि) कार्य सम्पादनमा समस्या आउला । आज आर्थिक सङ्कटले गर्दा मनमा अशान्ति र छटपटी व्याप्त हुनेछ । स्वास्थ्य मापदण्ड पूरा गर्नु पर्छ ।

मीन

मीन (दि, दु, थ, झ, ञ, दे, दो, चा, चि) ठीक समयमा सही निर्णय लिन सकिनेछ । आँटेको र ताकेको कार्य विस्तारै अघि बढ्ला । अध्ययन अध्यापन सफल नै रहेको छ । -ज्योतिषाचार्य / वास्तुविद् पण्डित नारायणप्रसाद दुलाल

Banner

पहिलो ‘मिसेस पुर्बेली आइकन’ बनिन् इटहरीकि रेनुका श्रेष्ठ

Published

2 months ago

2024-09-29

निष्पक्षखबर

पहिलो ‘मिसेस पुर्बेली आइकन’ बनिन् इटहरीकि रेनुका श्रेष्ठ

मिसेस पुर्बेली आइकन’को बिजेता रेनुका, फर्स्ट रनरअप मुना बन्दा दिपिका बनिन् सेकेण्ड रनरअप

इटहरीकि रेनुका श्रेष्ठ बनिन् पहिलो ‘मिसेस पुर्बेली आईकन’

इटहरी/ पहिलो ‘मिसेस पुर्बेली आईकन २०२४’ को ताज इटहरीकी रेनुका श्रेष्ठले हात पारेकी छन् । इटहरीको लायन्स क्लबमा असोज १२ गते शनिबार सम्पन्न ग्राण्ड फिनालेबाट उनले बिजेताको उपाधिसँगै ट्रफी, क्राउन र नगद ५० हजार रुपैयाँका साथै अन्य पुरस्कारहरू प्राप्त गरिन् । ग्राण्ड फिनालेको प्रमुख अतिथीको रुपमा कोशी प्रदेश सभा सदस्य माननीय मिना श्रेष्ठ उपस्थित थिइन् ।

प्रमुख अतिथी मिना श्रेष्ठले बिजेता श्रेष्ठलाई ताज लगाइदिएकी थिइन् । साथै उनले पब्लिक च्वाईस अवार्ड समेत हात पारिन् । यस्तै झापाकी मुना बजगाई फर्स्ट रनरअप बन्न सफल भइन् । उनले मिसेस इन्टेलेक्च्युअलको सबटाईटल समेत जितिन् भने धनकुटाकी दिपिका भट्टराई सेकेन्ड रनरअप बन्न सफल भईन् । उनले मिसेस पर्सनालिटीको सबटाईटल हात पारिन् ।

यस्तै सुनसरी सदरमुकाम इनरुवाकी रुबिना श्रेष्ठले अर्गनाईजर च्वाइस अवार्ड जित्न सफल भईन् । उनले ट्रफी, क्राउनसहित इटहरीको फुडसालाबाट १० हजार रुपैयाँको फुड भौचर जितिन् भने उनले ब्युटी विथ अ पर्पस र मिसेस फ्रेन्डसिपको सबटाईटल समेत हात पारिन् । यसैगरी सुस्मा बिस्टले मिसेस फोटोजेनिकको सबटाईटल जितिन् भने सुनिता पुरीले मिसेस ट्यालेन्ट र बेस्ट वाल्कको उपाधि प्राप्त गरिन् ।

ग्राण्ड फिनालेबाट जिकिसा सापकोटाले मिसेस कन्फिडेन्ट र रेस्मा लिम्बुले मिसेस ग्लामरको सबटाईटल जितिन् । प्रतियोगिताको निर्णायक मण्डलमा जय राज रोय, मेरिना लिम्बू, कन्चन झा र नभनित राज प्रधान थिए । ग्राण्ड फिनाले कार्यक्रमको संचालन सजिना श्रेष्ठले गरेकी थिइन् भने प्रतियोगिताको निर्देशक सरोज श्रेष्ठ, कोरियोग्राफर शुभेक्षा कार्की, मिडिया कोअर्डिनेटर सुवास संकल्प श्रेष्ठ, फोटो तथा भिडियोग्राफर रिकेश ब्रजाचार्य र मेकअपमा उर्बि श्रेष्ठ रहेकी थिए ।