विराटचोकः सामान्य उतारचढावका बीच आज शेयर बजार २५ दशमलव ९८ अंकले बढ्दा ४ अर्ब ९ करोड ६१ लाख ९० हजार २ सय ५६ रुपैयाँको शेयर किनबेच भएको छ । नेप्से परिसूचक १ दशमलव ५७ प्रतिशत बढेर १ हजार ६ सय ७८ दशमलव ७९ अंकमा पुगेको छ । कारोबारमा आएका उपसमूहमध्ये जलविद्युत र सामुहिक लगानी कोषको उपसूचक भने घटेको छ ।
कोरोनोविरुद्धको भ्याक्सिनले पूर्णता पाएको खबर तथा अमेरिकामा जो बाइडेन राष्ट्रपति चुनिनुले विश्वभरको शेयर बजार प्रभावित भएको विश्लेषक बताउँछन् । नेपाल टेलिकम, नेपाल लाइफ इन्स्योरेन्स, नेपाल पुनर्बीमा कम्पनीलगायतका कम्पनीहरुमा लगानीकर्ताको आकर्षण बढेको छ ।
आज १ सय ९६ कम्पनीका ९६ लाख ५७ हजार ६ सय ७७ कित्ता सेयर ३८ हजार ६ सय ३४ पटक किनबेच भएको हो । आज पनि नेपाल पुनर्बीमा कम्पनीको सर्वाधिक २८ करोड ५३ लाख ३२ हजार १ सय ५१ रुपैयाँको शेयर किनबेच भएको छ । नेपाल लाइफ इन्स्योरेन्सको २३ करोड ५८ लाख, हिमालयन डिस्टिलरीको २० करोड ८३ लाख र नेपाल टेलिकमको २० करोड ६४ लाख रुपैयाँको शेयर किनबेच भएको छ । ८ कम्पनीको १० लाखभन्दा बढीको कारोबार भएको थियो । आज ४ अर्ब ९ करोड ६१ लाख ९० हजार २ सय ५६ रुपैयाँको शेयर किनबेच भएको छ ।
आज कर्पोरेट डेभलपमेन्ट बैंक, साल्ट ट्रेडिङ र सानिमा जनरल इन्स्योरेन्सको शेयरमूल्यमा १० प्रतिशत बढ्दा नेपाल टेलिकमको शेयरमूल्य पनि साढे ९ प्रतिशतले बढेको थियो । विशालबजार कम्पनीको शेयरमूल्य भने साढे ४ प्रतिशतले घटेको छ ।
यस वर्षकै उच्च अंकमा पुगेको शेयर बजारसँगै सेन्सेटिभ इन्डेक्स पनि १ दशमलव ५५ प्रतिशत नै बढेको छ । बजार बढेसँगै समग्र बजार पूँजीकरण २२ खर्ब ४९ अर्ब कायम भएको छ ।
You must be logged in to post a comment Login