विराटनगरः १ नम्बर प्रदेश प्रहरी कार्यालयद्वारा आयोजित कार्य सम्पादन सम्झौता प्रगति समीक्षा कार्यान्वयनको चौमासिक कार्यक्रम १ नम्बर प्रदेश प्रहरी तालिम केन्द्र रानीको प्राङ्गणमा सम्पन्न भएको छ ।
प्रदेश प्रहरी कार्यालय विराटनगरका कार्यालय प्रमुख प्रहरी नायब महानिरीषक ईश्वरबाबु कार्कीको प्रमुख आतिथ्यतामा एक दिने कार्यक्रम सम्पन्न भएको हो ।
कार्यक्रममा संघीय प्रहरी ईकाई कार्यालय धरानका प्रमुख प्रहरी वरिष्ठ उपरीषक राजेन्द्र प्रसाद चौधरी, प्रदेश ट्राफिक प्रहरी कार्यालय ईटहरी, सशस्त्र प्रहरी गण मुख्यालय रानी, दंगा नियन्त्रण प्रहरी गण दुहबी, जिल्ला प्रहरी कार्यालय झापा, मोरङ, सुनसरी, इलाम, धनकुटा र उदयपुरका कार्यालय प्रमुख प्रहरी उपरीक्षकहरु र प्रदेश प्रहरी तालिम केन्द्र रानीका सह समादेशक प्रहरी नायब उपरीक्षकको सहभागिता रहेको थियो ।
सो कार्यक्रममा उपस्थित सबै कार्यालय प्रमुखहरूले चार महिनाको आआफ्नो कार्य सम्पादनको प्रगति विवरण प्रस्तुत गरेका थिए । सोही अवसरमा प्रहरी नायब महानिरीक्षक कार्कीले कार्य सम्पादनको समीक्षा गर्दै देखिएका कमी कमजोरीलाई औँल्याउँदै सबैले आफ्नो स्थानबाट आत्मसमीक्षा गरी जनमानसमा प्रभावकारी ढंगबाट प्रहरी सेवा प्रदान गर्न निर्देशन दिए ।
सो क्रममा प्रहरी नायब महानिरीक्षक कार्कीले प्रहरी हवल्दार तथा जवान लक्षित उत्प्रेरणा अभिवृद्धि २०७७ लाई अक्षरशः पालना गर्न र गराउन एवम् संगठन प्रमुख प्रहरी महानिरीक्षकले अवलम्बन गरेका कार्ययोजना र कार्यादेशको अक्षरशः पालना गर्दै संगठनको व्यवसायिक हितमा लाग्न निर्देशन दिएका थिए ।
संघीय प्रहरी ईकाई कार्यालय धरानका प्रमुख प्रहरी वरिष्ठ उपरीक्षक चौधरीले अपराध तथ्याङ्क विश्लेषण प्रस्तुति तथा अपराध अनुसन्धानमा देखिएका कमी कमजोरीमाथि प्रकाश पार्दै वस्तुनिष्ठ र पारदर्शी अपराध अनुसन्धानमा सबै प्रहरी व्यवसायिक रूपले कर्तव्यनिष्ठ भई काम गर्नुपर्ने बताएका थिए ।
बाँकी रहेका जिल्ला प्रहरी कार्यालयका प्रमुखहरुसँग चाँडै भिडियो कन्फ्रेन्स मार्फत् कार्यसम्पादन सम्झौता प्रगति समीक्षासम्बन्धी छलफल गरिने बताइएको छ ।
You must be logged in to post a comment Login