विराटचोकः नेपाली शेयर बजार परिसूचक नेप्से छोटो समयमा नै बढेर हालसम्मकै उच्च बिन्दुमा पुगेको छ । योसँगै नेपाली शेयर बजारमा नयाँ कीर्तिमान कायम भएको छ ।
आज नेप्से सूचक र कारोबार रकम दुवैले ‘अल टाइम हाइ रेकर्ड’ बनाएका हुन् । यसअघि ०७३ साल साउन १२ गते नेप्से सर्वाधिक १ हजार ८ सय ८१ दशमलव ४५ बिन्दुमा पुगेको थियो । आज नेप्से सूचक १ हजार ९ सय २६ विन्दुसम्म पुगेको थियो ।
लगानीकर्ता नेपाली शेयर बजारप्रति विश्वस्त हुँदै शेयर किनबेचमा लागेपछि नेप्सेले नयाँ रेकर्डहरु बनाउँदै गइरहेको छ ।
अझै पनि सेयर बजारमा सबैभन्दा धेरै हिस्सा ओगट्ने समूहको भाउ नबढेकाले बजार अझै धेरै माथि जान सक्ने कतिपय विश्लेषकहरुको भनाइ छ । बुलिस प्रवृत्तिमा रहेको बजारले लगानीकर्तालाई आशावादी बनाएको छ ।
बिहीबार नेप्से सूचक १८ दशमलव ४३ अंकले बढेर १ हजार ८ सय ९३ दशमलव २४ बिन्दुमा अडिएको छ । २ सय १ कम्पनीको ७० हजार ३ पटकको कारोबारबाट ७ अर्ब ६१ करोड ३० लाख ३० हजार ९१ रुपैयाँको शेयर किनबेच भएको छ । १ करोड ७१ लाख ८८ हजार ९९ कित्ता सेयर कारोबार भएको बजारमा १२ समूहमध्ये ५ वटा समूह बढेका छन् । एनएमबि माइक्रोफाइनान्स, पाँचथर पावर कम्पनी, हिमालयन ऊर्जा र आँखुखोला जलविद्युत कम्पनीको शेयरमूल्य १० प्रतिशतले बढेको छ ।
बजारले यसअघिको रेकर्ड ब्रेक गरेको दिन बिहीबार यसअघि निरन्तर १० प्रतिशतका दरले शेयरमूल्य बढेको साल्ट ट्रेडिङको भाउ सबैभन्दा धेरै ६ दशमलव १८ प्रतिशतले घटेको छ । ङादी गु्रप, बोटलर्स नेपाल तराई र सांग्रिला डेभलपमेन्ट बैंकको ५ प्रतिशतभन्दा बढी शेयरमूल्य झरेको छ ।
नेपाल पुनर्बिमा कम्पनीको सबैभन्दा धेरै ५८ करोड १३ लाख १७ हजार, नबिल बैंकको ३८ करोड ३४ लाख ४१ हजार र शिवम् सिमेन्ट्सको २८ करोड ९१ लाख ९५ हजार रुपैयाँको शेयर किनबेच भएको छ ।
बजार मापक नेप्से सूचक उच्च बिन्दुमा पुगेसँगै समग्र बजार पूँजीकरण २५ खर्ब ३७ अर्ब कायम भएको छ ।
सम्बन्धित समाचारहरुः
नेप्से १९०० भन्दा माथि, ‘अल टाइम हाइ रेकर्ड’ पनि ब्रेक
You must be logged in to post a comment Login