विराटचोकः नझरेका फूलहरु पलेँटी साँझको १९ औँ शृङ्खला शुक्रबार साँझ सम्पन्न भएको छ । स्वर सम्राट नारायण गोपालको ३० औँ स्मृति दिवसमा आयोजना गरिएको कार्यक्रममा गायक राज सिग्देलले नारायण गोपालका कालजयी गीत गाएका थिए । यस्तै कार्यक्रममा लोकप्रिय गायिका प्राश्ना शाक्यलाई नझरेका फूलहरुद्वारा सम्मान गरिएको थियो । धरानमा जन्मिएर नेपाली साङ्गितिक क्षेत्रमा पुर्याएकाे याेगदानकाे कदर गर्दै सम्मान गरिएकाे हाे ।  ए वान पिज्जा हाउस मुख्य प्रायोजक रहेको कार्यक्रममा प्रमुख अतिथि सुन्दरहरैंचा नगरपालिकाका नगरप्रमुख शिवप्रसाद ढकाल रहेका थिए ।

कलाकारलाई दर्शक स्रोता सामु परिचित गराउँदै मोरङको सुन्दरहरैंचालाई साहित्य र कलाको क्षेत्रमा राष्ट्रिय, अन्तर्राष्ट्रिय स्तरमा लोकप्रिय बनाउनका निम्ति विराटचोकमा यस्तो कार्यक्रम गर्दै आएको नझरेका फूलहरुका प्रस्तोता केपी घिमिरेले बताए ।

विश्वमा फैलिएको कोरोना भाइरसका कारण धेरै समयपछि कलाकार र दर्शक, स्रोताबीचको भेट विशेष रहेको थियो । कार्यक्रमको तबला बादकमा विपी सिंह र गितारमा विकास सुनार रहेका थिए । कला साहित्यका पारखी दर्शक धरान, बिर्तामोड, दमक, विराटनगर, इटहरी, पथरी, मिक्लाजुङ, बेलबारीलगायत ठाउँबाट समेत आएका थिए । कार्यक्रम संयोजक कवि छवि वैरागी घिमिरेले कार्यक्रममा उपस्थितलाई स्वागत गरेका थिए ।

कवि मनु मञ्जिलले दुःखको बेलामा पनि विशेष कार्यक्रम आयोजना हुनु सुखद पक्ष भएको बताए । ‘जब कला, गीत, साहित्य संगीतको सफल उपस्थिति हुन्छ त्यो बेलामा शत्रु भए शत्रु पनि बिर्सन्छौँ’, मञ्जिलले भने, ‘ऋण भए ऋण पनि बिर्सिएर हामीभित्रको मानव हाँसेर बिउँझने गर्छ ।’
गायक सिग्देलले महिनैपिच्छे यस्ता कार्यक्रममा बस्ने बानी भएको तर महामारीले गर्दा धेरै समयपछि माइक्रोफोन समात्न पाएको र यसरी दर्शक सामु उपस्थित हुन पाउँदा खुसी लागेको बताए । आफ्ना अनुभव सुनाउँदै उनले नारायण गोपाल, भक्तराज आचार्य, तारादेवी, रामकृष्ण ढकालका गीत र केही आफ्ना लोकप्रिय गीत प्रस्तुत गरेका थिए ।

कार्यक्रमका प्रमुख अतिथि ढकालले आआफ्नो विषयमा सबैले योगदान गर्नुपर्ने बताउँदै जो जहाँ जुन क्षेत्रमा लागे पनि त्यहाँ अब्बल विषयको ज्ञान लिएर अगाडि बढेमा गन्तव्यमा पुगिने बताए । नगरले साहित्य कलाका क्षेत्रमा बजेट विनियोजन गरेको र यस क्षेत्रलाई अघि बढाउन हरदम लागिपर्ने उनले बताए ।

यस्तै गायक दुर्गा पराजुलीले पनि सम्झनामा नारायण गाेपालकाे एउटा गीत प्रस्तुत गरेका थिए ।  कार्यक्रमको प्रयोजक आर एन जी ग्रुप विराटचोक, गोकुलम रिसोर्ट, जय दुर्गे इलेक्ट्रोनिक्स, महालक्ष्मी ट्रेर्डस रहेका थिए । एपी वान पिज्जा हाउस बुधबारेमा भएको कार्यक्रको सभापतित्व कार्यक्रमको मुख्य प्रायोजक रहेको पिज्जा हाउसका सञ्चालक ज्ञनबहादुर थापा रहेका थिए ।