विराटचोकः साताको पहिलो दिन आज नेप्सेले गत बिहीबारको अल टाइम हाइको रेकर्ड तोडेको छ । आज नेप्से ८८.१२ अंक बढेर २१७५.३९ अंकमा बन्द भएको छ । गत बिहीबार नेप्से २०८७.२७ अंकमा बन्द भएर गत मंसिर १७ गतेको अलटाइम हाइको रेकर्ड तोडेको थियो ।

आज सेन्सेटिभ इण्डेक्स १७.१८ अंक बढेर ४१५.८८ अंकमा पुगेको छ । नेप्सेले आज बिहीबारको इन्ट्रा डे अलटाइम हाइ २१२८.८५ विन्दुलाई तोडेर २१७५.९६ को नयाँ रेकर्ड पनि बनाएको छ ।

बजार बढेसँगै कारोबार रकममा पनि सुधार आए पनि अपेक्षाकृत रुपमा नबढेको लगानीकर्ताको भनाइ छ । आज २ सय १२ कम्पनीको ५४ हजार ६ सय ९८ पटकको कारोबारबाट ६ अर्ब ३४ करोड ४० लाख १७ हजार ८ सय ८८ रुपैयाँको १ करोड ४० लाख २६ हजार ८ सय ८६ कित्ता शेयर किनबेच भएको छ ।

आज सबै उपसमूहको परिसूचक बढ्दा व्यापार उपसमूहको परिसूचक सर्वाधिक ९.६४ प्रतिशत बढेको छ भने अन्य उपसमूहको परिसूचक ६.१९ प्रतिशत बढेको छ । त्यसैगरी, बैंकिङ, उत्पादन तथा प्रशोधन र जीवन बीमा उपसमूहको परिसूचक ४ प्रतिशतभन्दा बढी बढेको छ ।

कारोबार रकमका आधारमा नेपाल लाइफ इन्स्योरेन्स अगाडि छ । सो कम्पनीको ५० करोड ९५ लाख ७५ हजार २ सय २८ रुपैयाँको शेयर किनबेच हुँदा प्राइम कमर्सियल बैंकको ५० करोड २६ लाख २ हजार ७ सय ९८ रुपैयाँको शेयर किनबेच भएको छ । नेपाल टेलिकम, नेपाल पुनर्बीमा कम्पनी र एनआईसी एशिया बैंक उच्च कारोबार हुने कम्पनीमा परेका छन् ।

प्राइम कमर्सियल बैंकको सबैभन्दा धेरै ११ लाख १८ हजार ९८ कित्ता शेयर किनबेच भएको छ । कुमारी बैंकको ५ लाख २४ हजार र प्रभु बैंकको ५ लाख ४ हजार कित्ताभन्दा धेरै शेयर किनबेच भएको छ ।

सबैभन्दा धेरै प्राइम कमर्सियल बैंकको ३ हजार १ सय ४ पटक कारोबार भएको छ । नेपाल पुनर्बीमा कम्पनीको २ हजार ४ सय ७६ पटक, नेपाल लाइफ इन्स्योरेन्सको १ हजार ८ सय ९२ र नेपाल टेलिकमको १ हजार ८ सय ३२ पटक शेयर किनबेच भएको थियो ।

हिमालयन डिष्टिलरी, साल्ट ट्रेडिङ कर्पोरेशन, नेपाल पुनर्बीमा कम्पनी र प्राइम कमर्सियल बैंकको साधारण तथा संस्थापक शेयरको मूल्य १० प्रतिशतले बढेको बजारमा राधी विद्युत कम्पनीको शेयरमूल्य भने सबैभन्दा धेरै ४.२९ प्रतिशत घटेको छ । त्यस्तै, शिवश्री हाइड्रोपावर र युनाइटेड फाइनान्सको शेयरमूल्य पनि ३ प्रतिशतभन्दा बढी घटेको छ ।

बजार बढेसँगै समग्र बजार पूँजीकरण २९ खर्ब २७ अर्ब कायम भएको छ ।