विराटनगरः १ नम्बर प्रदेशका झापा र मोरङ जिल्लाका छुट्टाछुट्टै स्थानबाट शनिबार दिउँसो ब्राउन सुगर र ट्याब्लेटसहित ६ जना पक्राउ परेका छन् ।
लागूऔषध नियन्त्रण ब्युरो विराटनगरबाट खटिएको प्रहरी टोलीले शनिबार दिउँसो दमक नगरपालिका–७ का ३६ वर्षीय किसन अग्रवाललाई ३ ग्राम १६ मिलिग्राम ब्राउन सुगरसहित विराटनगर–१४ जतुवाबाट पक्राउ गरेको हो । विशेष सूचनाको आधारमा खटिएको प्रहरी टोलीले मे १ च २८६२ नम्बरको कारमा सवार रहेका अग्रवाललाई रोकेर चेकजाँच गर्ने क्रममा निजको साथबाट उक्त परिणामको लागूऔषध बरामद गरेको थियो ।
यसैगरी, विराटनगर महानगरपालिका–१६ दरैया बस्तीबाट ट्याब्लेटसहित ४ जना पक्राउ परेका छन् । इलाका प्रहरी कार्यालय रानीबाट खटिएको प्रहरी टोलीले सुनसरीको धरान उपमहानगरपालिका–१५ का २१ वर्षीय विशाल बि.क., धरान–२ का २६ वर्षीय विकास कट्वाल, रामधुनी नगरपालिका–५ का ४२ वर्षीय रमेश लिम्बू र वराह नगरपालिका–५ का २० वर्षीय निकेश श्रेष्ठ पक्राउ परेका हुन् । उनीहरुको साथमा लुपिजेसिक १६ एम्पुल, फेनारगन १६ एम्पुल र एभिल १६ एम्पुल फेला परेको प्रहरीले जनाएको छ ।
यस्तै, झापाको मेचीनगर नगरपालिका–१० धुलाबारीबाट लागूऔषध ब्राउन सुगरसहित १ जना पक्राउ परेका छन् । इलाका प्रहरी कार्यालय धुलाबारीबाट खटिएको प्रहरी टोलीले स्थानीय २३ वर्षीय अनिल सहनीलाई २ ग्राम ब्राउन सुगरसहित शनिबार दिउँसो पक्राउ गरेको हो । पक्राउ परेका उनीहरुको सम्बन्धमा थप अनुसन्धान भइरहेको प्रहरीले जनाएको छ ।
You must be logged in to post a comment Login