विराटचोकः गौरी इन्टरनेसनल टेक्निकल एकेडेमी प्रा.लि.को प्राविधिक सहयोगमा सुन्दरहरैंचामा सञ्चालित टेलरिङ, मन्टेश्वरी शिक्षण, मोटरसाइकल मर्मत, ब्युटिसियन र इलेक्ट्रिसियनमा गत आर्थिक वर्षमा १ सय ४० जना र यस वर्ष ८० जना गरी २ सय २० जनाले तीन महिना निःशुल्क तालिम लिएका छन् । तालीम लिएका उनीहरु तथा व्यवसायी बनेकाहरुलाई बधाई दिँदै राष्ट्रिय सीप प्रमाणपत्र प्रमुख अतिथि सुन्दरहरैंचाका मेयर शिवप्रसाद ढकालको हातबाट वितरण गरिएको छ ।

त्यस्तै यस आर्थिक वर्षका प्रशिक्षार्थीलाई शुभकामनासहित प्रमाणपत्र वितरण गरिएको छ । अति विपन्न परवारका १५ जना आमा र १५ जना बच्चाको लागि न्यानो कपडा पनि वितरण गरिएको छ । हेल्भाटास नेपालको प्राविधिक सहयोग तथा सुन्दरहरैंचा नगरपालिकाको सहयोगमा तालीम सम्पन्न भएको हो ।

सो तालीमबाट ३ जना सफल प्रशिक्षार्थी टेलरिङतर्फ छनोट भएका छन् । बेलबारी नगरपालिकाकी अम्बिका गिरी, लेटाङकी गोमा भट्टराई र सुन्दरहरैंचकी विष्णु सुवेदी प्रशिक्षक चयन भएका छन् । ब्युटीपार्लरतर्फ सुन्दरहरैंचामा मीरा श्रेष्ठ र ममता श्रेष्ठ, वेल्डिङ इलेक्ट्रिसियनतर्फ गणेश धमला र रमेश भट्टराई तथा बेमौसमी तरकारी खेतीमा यशोदा पौडेल प्रशिक्षक रहेका छन् ।

तालीम संयोजक जानुका निरौलाको अध्यक्षतामा भएको कार्यक्रममा प्रमुख अतिथि सुन्दरहरैचा नगरपालिकाका प्रमुख शिवप्रसाद ढकाल रहेका थिए । विशिष्ट अतिथिमा उपप्रमुख धनमाया तामाङ तथा अतिथिहरुमा वडा नं ८ का वडाध्यक्ष खेमप्रसाद न्यौपाने, वडा नं ११ का वडाध्यक्ष बिसनलाल चौधरी, कार्यापालिका सदस्यहरु उर्मिला शर्मा रिजाल, हेमा बि.क, समाजसेवी मुना गजुरेल, बिन्दा दाहाल थापा, जनचेतना सामुदायिक वनका अध्यक्ष पुष्प भुजेललगायत रहेका थिए ।