विराटनगरः झापा र मोरङ जिल्लाका विभिन्न स्थानबाट खैरो हेरोइन र ट्याब्लेटसहित ८ जना पक्राउ परेका छन् । मोरङको रतुवामाई नगरपालिका–४ आमबारीबाट हिजो अपराहन्न साढे ४ बजे खैरो हेरोइनसहित २ जना पक्राउ परेका छन् ।
पक्राउ पर्नेमा रतुवामाई–२ झुर्कियाका ४२ वर्षीय मोहम्मद रफिक मिया र भारतको अररिया जिल्ला कुचहा धाताका २२ बर्षीय मोहम्मद नवाब आलम रहेका छन् । बीआर ३७ यु ५८२३ नम्बरको गाडीमा सवार रहेका थिए । उनीहरुलाई नियान्त्रणमा लिई शरीर जाँच गर्दा १ सय २६ ग्राम १४ मिलिग्राम खैरो हेरोइन फेला पारी बरामद गरिएको जिल्ला प्रहरी कार्यालय मोरङले जनाएको छ ।
यसैगरी, झापाको मेचीनगर नगरपालिका–६ बाट पनि खैरो हेरोइनसहित २ जना पक्राउ परेका छन् । सोमबार बेलुका ६ बजे धरान उपमहानगरपालिका–१७ का २४ वर्षीय ईश्वर थापा र पाँचथरको हिलिहाङ गाउँपालिका–२ का २८ वर्षीय अरुण सुब्बालाई ५० ग्राम खैरो हेरोइनसहित पक्राउ गरी थप अनुसन्धान भइरहेको इलाका प्रहरी कार्यालय काँकरभिट्टाले जनाएको छ ।
इलाका प्रहरी कार्यालय दमकबाट खटिएको प्रहरी टोलीले दमक नगरपालिका–३ का २० वर्षीय समीर तामाङ र २२ वर्षीय नवीन लिम्बूलाई १ ग्राम ६ सय मिलिग्राम खैरो हेरोइनसहित सोमबार अपराहन्न ५ बजे बेलडाँगीबाट पक्राउ गरेको हो ।
यसैगरी, लागूऔषध नियन्त्रण ब्युरो काँकरभिट्टाबाट खटिएको प्रहरी टोलीले बुद्धशान्ति गाउँपालिका–४ का २२ वर्षीय प्रवेश माझीलाई ६ ग्राम खैरो हेरोइनसहित पक्राउ गरेको छ । विशेष सूचनाको आधारमा खटिएको प्रहरी टोलीले सोमबार दिउँसो माझीलाई किरात चोकबाट पक्राउ गरेको हो ।
यस्तै, इलाका प्रहरी कार्यालय काँकरभिट्टाबाट खटिएको प्रहरी टोलीले दमक नगरपालिका–५ का १५ वर्षीय रमेश राजवंशीलाई लागूऔषध लुपिजेसिक ३० बोतल, डाइजोपिन ३० बोतल र प्रोमोथाइजिन ३० बोतल बरामद गरेको जनाएको छ । मेचीनगर नगरपालिका–६ बाट उनी पक्राउ परेका थिए । लागूऔषधसहित पक्राउ परेका आठै जनाको सम्बन्धमा प्रहरीले थप अनुसन्धान गरिरहेको जनाएको छ ।
You must be logged in to post a comment Login