विराटनगरः चालु आर्थिक बर्षको ६ महिनामा ३ हजार ३ सय १४ मुद्दा दर्ता हुँदा १८ करोड भन्दा बढी राजस्व संकलन भएको प्रदेश प्रहरी कार्यालयले जनाएको छ । प्रहरी महानिरीक्षक र प्रदेश प्रहरी नायब महानिरीक्षक तथा प्रदेश प्रहरी प्रमुख र प्रदेशका १४ वटै जिल्लाका प्रहरी प्रमुखहरुबीच कार्य सम्पादन सम्झौताको प्रभावकारी कार्यान्वयन हुँदा सो सफलता मिलेको प्रहरीले बताएको छ ।

संगठन प्रमुखको निर्देशनलाई पालना गर्ने र गराउनेतर्फ विशेष ध्यान दिई समाजमा हुने आपराधिक घटना, फैसला कार्यान्वयन, भन्सार चोरी निकासी, नदीजन्य पदार्थ अवैध दोहन, अवैध काठ चोरी निकासी र ट्राफिक व्यवस्थापनमा प्रभावकारी रुपमा प्रहरी परिचालन भएअनुसार उल्लेख्य मात्रामा सफलता मिलेको प्रहरीको भनाइ छ । चालु आर्थिक वर्षको ६ महिनामा मात्र ३ हजार ३ सय १४ वटा विभिन्न अपराधसम्बन्धी मुद्दा दर्ता भई कारवाही गरिसकिएको र फैसला कार्यान्वयन तर्फ विभिन्न अपराधमा सजाय तथा जरिवाना फैसला भई फरार रहँदै आएका ४ सय १७ जना फरार प्रतिवादी पक्राउ गरी ५ सय ३६ वर्ष कैद भुक्तान भई १ करोड ५२ लाख ७० हजार ९ सय ८२ रुपैयाँ राजस्व संकलन भएको बताइएको छ ।

यसैगरी, लागूऔषध नियन्त्रणतर्फ विशेष ध्यान दिई व्यापक रुपमा प्रहरी परिचालन गरेअनुसार १ हजार १ सय ६४ ग्राम लागूऔषध ब्राउन सुगर र ३ सय ३६ दशमलव १२ केजी गाँजा बरामद भएको बताइएको छ । मनोद्वीपक क्याप्सुल २८ हजार ५ सय ५० ट्याब्लेट बरामद भएको तथा मनोद्वीपक सुई ३ हजार ९ सय ५८ एम्पुल बरामद भएको प्रहरीको तथ्यांकमा छ । विभिन्न किसिमका मनोद्वीपक औषधीहरु १ हजार ६ सय २० ट्याब्लेट बरामद भएको उल्लेख गरिएको छ ।

यसैगरी, २ हजार ३ सय ६२ रोपनीमा लगाएको गाँजा खेती र ८ लाख २७ हजार २ सय ६६ गाँजाका बोट नष्ट गरिएको प्रहरीले सार्वजनिक गरेको तथ्यांकमा उल्लेख छ ।

अवैध चोरी निकासी गर्ने ८० जना मानिस पक्राउ गर्दा ७ करोड ९९ लाख ८ हजार १ सय ५ रुपैयाँ राजस्व संकलन भएको छ । नदीजन्य पदार्थको अवैध दोहन गर्ने १ सय १९ जना मानिस र ५ सय ४० वटा नदीजन्य पदार्थ उत्खनन गर्ने र ओसारपसार गर्ने सवारी साधनलाई पक्राउ गर्नुका साथै ३७ लाख ७५ हजार ७ सय २० रुपैयाँ राजस्व संकलन भएको जनाइएको छ ।

अवैध रुपमा काठ चोरी निकासी गर्ने ३६ जना मानिस पक्राउ पर्नुका साथै १ हजार ५ सय ६९ क्यु.फिट. काठ बरामद गर्दा २० लाख ६५ हजार ९ सय ८० रुपैयाँ राजस्व संकलन भएको छ ।

ट्राफिक व्यवस्थापनतर्फ चालु आर्थिक वर्षको ६ महिनामा मात्र ट्राफिक नियम उल्लंघन गर्ने १ लाख २४ हजार ८ सय ८९ वटा सवारी साधनलाई कारवाही गर्दा ७ करोड ६८ लाख ४९ हजार ५ सय रुपैयाँ राजस्व संकलन भएको बताइएको छ । जम्मा १८ करोड २२ लाख ४ हजार ४ सय ७७ रुपैयाँ राजस्व संकलन भएको प्रहरीको तथ्यांकले देखाउँछ ।