विराटचोकः मोरङको सुन्दरहरैँचा–८ सलकपुरमा रहेको महिला सेवा समाजले ज्येष्ठ नागरिकलाई सम्मान गरेको छ ।

सम्मान कार्यक्रममा प्रदेश सांसद लोकप्रसाद सङ्ग्रौला प्रमुख अतिथि तथा सुन्दरहरैंचा नगरपालिकाका प्रमुख शिविप्रसाद ढकाल विशिष्ट अतिथि रहेका थिए । नेपाली काङ्ग्रेस सुन्दरहरैँचा नगर सभापति कृष्णबहादुर लिम्बू, नेपाल महिला संघ क्षेत्रीय सभापति कमलादेवी अधिकारी, नेपाल महिला संघकी मुना गजुरेल र अनिता ज्ञवाली, सहकारीकर्मी श्यामकुमार आचार्य, समाजसेवी कृष्णप्रसाद बास्तोला, हरि पौडेल, कृष्ण लामिछानेलगायत उपस्थित थिए ।

प्रमुख सङ्ग्रौलाले संस्थाले आयोजना गरेका हरेक कार्यक्रममा आफूले सक्ने जुनसुकै सहयोग गर्न पछि नपर्ने बताए । महिला समाजकै शक्ति भएकाले महिलाले हरेक क्षेत्रमा नेतृत्वदायी भूमिका अवलम्बन गर्न सक्नुपर्ने उनको भनाइ थियो ।

नगरप्रमुख शिवप्रसाद ढकालले संस्थाले गर्ने हरेक गतिविधिमा नगरपालिकाले आवश्यक सहयोग गर्ने बताए । समाजकै निम्ति हरपल लागिपरेका हरेक संघ संस्थालाई सहयोग गरेको उनको भनाइ थियो । विभिन्न सीपमूलक तालीम, गोष्ठी, अन्तरक्रिया आदि गतिविधि गरेर समाजमा परिणाम देखिने गरी काम गर्न र नगरभरी एउटा छुट्टै पहिचान कायम गर्दै उत्कृष्ट संस्थाका रूपमा संस्था देखा पर्न सकोस् भनी उनले शुभकामना दिए ।

महिला नेतृ मुना गजुरेलले समाजमा महिलाको अहम भूमिका र नेतृत्व अपरिहार्य भएको उल्लेख गर्दै हरेक संघ संस्थामा महिला स्वयं जागरुक भएर अगाडि बढ्न सक्नुपर्ने बताइन् ।

महिला नेतृ कमलादेवी अधिकारीले महिलाले चाहे असम्भव केही नभएको बताउँदै महिलाबाट मात्रै राष्ट्रहित र विकास सम्पन्न हुने बताइन् । नारी सृष्टिकर्ता भएकाले नारीको उपस्थितिबिनाको समाजको कल्पनै गर्न नसकिने उनको भनाइ थियो ।

कार्यक्रममा सहकारीकर्मी श्यामकुमार आचार्यले पनि आफ्नो धारणा राखेका थिए ।

संस्थाकी अध्यक्ष मञ्जु रेग्मीले सबै महिला साथीहरूको सहयोगमा धेरै दुःखले संस्था स्थापना गरेको स्मरण गर्दै समाजसेवाका क्षेत्रमा रातदिन नभनी काम गर्ने प्रतिबद्धता व्यक्त गरिन् । नगरभरी परिणाम देखिने गरी महिलाका क्षेत्रमा काम गर्न आफू तयार रहेको उनको भनाइ थियो । आफू व्यक्तिगत भन्दा पनि समाजका निम्ति हरपल सोच्ने भावना र रूचिबाट अभिप्रेरित भएकी हुनाले आफ्नो जीवन नै समाजका निम्ति अर्पण गरेको उनले बताइन् ।

कार्यक्रममा सो समाजका १० जना ज्येष्ठ नागरिकलाई खादा तथा दोसल्ला ओढाएर सम्मान गरिएको थियो ।