विराटचोकः इन्द्रपुर जेसीजको पुरस्कार वितरण तथा १९ औँ पदस्थापन कार्यक्रम सम्पन्न भएको छ । शनिबार इन्द्रपुर जेसीज मंगल स्मृति सामुदायिक भवनमा सो कार्यक्रम सम्पन्न भएको हो ।

इन्द्रपुर जेसीज वर्ष २०२० का अध्यक्ष गणेशप्रसाद भट्टराईले वर्ष २०२१ का अध्यक्ष कृष्णप्रसाद ओझालाई गलामा लगाएको चेन लगाइदिएर पद हस्तान्तरण गरेका हुन् ।

त्यस्तै, जुनियर जेसीजतर्फ अध्यक्ष टेकराज तिम्सिनाले वर्ष २०२१ का अध्यक्ष प्रान्जल ढकाललाई चेन हस्तान्तरण गरेका हुन् ।

उपाध्यक्ष, कार्यकारी उपाध्यक्ष, महासचिव लगायत अन्य पदाधिकारीहरुले पनि वर्ष २०२१ का पदाधिकारीहरुलाई पद हस्तान्तरण गर्दै जेसीजको कार्य र आस्थाअनुरुप काम गर्न आग्रह गरी पद तथा गोपनीयताको शपथ ग्रहण समेत गराएका थिए ।

कार्यक्रमको प्रमुख अतिथि सुन्दरहरैंचा नगरपालिकाका नगरप्रमुख शिवप्रसाद ढकाल रहेका थिए । विशिष्ट अतिथि बेलबारी नगरपालिकाका प्रमुख ज्ञानेन्द्र सुवेदी रहेका थिए । अतिथिहरूमा सुन्दरहरैंचा नगरपालिकाकी उपप्रमुख धनमाया तामाङ, सुन्दरहरैंचा उद्योग वाणिज्य संघका अध्यक्ष नवराज चापागाईंलगायत रहेका थिए । विभिन्न शाखाका अध्यक्षहरूको समेत कार्यक्रममा उपस्थिति रहेको थियो ।

२००२ सालमा स्थापना भएको इन्द्रपुर जेसीजले समाजमा रहेका विभिन्न व्यक्तिहरुलाई स्मृति अवार्ड समेत प्रदान गरेको छ । वर्ष २००९ का अध्यक्ष रमेश खड्काले स्थापना गरेको डि. रत्न स्मृति अवार्ड सुन्दरहरैंचा भित्र खेलकुदको विकासमा महत्वपूर्ण भूमिका निर्वाह गर्ने दुर्गाकुमार श्रेष्ठलाई प्रदान गरिएको थियो ।

यसैगरी इन्द्रपुर जेसीजका संस्थापक सदस्य रामकृष्ण खड्काले स्थापना गरेको मातृका खड्का स्मृति छात्रवृत्ति शिक्षा निकेतन मावि सुन्दरहरैंचा– ८ मा कक्षा ३. मा अध्ययनरत योगराज पराजुलीलाई प्रदान गरिएको छ ।

इन्द्रपुर जेसीज वर्ष २००५ का अध्यक्ष शिवप्रसाद ढकाल, वर्ष २०११ का अध्यक्ष यज्ञप्रसाद ढकाल र वर्ष २०१७ का अध्यक्ष शारदाप्रसाद ढकालले संयुक्त रुपमा स्थापना गरेको कृष्ण विन्दा आउटस्टेण्डिङ जेसीज अवार्ड युजिन आचार्यलाई प्रदान गरिएको छ ।

यस्तै, वर्ष २०१२ का अध्यक्ष नारायण कार्कीले स्थापना गरेको नरदेवी अवार्ड रमेश खतिवडालाई प्रदान गरिएको छ ।

साेहि समाराेहकाे अवसरमा नव निर्मित इन्द्रपुर जेसीज सचिवालय भवनकाे उद्घाटन समेत गरिएकाे छ । भवनकाे उद्घाटन नगरप्रमुख शिवप्रसाद ढकालले गरेका हुन् ।