काठमाडौंः पर्यटन विभागले सबै स्तरका रिसोर्ट, तारे होटल र सबै स्तरका बुटिक होटेलका लागि संकेत चिह्न निर्धारण गर्ने भएको छ । साथै सबै होटलले पहिचान दिने संकेत चिन्ह अनुसारको साइनबोर्ड होटेलको गेटमै राख्नु पर्ने भएको छ ।

आफू कुन संघसँग सम्बन्धित हो, त्यसको आबद्धता पनि रहेको संघको समेत चिन्ह बोर्डमै राख्नुपर्ने गरी विभागबाट निर्णय भएको छ । विभागका अनुसार एकतारेदेखि पाँचतारेसम्मका होटलको संकेत चिन्ह क्रमशः एकतारा देखि पाँच तारासम्म हुनेछ । पाँचतारा डिलक्स होटलका लागि पाँचतारा र डिलक्स शब्द राख्नु पर्ने भएको छ ।

साधारण हेरिटेज बुटिक होटलको न्यूनतम स्तर तीन तारे हुने भएको छ । रिसोर्टतर्फ साधारण रिसोर्टले तीन तारे स्तरको मान्यता पाएको छ । डिलक्सले चार तारा र लक्जरी रिसोर्टले पाँच तारा पाउने भएका छन् ।

पर्यटक स्तरका होटलको संकेत चिन्ह ‘टीएस’, मोटेलको संकेत चिन्ह ‘एम’ र ‘पर्यटक इन’ स्तरमा वर्गीकरण भई सञ्चालनमा रहेका होटेलले भने ‘आइ’ संकेत चिन्ह प्रयोग गर्नुपर्ने भएको छ । बेड एण्ड ब्रेक फास्टका रुपमा दर्ता भएका होटेलहरुको संकेत चिन्ह गोलाकार घेरा भित्र रातो रंगमा ‘बीएण्डबी’ लेखेर प्रवेशद्वारमै साइनबोर्ड राख्नुपर्ने भएको छ ।

यसका साथै साइनबोर्डको माथिल्लो भागमा नेपालको रंगीन निशाना छाप राखेर त्यसको मुनि तोकिएको संख्यामा रहेका रातो रङंका तारा र संकेत जनाउने चिन्ह राख्नुपर्ने भएको छ । त्यसको मुनी कालो रंगको धर्का राखेर त्यसको तल होटलको नाम लेख्नुपर्ने भएको हो ।