विराटचोकः सडकमा अलपत्र परेका व्यक्तिलाई सुन्दरहरैंचा नगरपालिकाले मानव सेवा आश्रममा पुर्याएको छ । उपप्रमुख धनमाया तामाङले आइतबार विराटचोकमा अलपत्र परेकी एक महिलालाई उद्दार गरेर मानव सेवा आश्रम विराटनगरमा लगेकी हुन् । यस अघि नगरपालिकाले ६ जनाको उद्धार गरी मानव सेवा आश्रम विराटनगर लगेको उपप्रमुख धनमाया तामाङले बताइन् ।
आश्रममा अहिले २ सय ४७ जना सहयोगापेक्षी मानव रहेको आश्रमका प्रमुख नवराज केसीले बताए । आश्रममा बस्नेलाई दिनमा ४ पटक खाना र खाजा खुवाउने गरेको केसीले बताए । त्यहा बस्ने व्यक्तिहरुको उपचारमा समस्या भएको पनि उनले सुनाए । त्यहाँ रहनेको सामान्य उपचार भने निकेशमणि राजभण्डारीले निःशुल्क गर्दै आएका छन् । तर औषधी किन्नुपर्ने हुँदा रकमको अभाव हुने गरेको प्रमुख केसी बताउँछन् ।
उद्धार गरिएका व्यक्तिका आफन्त आएपछि पुनर्मिलन गराउँदा आफूलाई सबैभन्दा धेरै आनन्द र रमाइलो लाग्ने आश्रमका कर्मचारी बताउँछन् । विराटनगरबाट हराएकी सुन्दरहरैचाकी १ जना बालिकालाई प्रहरीले झापामा सडकमा हिँडिरहेको अवस्थामा फेला पारी आश्रममा ल्याएको थियो । उनलाई अहिले अभिभावकले जिम्मा लिइसकेको आश्रमले जनाएको छ ।
आश्रममा आश्रितहरुलाई बिनारानी दाहालले आफ्नी आमाको पुण्य तिथिको दिन पारेर एक छाक खाना खुवाएकी थिइन् । उनले एक छाकको खाना बराबरको ११ हजार रुपैयाँ सहयोग गरेको बताइन् । आश्रममा पुरुष र महिलालाई छुट्टाछुट्टै भवनमा राख्ने गरिएको छ ।
You must be logged in to post a comment Login