विराटनगरः हतकडीसहित सोमबार अदालतबाट फरार भएका २ जनामध्ये एक जना थुनुवा पक्राउ परेका छन् । मोरङ अदालतमा पाँच दिनको म्याद थप भएपछि खाजा खाने बहाना बनाएर प्रहरीलाई झुक्याएर उनीहरु अदालत परिसरदेखि फरार भएका थिए । तीमध्ये १ जना थुनुवा मंगलबार साँझ पक्राउ परेका हुन् ।

लागूऔषध मोरङ अदालतमा म्याद थप अदालत परिसरबाटै मोरङको कटहरी गाउँपालिका–४ का ३७ वर्षीय मुराज भनिने मनराज शेख र झापाको बिर्तामोड नगरपालिका–५ का २० वर्षीय प्रकाश चौधरी फरार भएका थिए । फरार भएकामध्ये शेख पक्राउ परेको मोरङ प्रहरीका प्रमुख एसपी सन्तोष खड्काले बताए ।

पक्राउ परेका शेखलाई जिल्ला प्रहरी कार्यालय मोरङमा ल्याएर अनुसन्धान शुरु गरेको एसपी खड्काले बताए । उनीहरुलाई खोज्न मोरङ प्रहरी र १ नम्बर प्रदेश प्रहरी कार्यालय विराटनगरको विशेष प्रहरी टोली परिचालन भएको थियो । शेखलाई भारतको अररियाबाट पक्राउ गरेको प्रहरीले जनाएको छ । भारतीय प्रहरीसँग समन्वय गरेपछि शेखलाई नेपाल ल्याइएको छ ।