विराटचोकः आज सुन्दरहरैंचा नगरपालिकाको इजलास उद्घाटन गरिएको छ । इजलास तयार भएको झण्डै १ वर्षपछि उद्घाटन भएको हो । वडा नम्बर ४ को भवनमा निर्माण गरिएको इजलासको उद्घाटन कार्यक्रमका प्रमुख अतिथि उच्च अदालत विराटनगरका मुख्य न्यायाधीश तिलप्रसाद श्रेष्ठले गरेका छन् ।

श्रेष्ठले कार्यक्रममा बोल्दै न्यायधीश र न्यायको सम्बन्ध पति र पत्नीको जस्तो हुनुपर्ने बताए । ‘न्यायिक स्वच्छता र न्यायको निष्पक्षताका लागि न्यायधीश र न्यायको सम्बन्ध पति र पत्नीको जस्तो हुनुपर्छ’, उनले भने ‘जसरी पति र पत्नीको व्यवहारमा आशंका उत्पन्न हुँदा सम्बन्ध बिग्रन्छ त्यसरी नै न्याय र न्यायधीशबीच आशंका हुँदा न्यायको अभीष्ट पूरा हुँदैन । त्यसैले पतिव्रता पत्नी र पत्नीव्रता पतिजस्तै न्यायव्रता न्यायधीश हुनुपर्छ ।’ न्याय एकातिर, कानुन अर्कातिर र प्रमाण एकातिर तथा न्याय अर्काेतिर हुन नहुने उनको भनाइ थियो ।

संविधानले अवलम्बन गरेअनुसार स्थानीय सरकारमा व्यवस्थापिका, कार्यपालिका र न्यायपालिका भए पनि न्यायिक समितिमा आउने जनप्रतिनिधिहरु न्याय र कानुनी पृष्ठभूमिको नभएका हुनाले न्याय सम्पादन कस्तो हुन्छ भन्नेमा शुरुमा आशंका भए पनि त्यो आशंका अब हराएको उनको भनाइ थियो । शुरुमा अवस्था निराशाजनक भए पनि त्यो निराशा हराएको उनले बताए ।

न्याय अनुभूति र विश्वासमा हुने भएकाले निष्पक्ष र स्वच्छ हुनुपर्नेमा पनि उनले जोड दिए ।

कार्यक्रममा नगरप्रमुख शिवप्रसाद ढकालले अघिल्लो वर्षको चैतमा नै इजलास उद्घाटन गर्ने तयारी भए पनि कोरोनाका कारण एक वर्ष ढिलो भएको बताए ।

कार्यक्रमकी सभापति उपप्रमुख तथा न्यायिक समिति संयोजक धनमाया तामाङले न्याय सम्पादनसम्बन्धी ३ तहको अदालतमध्ये स्थानीय तहको न्यायिक इजलासले संविधानमा आफूलाई दिएको अधिकार कानुन र न्याय मान्य सिद्धान्त बमोजिम मुद्दा हेर्ने र न्यायिक निकायबाट विवाद समाधान गरिने बताइन् । सुन्दरहरैंचाको न्यायिक समितिले अब आज उद्घाटन भएको इजलासबाट नै न्याय सम्पादन गर्ने उनको भनाइ थियो ।

कार्यक्रमलाई सम्बोधन गर्दै मोरङ जिल्ला अदालतका न्यायधीश मेदिनीप्रसाद पौडेलले स्थानीय तहले राम्रो न्याय सम्पादन गरिरहेको र परिपक्व हुँदै गएको बताए । आवश्यक परेमा सेवाग्राहीले कानुनी सल्लाहकारको सहयोग लिन सक्ने उनले बताए ।

कार्यक्रममा नगरपालिकाका कानुनी सल्लाहकार बालकृष्ण आचार्य, नगरपालिकाका सबै वडाका अध्यक्ष, कार्यपालिका सदस्य, विभिन्न दल तथा संघसंस्थाका प्रतिनिधिको उपस्थिति थियो । कार्यक्रमको सञ्चालन वडा नम्बर ४ का अध्यक्ष शैलेन्द्र श्रेष्ठले गरेका थिए ।

नगरपालिकाको न्यायिक सदस्यमा चैतन्यप्रसाद सिटौला र भक्तकिरण राई रहेका छन् । मुद्दा दर्ताका लागि उजुरी प्रशासकको व्यवस्था गरिएको छ । जसमा कर्मचारी सिजन श्रेष्ठ रहेका छन् ।