विराटचोकः सुन्दरहरैंचा उद्योग वाणिज्य संघका नवनिर्वाचित पदाधिकारीले आइतबार पदभार ग्रहण गरेका छन् । आइतबार साँझ आयोजित कार्यक्रममा उनीहरुले पद तथा गोपनीयताको शपथ ग्रहणका साथै पदभार ग्रहण गरेका हुन् ।
मुख्य निर्वाचन अधिकृत केशव अधिकारीले उनीहरुलाई पदभार ग्रहण गराएका थिए । त्यस्तै निवर्तमान अध्यक्ष नवराज चापागाईंले नवनिर्वाचित अध्यक्ष रिजाललाई संघको चाबी, छाप, कागजपत्र तथा निर्वाचनमा मनोनयन दर्ता गर्दा जम्मा भएको नगद ७६ हजार रुपैयाँ हस्तान्तरण गरे । त्यसभन्दा पहिले निर्वाचन समितिले चापागाईलाई सो नगद हस्तान्तरण गरेको थियो ।
त्यस्तै, निवर्तमान महासचिव सन्तोष वान्तवाले नवनिर्वाचित महासचिव नारायण कार्कीलाई संघको माइन्युट हस्तान्तरण गरेका थिए । सो क्रममा कार्यक्रमलाई सम्बोधन गर्र्दै वान्तवाले १३ वर्षदेखि निरन्तर रुपमा संस्थासँग जोडिएर काम गर्दा आफूले धेरै कुरा सिकेको बताए ।
पदभार ग्रहण कार्यक्रमलाई सम्बोधन गर्दै निर्वाचनमा अध्यक्ष पदका प्रत्यासी टीकाप्रसाद कट्टेलले निर्वाचित पदाधिकारीलाई सबै पक्षलाई समेटेर अघि बढ्न सुझाव दिए ।
निवर्तमान अध्यक्ष नवराज चापागाईले निर्वाचनका समयमा भएका तिक्ततालाई बिर्सिएर नेतृत्वले काम गर्नुपर्ने बताए ।
कार्यक्रमलाई सम्बोधन गर्दै नवनियुक्त अध्यक्ष कृष्णप्रसाद रिजालले चुनावी क्रममा भएका तिक्तता चुनावकै दिन आफूले बिर्सिसकेको र सबै पक्षको साथ र सहयोग लिएर अघि बढ्ने बताए ।
कार्यक्रमको पहिलो चरण निर्वाचन समितिका सदस्य अर्जुन बस्नेतले सञ्चालन गरेका थिए । नवनिर्वाचित कार्यसमितिले पदभार ग्रहण गरेपछिको कार्यक्रम संघका नवनियुक्त महासचिव कार्कीले सञ्चालन गरेका थिए ।
You must be logged in to post a comment Login