इटहरीः सुनसरीको वराहक्षेत्र नगरपालिकाको सहयोग तथा हेल्पिङ युथ सुनसरीको आयोजनामा ४ दिने आधारभूत टेलिभिजन पत्रकारिता तालीम सम्पन्न भएको छ । फागुन २२ देखि २५ गतेसम्म चक्रघट्टीस्थित पारालिगल भवनमा सम्पन्न तालीमको बराहक्षेत्र नगरपालिकाका मेयर नीलम खनालको प्रमुख आतिथ्यतामा शनिबार प्रशिक्षार्थीहरूलाई प्रमाण पत्र वितरण गरिएको छ ।

प्रमुख अतिथि मेयर खनाल, ग्रामीण पत्रकार समूहका अध्यक्ष हिरण्य कार्की, प्रेस संगठन नेपालका वराहक्षेत्र नगर संयोजक विमला घिमिरे, द प्राइड हस्पिटालिटीका प्रमुख नितेश पोखरेल तथा आयोजक संस्थाका अध्यक्ष विकल पौडेलले सहभागी प्रशिक्षार्थीहरूलाई प्रमाण पत्र वितरण गरेका थिए ।

प्रमाणपत्र वितरण गर्दै मेयर खनालले तालीमको सिकाइले नगरका सकारात्मक र नकारात्मक दुवै पक्षलाई उजागर गरेर पत्रकारिताको धर्म निर्वाह गर्न उनले प्रशिक्षार्थीहरूलाई शुभकामना दिएका थिए ।

ग्रामीण पत्रकार समूहका अध्यक्ष हिरण्य कार्कीले नगरमा टेलिभिजनसम्बन्धी पत्रकारिता तालीम आयोजनाले यहाँका नव आगन्तुकहरूलाई थप क्षमतावान बनाउने बताए ।

प्रेस संगठन नेपाल वराहक्षेत्र नगर संयोजक विमला घिमिरेले ४ दिने तालीमले सहभागीहरूलाई टेलिभिजन पत्रकारिताको विषयमा उचित ज्ञान दिन सफल भएको बताइन् । कार्यक्रममा प्रशिक्षार्थी कल्पना कार्की र किसन बस्नेतले आफ्नो भनाइ राखेका थिए ।

आयोजक संस्थाका अध्यक्ष विकल पौडेलले आगामी दिनहरूमा समेत नगरपालिकाको सहयोगमा थप तालीम आयोजना गर्ने प्रतिबद्धता व्यक्त गरे । तालीममा एपि वान टेलिभिजनका प्रदेश १ ब्युरो प्रमुख मिलन बुढाथोकी, नेपाल टेलिभिजन इटहरीकी उषा घिमिरे, दुर्गा खड्का, कान्तिपुर टिभीका अर्जुन सुवेदी, न्यूज २४ टिभीका मनोज भुजेल र ग्यालेक्सी फोरके टिभीका सन्तोष काफ्लेले सहजीकरण गरेका थिए ।