विराटचोकः मोरङको सुकुना बहुमुखी क्याम्पसका प्रमुख र सहायक प्रमुखको कार्यकक्षमा विद्यार्थी सङ्गठनले चैत २ गतेदेखि ताला लगाएको छ । अखिल नेपाल राष्ट्रिय स्वतन्त्र विद्यार्थी युनियनको सुकुना बहुमुखी क्याम्पस कमिटीले ताला लगाएको हो । नेकपा एमालेको भातृ सङ्गठन सो युनियन २ धारमा विभक्त भएपछि ताला लगाउने विषयमा विवाद देखिएको छ ।

सोही संगठनबाट विजयी भएका स्वतन्त्र विद्यार्थी युनियनका नेताले भने क्याम्पसमा कुनै पनि विवाद नरहेको बताएको छ ।

अनेरास्ववियुले २ गते जारी गरेको विज्ञप्तिमा १० सूत्रीय माग राखेको छ । विज्ञप्तिमा युनियनका क्याम्पस संयोजक कमल कार्कीले हस्ताक्षर गरेका छन् । स्ववियु सभापति सन्तोष लिम्बू र अनेरास्ववियु सुकुना क्याम्पस कमिटी संयोजक कार्की नेकपा एमालेको माधव नेपाल समूहको रहेको विद्यार्थी नेताहरु बताउँछन् ।

सोही विषयमा आज स्ववियुले विज्ञप्ति निकाल्दै तालाबन्दीको विरोध गरेको छ । स्ववियुका उपाध्यक्ष मिलन घिमिरे र सचिव चुडामणि रिजालको हस्ताक्षरमा जारी विज्ञप्तिमा अहिले पठनपाठनमा ध्यान दिनुपर्ने र क्याम्पस प्रशासनसँग त्यस्ता तत्काल माग राख्नुपर्ने कुनै विषय नभएको बताइएको छ ।

यस विषयमा स्ववियु उपाध्यक्ष घिमिरेसँग बुझ्दा सङ्गठनमा आन्दोलनका कुनै कुरा र बैठक नराखी आफुखुशी स्ववियु सभापति सन्तोष लिम्बूले ताला लगाएको आरोप लगाए । स्ववियु उपाध्यक्ष घिमिरे र सचिव रिजाल भने ओली पक्षधर विद्यार्थी नेता भएको अनेरास्ववियुका नेताहरु बताउँछन् ।

कोरोनाले विद्यार्थीको पठनपाठनमा असर परेकाले यस्ता गतिविधिले पढाइमा थप असर पुग्ने भएकाले शान्तिपूर्ण रुपमा आफ्ना माग राख्नुपर्ने उनको भनाइ छ ।

क्याम्पस प्रमुख चन्द्रमणि राईले विद्यार्थी संगठनले राखेका धेरै माग पूरा भइसकेको र केही माग पूरा हुने प्रक्रियामा रहेका र त्यसको परिणाम तत्काल नदेखिने बताए । तालाबन्दीका कारण विद्यार्थीको पठनपाठनमा भने कुनै असर नपुगेको प्रुमख राईको भनाइ छ ।

खास गरी ई लाइबे्ररीको व्यवस्था, साइकल स्टेण्ड सम्म जाने बाटो, क्याम्पस बस खरीद तथा ल्याब व्यवस्थापनलगायतका १० वटा माग राखेर विद्यार्थी संगठनले तालाबन्दी गरेको छ ।

नेकपा एमालेमा देखिएको विवाद भातृ सङ्गठनसम्म आइपुगेको देखिन्छ ।