विराटचोकः नवनियुक्त उद्योग, पर्यटन, वन तथा वातावरण राज्यमन्त्री राजकुमार ओझालाई सुन्दरहरैंचा नगरपालिकाले स्वागत गरेको छ । नगरपालिकाको प्राङ्गणमा आयोजित कार्यक्रममा नगरपालिकाका प्रमुख, उपप्रमुख, निमित्त प्रमुख प्रशासकीय अधिकृत, विभिन्न दलका प्रतिनिधि, जनप्रतिनिधिलगायतले स्वागत गरेका थिए ।

स्वागत कार्यक्रममा आफ्ना धारणा राख्दै राज्यमन्त्री ओझाले वन क्षेत्रमा नदीजन्य पदार्थ ननिकाल्दा खोलाको सतह बढेर बस्तीमा बाढी पसेर हुने समस्या हल गर्न सो क्षेत्रको अनुगमन गरी आवश्यक पहल गरिने बताए । आफू सांसदमात्रै हुँदा आफ्नो निर्वाचन क्षेत्रमात्रै नभएर अन्य क्षेत्रका पूर्वाधार विकासका लागि पनि आफूले पहल गरेको उनले स्मरण गरे ।

वनको व्यवस्थापनमा आफूले सक्दो पहल गर्ने पनि उनले प्रतिबद्धता जनाए ।

नगरभित्रका पर्यटकीय क्षेत्रहरु नयाँ वृन्दावन गौशाला, हसिना सिमसार, बाघझोडा सिमसार तथा बेलबारी र सुन्दरहरैंचाको सिमानामा रहेको वासुकी पोखरी वाटर रिचार्जको स्तरोन्नतिमा आफू लाग्ने उनले बताए । बाघझोडादेखि हसिना हुँदै विराटनगरसम्म जाने बाटो बनाउन पनि पहल भइरहेको उनले जनाए । आगामी आर्थिक वर्षमा पर्यटकीय क्षेत्रको विकासमा यथेष्ट बजेट विनियोजन गर्ने उनले बताए ।

कार्यक्रमलाई सम्बोधन गर्दै सुन्दरहरैंचा नगरपालिकाका मेयर शिवप्रसाद ढकालले वन व्यवस्थापनको नाममा रुख काट्ने गरिए पनि नयाँ बिरुवा रोप्ने र रोपेका बिरुवाको संरक्षणमा त्यति चासो नदिइनु दुःखद भएको बताए । वन क्षेत्रमा खोलाजन्य पदार्थ उत्खनन गर्न नपाउँदा सुन्दरहरैंचामा वन क्षेत्रबाट गछिया खोलो बस्तीमा पस्ने जोखिम बढिरहेकोतर्फ ओझाको ध्यानाकर्षण गराए । स्थानीय तहले ऐनको कारणले गर्दा वन व्यवस्थापनको विषयमा केही गर्न नसक्ने भएकाले संघ र प्रदेश सरकारले नै त्यसको पहल गर्नुपर्ने बताए ।

नगरमा भएका पर्यटकीय क्षेत्रको विकासमा नगरले संरक्षण गरिरहे पनि त्यसको प्रबद्र्धनको लागि यथेष्ट बजेट हुन नसक्दा समस्या परेको हुनाले बजेट विनियोजन गर्न मन्त्रीसमक्ष माग गरे ।

एकीकृत माओवादीका जिल्ला सदस्य नवराज चापागाईंले कमसल मलेसियन सखुवा आयात भइरहँदा नेपालको सखुवाको काठ भने वनमै कुहिनु दुःखद भएको बताए । नगरका पर्यटकीय क्षेत्रको विकास गर्न सके व्यापार व्यवसाय फस्टाउने हुनाले निजी क्षेत्रले पर्यटकीय क्षेत्रको विकासमा सक्दो सहयोग गर्ने उनको भनाइ थियो ।

नेपाली कांग्रेस सुन्दरहरैंचका सह सभापति तथा वडा नम्बर ७ का अध्यक्ष चैतन्यप्रसाद सिटौलाले चुनावको समयमा विभाजित भए पनि अन्य समयमा राजनीतिक दल एक भएमा नगरको विकास हुने बताए । हालसम्म सुन्दरहरैंचामा नगरको विकासमा सबै राजनीतिक दल एकै ठाउँमा रहने गरेकाले नगरको विकासमा अप्ठ्यारो परिस्थिति सिर्जना नभएको उनको भनाइ थियो ।

नेकपा एमालेका नगर अध्यक्ष मातृका ढकालले नगरको विकासमा प्रदेश सरकार र संघीय सरकारले बजेट विनियोजन गरिरहेको र अब थप बजेट विनियोजन हुने आशा पलाएको बताए । नगरभित्रका राजनीतिक दलको समन्वयका नगरको कारण विकास निर्माणका काम अनुकरणीय रहेको उनले उल्लेख गरे ।

कार्यक्रममा नगरपालिकाकी उपमेयर धनमाया तामाङले स्वागत मन्तव्य राखेकी थिइन् ।